ރަސްދޫ މަރު: އެކްސްކާޝަން ކުންފުނީގެ ލައިސެންސް އޮތީ މުއްދަތު ހަމަވެފައި، ހަރުކަށި ފިޔަވަޅު އަޅަނީ

އއ. ރަސްދޫގެ ބޭރުގައި ސްނޯކަލިން އަށް ގޮސް އުޅުނު ޗައިނާގެ ޓޫރިސްޓު މަރުވި ހާދިސާ ހިނގިއިރު، ސްނޯކެލިން އަށް ގެންދިޔަ ކުންފުނީގެ ލައިސަންސް ވެސް އޮތީ ހަމަވެފައި ކަމަށް ޓޫރިޒަމް މިނިސްޓްރީން މިއަދު ބުނެފި އެވެ.

ރަސްދޫ ކައިރީ އޮންނަ ގަންގެހި ރިސޯޓު ބޭރުގައި ސްނޯކެލިން އަށް ގޮސް އުޅުނު ޓޫރިސްޓަކު މަރުވީ މިދިޔަ މަހުގެ 13 ވަނަ ދުވަހު އެވެ. އޭގެ ކުރިން، މިދިޔަ މަހުގެ ހަތް ވަނަ ދުވަހު ކ. މާފުށީގައި ސްނޯކްލިން އަށް ގޮސް އުޅެނިކޮށް ވެސް ޗައިނާ ޓޫރިސްޓަކު މަރުވެފައިވެ އެވެ.

ޓޫރިސްޓުންގެ ސަލާމަތާއި ރައްކާތެރިކަން ކަށަވަރު ކުރުމަށް އެކުލަވާލަން ޖެހޭ ގަވައިދުތަކާ ގުޅޭ ގޮތުން ޓޫރިޒަމް މިނިސްޓްރީގެ ބޭފުޅުން މިއަދު ވަނީ ރައްޔިތުންގެ މަޖިލީހުގެ ގަވައިދު ކޮމިޓީއަށް ހާޒިރުކޮށްފަ އެވެ.

މި ބައްދަލުވުމުގައި، މާފުއްޓާއި ރަސްދޫގައި ހިނގައިދިޔަ ހާދިސާތަކާ ގުޅިގެން އެޅީ ކޮން ފިޔަވަޅެއްތޯ އާއި އެ ކުންފުނިތަކުގެ ލައިސަންސް އޮތްތޯ ސުވާލުކޮށްފައިވަނީ ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމެވެ.

އެ ސުވާލަށް ޖަވާބު ދެއްވަމުން ޓޫރިޒަމް މިނިސްޓްރީގެ ސްޓޭޓް މިނިސްޓަރު އަހުމަދު ނާޒިމް މުހައްމަދު ވިދާޅުވީ ރަސްދޫގައި އެ ހިދުމަތް ދިން ތަނަކީ ރަޖިސްޓްރީކޮށްގެން ހިންގި ތަނެއް ނަމަވެސް، ހާދިސާ ހިނގީ ލައިސަންސް އާ ނުކޮށް އޮއްވައި ކަމަށެވެ.

"އެ ހާދިސާ ހިނގިއިރު އެތަނުގައި ވެލިޑް ރެޖިސްޓްރޭޝަނެއް ނެތް،" ނާޒިމް ވިދާޅުވި އެވެ.

އޭނާ ވިދާޅުވީ ހާދިސާ ހިނގި ފަހުން އަލުން ރެޖިސްޓްރީކުރަން ހުށަހަޅާފައި އޮތް ކަމަށެވެ.

މި ކަމާ ގުޅިގެން ގަވައިދުން އެޅެން އޮތް އެންމެ ބޮޑު ފިޔަވަޅެއް އަޅަން އަންގާފައިވާނެ ކަމަށް ނާޒިމް ވިދާޅުވި އެވެ.

ނާޒިމް ވިދާޅުވީ މާފުއްޓާއި ރަސްދޫގައި ހިނގައިދިޔަ ހާދިސާއާ ގުޅިގެން ފުލުހުންނާ ގުޅިގެން ކޮމިޓީއެއް އެކުލަވާލައި ތަހުގީގު ވަރަށް ބާރު ސްޕީޑުގައި ކުރިއަށްދާ ކަމަށެވެ.

އެންމެ ބޮޑު ކަމެއްގެ ގޮތުން، އިސްނަގައިގެން ކުރިއަށް ގެންދަން ނިންމާފައިވާ ކަމަކީ ފުޅާ ދާއިރާއެއްގައި ޓޫރިޒަމް ހިންގާ ރަށްރަށުގައި ލައިސަންސް ނެތި ހިދުމަތްދޭ ފަރާތްތައް ދެނެގަތުން ކަމަށް އޭނާ ވިދާޅުވި އެވެ. އޭނާ ވިދާޅުވީ ޓޫރިޒަމްގެ ޑޭޓާބޭސް އޮންނަ ގޮތުން އެނގެނީ ލައިސަންސް އޮތް ފަރާތްތައް އެކަނި ކަމަށެވެ.

"ލައިސަންސް ނެތި ބަޔަކު ތަނެއް ހިންގި ކަމުގައި ވިޔަސް ބަޔަކު ޝަކުވާއެއް ނުކުރާ ކަމަށް ވަންޏާ މިނިސްޓްރީއަށް ގިނަ ފަހަރު އޮންނާނީ ނޭނގިފައި. ދެން ގިނަ ފަހަރު އޭގެ މައުލޫމާތު އަޅުގަނޑުމެންނަށް މި އެނގެނީ ހާދިސާ ހިނގައިގެން އެ ތަންތަނުގެ ސްޓޭޓަސް ބަލާލާއިރުގައި،" ނާޒިމް ވިދާޅުވި އެވެ.

މިފަދަ ބައިވަރު ތަންތަން ފާހަގަވެފައިވާތީ، މި އިންސްޕެކްޝަން ކުރިއަށް އޮތް ދެ ހަފްތާ ތެރޭގައި ފަށާނެ ކަމަށް އޭނާ ވިދާޅުވި އެވެ.