ދުރު އަތޮޅުތަކުގައި ޓޫރިޒަމް ފުޅާކުރަން އިންވެސްޓަރުންނަށް ލުއި ދެނީ

ރާއްޖޭގައި މިވަގުތު ޓޫރިޒަމް ނެތް އަތޮޅުތަކަށް އިންވެސްޓަރުން ގެންދިއުމަށްޓަކައި އިންވެސްޓަރުންނަށް ލުއިތަކެއް ދިނުމަށް ގާނޫނު އިސްލާހު ކުރުމަށް ނިންމާފައިވާ ކަމަށް ޓޫރިޒަމް މިނިސްޓަރު އިބްރާހިމް ފައިސަލް މިއަދު ވިދާޅުވެއްޖެ އެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި ތ. އަތޮޅުގައި ޓޫރިޒަމް ނެތުމަކީ ރައްޔިތުންގެ ކަންބޮޑުވުމެއް ކަން ފާހަގަކުރައްވައި ތިމަރަފުށީ ދާއިރާގެ މެންބަރު އަހުމަދު ރިޔާޒް ކުރެއްވި ސުވާލަށް ޖަވާބު ދެއްވަމުން ފައިސަލް ވިދާޅުވީ މިހާތަނަށް ޓޫރިޒަމް ފުޅާ ވެފައި އޮތީ މާލެ ކައިރި އަތޮޅުތަކުގައި އެކަނި ކަމަށެވެ.

ރާއްޖޭގައި ޓޫރިޒަމް އެންމެ ފުޅާ ދާއިރާއެއްގައި ކުރިއަރާފައި ވަނީ މާލެ އަތޮޅާއި ރ. އަތޮޅާއި ބ. އަތޮޅާއި ވ. އަތޮޅާއި، އއ. އަތޮޅާއި އދ. އަތޮޅުގައި ކަމަށް ފައިސަލް ވިދާޅުވި އެވެ.

މިނިސްޓަރު ވިދާޅުވީ ވިސްނުން ހުރީ އިންވެސްޓަރުންނަށް ބޮޑެތި ލުއިތަކެއް ދީގެން ނަމަވެސް ރާއްޖޭގައި ޓޫރިޒަމް ނެތް ތަންތަނުގައި ޓޫރިޒަމް ފެށުމަށެވެ. އެގޮތުން، އިކުއިޒިޝަން ކޯސްޓާއި ޓެކްސްއަށް ވެސް ލުއި ލިބޭނެ ގޮތަކަށް ގާނޫނު ބަދަލުކުރުމަށް މަޝްވަރާ ކުރަމުން އަންނަ ކަމަށް އޭނާ ވިދާޅުވި އެވެ.

"އަޅުގަނޑުމެން ގަބޫލުކުރަނީ އެ ތަންތަނުގެ އިކުއިޒިޝަން ކޯސްޓު ވެސް ކުޑަވެގެން ދާން ޖެހޭނެ ކަމަށް. ލޭންޑް ރެންޓު ވެސް ކުޑަވެގެން ދާން ޖެހޭނެ ކަމަށް. ޓެކްސް ތެރެއިން ވެސް އެކަމަށް ލުއިތަކެއް ދޭން ޖެހޭނެ ކަމަށް،" ފައިސަލް ވިދާޅުވި އެވެ.

އޭނާ ވިދާޅުވި ގޮތުގައި ދުރު އަތޮޅުތަކަށް އަވަހަށް އިންވެސްޓަރުން ގެންދެވޭނެ ހަމައެކަނި ގޮތަކަށް ފެންނަނީ މި ބަދަލެވެ. އެހެންކަމުން މި އިސްލާހުތައް ބަންޑާރަ ނައިބުގެ އޮފީހުން ވަރަށް އަވަހަށް މަޖިލީހަށް ހުށަހަޅާނެ ކަމަށް ވެސް މިނިސްޓަރު ވިދާޅުވި އެވެ.