ސަޕްލިމެންޓްރީ އަދަދާ އެކު ބަޖެޓުގެ ޖުމްލަ 55 ބިލިއަނަށް

ދައުލަތުގެ މި އަހަރުގެ ބަޖެޓަށް އިތުުރު ކުރި 5.1 ބިލިއަން ރުފިޔާއާ އެކު ބަޖެޓު ޑެފިސިޓް 18.4 ބިލިއަން ރުފިޔާ އަށް އިތުުރުވެ ޖުމްލަ ބަޖެޓު 55 ބިލިއަން ރުފިޔާ އަށް އަރާނެ ކަމަށް ފިނޭންސް މިނިސްޓްރީން މިއަދު ބުނެފި އެވެ.

ސަޕްލިމެންޓްރީ ބަޖެޓާ ގުޅޭ ގޮތުން އެ މިނިސްޓްރީން ހިއްސާކުރި މައުލޫމާތުތަކުން އެނގޭ ގޮތުން ބަޖެޓުގެ ޖުމްލަ އަދަދު މި އަހަރު 55 ބިލިއަން ރުފިޔާ އަށް އަރާނެ އެވެ. މި އަހަރަށް ފާސްކޮށްފައި އޮތީ 49.5 ބިލިއަން ރުފިޔާގެ ބަޖެޓެކެވެ.

ކުރިން ޑެފިސިޓުވާނެ ކަމަށް ލަފާކޮށްފައިވަނީ 16.3 ބިލިއަން ރުފިޔާ އެވެ.

ބަޖެޓުގެ ޑެފިސިޓް ބޮޑުވުމާ އެކު، އަހަރު ނިމޭ އިރު ދައުލަތުގެ ދަރަނި ހުންނާނީ ޖީޑީޕީގެ ނިސްބަތުން 118 ޕަސެންޓުގަ އެވެ.

މި އަހަރުގެ ބަޖެޓުގެ ގާތްގަނޑަކަށް 70 ޕަސެންޓު ހޭދަކުރަނީ ރިކަރަންޓް ހަރަދުތަކަށެވެ. ސަޕްލިމެންޓްރީ ބަޖެޓާ އެކު ޖުމުލް ރިކަރަންޓު ހަރަދު 36.4 ބިލިއަން ރުފިޔާ އަށް އަރާނެ އެވެ. ކެޕިޓަލް ހަރަދު ނުވަތަ ޕްރޮޖެކްޓްތަކަށް ކުރާ ހޭދަ 15 ބިލިއަން ރުފިޔާ އިން 19 ބިލިއަން ރުފިޔާ އަށް އިތުރުވާނެ އެވެ.

އޭގެ ތެރެއިން ބިން ހިއްކުމާއި އިމާރާތް ކުރުމުގެ ހަރަދު 9 ބިލިއަން ރުފިޔާ އިން 11 ބިލިއަން ރުފިޔާ އަށް އިތުރުވާނެ އެވެ. ސްޓޫޑެންޓް ލޯނު ދޫކުރަން ކުރާ ހޭދަ އެއް ބިލިއަން ރުފިޔާ އަށް އިތުރުވެ އެވެ. ކުންފުނިތަކަށް ކުރާ ހޭދަ 2.1 ބިލިއަން ރުފިޔާ އަށް އިތުރުވާނެ އެވެ.

ސަޕްލިމެންޓްރީ ބަޖެޓުގައި ބޭރުގެ ލޯނު އެހީގެ ގޮތުގައި 1.4 ބިލިއަން ރުފިޔާ ހޯދަން ކަނޑައަޅާފައިވެ އެވެ. އަދި ޑޮމެސްޓިކް މާކެޓުން ހޯޑަން ކަނޑައަޅާފައިވަނީ ތިން ބިލިއަން ރުފިޔާ އެވެ. އެއާ އެކު ޖުމްލަ ބަޖެޓު ފައިނޭންސްސިންގެ އަދަދު 19 ބިލިއަން ރުފިޔާ އަށް އިތުރުވާނެ އެވެ.

ބަޖެޓުގެ ބައެއް ބައިތައް:

- ޖުމްލަ ބަޖެޓު: 55 ބިލިއަން ރުފިޔާ

- އާމްދަނީ: 36.4 ބިލިއަން ރުފިޔާ

- ރިކަރަންޓް ހަރަދު: 36.3 ބިލިއަން ރުފިޔާ

- ކެޕިޓަލް ހަރަދު: 19 ބިލިއަން ރުފިޔާ

- ބަޖެޓު ފައިނޭންސިން: 19 ބިލިއަން ރުފިޔާ

- ޑެފިސިޓް: 18.4 ބިލިއަން ރުފިޔާ