އިޒްރޭލުގެ ހަމަލާތައް އީރާންގެ މިސައިލް ސައިޓްތަކާއި އަސްކަރީ މަގާމުތަކަށް

އިޒްރޭލުން އީރާނަށް ދިން ހަމަލާތައް އަމާޒުކުރީ މިސައިލް ސައިޓްތަކާއި އަސްކަރީ މަގާމުތަކަށް ކަމަށާއި އަލުން އީރާނުން ހަމަލާ ދީފި ނަމަ އަދާކުރަންޖެހޭ އަގު އަދި މާ ބޮޑުވާނެ ކަމަށް ބުނެ އިޒްރޭލުން އިންޒާރު ދީފި އެވެ.

އިޒްރޭލުގެ އަސްކަރިއްޔާއިން ބުނީ އީރާނުގެ މިސައިލް އުފައްދާ މަރުކަޒުތަކަށާއި މިސައިލް ސައިޓްތަކާއި ބައެއް ސަރަހައްދުތަކުގައި ހުރި އަސްކަރީ އެކި ތަންތަނަށް ހަމަލާތައް ދީފައިވާ ކަމަށެވެ.

އިޒްރޭލުން ވެރިރަށް ތެހެރާނާއި އެ ގައުމުގެ އެހެން ސަރަހައްދުތަކުގެ އަސްކަރީ ތަންތަނަށް އަމާޒުކޮށް ދިން ހަމަލާ ދިންކަން އީރާނުން ކަށަވަރުކޮށްދިން ނަމަވެސް ބޮޑު ގެއްލުމެއް ނުވާ ކަމަށް އީރާނުން ބުންޏެވެ.

އިޒްރޭލުން ހަމަލާ ދިނީ މި މަހުގެ 1 ވަނަ ދުވަހު އީރާނުން އިޒްރޭލަށް ދިން މިސައިލް ހަމަލާތަކުގެ ބަދަލު ހިފާނެ ކަމަށް ބުނެ ކުރިން އިންޒާރު ދިނުމަށް ފަހުގަ އެވެ.

އިންޓެލިޖެންސް މައުލޫމާތަށް ބަލައި އައިއޭއެފް (ވައިގެ ސިފައިން) ގެ މަތިންދާބޯޓުތަކުން ހަމަލާ ދިނީ މިދިޔަ އަހަރު ތެރޭގައި އީރާނުން އިޒްރޭލަށް ފޮނުވާލި މިސައިލްތައް އުފައްދަން ބޭނުންކުރި މަރުކަޒުތަކަށް،" އިޒްރޭލުގެ އަސްކަރިއްޔާއިން ނެރުނު ބަޔާނެއްގައި ބުންޏެވެ.

"ހަމަ އެއާ އެކު އައިޑީއެފް (އަސްކަރިއްޔާ) އިން ވަނީ ސާފޭސް ޓު އެއާ މިސައިލް އެރޭތަކާއި އީރާނުގެ އިތުރު ވައިގެ ސިފައިންގެ މަގާމުތަކަށް ހަމަލާދީފައި،" އަސްކަރިއްޔާއިން ބުނީ "ބަދަލު ހިފުމުގެ ހަމަލާތައް މިހާރު ނިމި، މިޝަން ފުރިހަމަވެފައިވާ" ކަމަށެވެ.

މި އޮޕަރޭޝަން އިއުލާނުކޮށް އިޒްރޭލުގެ އަސްކަރިއްޔާއިން ނެރުނު ބަޔާނެއްގައި ބުނެފައިވަނީ އީރާނުގެ އަސްކަރީ އަމާޒުތަކަށް "ސީދާ ހަމަލާތަކެއް" ދެމުން އަންނަ ކަމަށާއި އެއީ އީރާނުން އެތައް މަހެއްވަންދެން އިޒްރޭލަށް ދިން ހަމަލާތަކުގެ ރައްދު ކަމަށެވެ.

އިޒްރޭލުން ބުނި ގޮތުގައި އޮކްޓޫބަރު 7 އިން ފެށިގެން އީރާނުން ދަނީ އެ ގައުމުގެ އެހީ ލިބިގެން ހިންގާ ޖަމާއަތްތައް މެދުވެރިކޮށް އިޒްރޭލަށް ހަމަލާ ދެމުންނެވެ.

އީރާނުން އިޒްރޭލަށް ސީދާ ގޮތުގައި ފުރަތަމަ ފަހަރަށް ހަމަލާ ދިނީ ސީރިއާގެ ދިމިޝްގުގައި ހުންނަ އީރާނުގެ ކޮންސިއުލާ އެނެކްސްއަށް އިޒްރޭލުން ދިން ނުރައްކާތެރި ހަމަލާގެ ބަދަލު ހިފުމުގެ ގޮތުން މިދިޔަ އޭޕްރީލް މަހުގެ ތެރޭގަ އެވެ.

އިޒްރޭލުގެ ތާރީހުގައި ދިން އެންމެ ނުރައްކާތެރި ހަމަލާ ކަމަށްވާ އޮކްޓޯބަރު 7، 2023 ގެ ހަމަލާއަށް ފަހު އިޒްރޭލުން ޣައްޒާގައި ހަމާސް ޖަމާއަތާ ދެކޮޅަށް ކަމަށް ބުނެ ހަމަލާތައް ދެމުން ދާއިރު މިދިޔަ މަހުގެ ފަހުކޮޅުން ފެށިގެން ލުބުނާނުގެ ހިޒްބުﷲ ޖަމާއަތާ ދެކޮޅަށް ވެސް އިޒްރޭލުން މިހާރު ދަނީ ވަރުގަދަ އަށް ހަމަލާ ދެމުންނެވެ.

ހަމާސް އާއި ހިޒްބުﷲ އަށް ވެސް އީރާންގެ ތާއީދާއި މަދަދު ބޮޑެވެ.