ހަތަރު ސިފައިންގެ މަރަށް ފަހު އީރާނުން އިޒްރޭލަށް އިންޒާރު

އިޒްރޭލުން އީރާންގެ އަސްކަރީ ބައެއް ތަންތަނަށް ދިން ހަަމަލާތަކުގައި ބޮޑު ގެއްލުމެއް ނުވި ނަމަވެސް ސިފައިންގެ ހަތަރު މީހަކު މަރުވި ކަމަށާއި އިޒްރޭލުގެ ކިބައިން ދިފާއުވުމުގައި ނުދާނެ ހިސާބެއް ނޯންނާނެ ކަމަށް ބުނެ އިންޒާރު ދީފި އެވެ.

އިޒްރޭލަށް އީރާނުން ސީދާ ގޮތުން ދީފައިވާ ހަމަލާތަކާއި އެކި ޖަމާއަތްތައް މެދުވެރިކޮށް ދެމުން ގެންދާ ހަމަލާތަކުގެ ރައްދު ކަމަށް ބުނެ އިޒްރޭލުން ވައިގެ މަގުން އީރާނަށް ހަމަލާ ދިނުމަށް ފަހު އިޒްރޭލުން ވެސް ވަނީ އިންޒާރު ދީފަ އެވެ.

އިޒްރޭލުން ބުނީ ދެން އީރާނުން ހަމަލާއެއް ދީފި ނަމަ އަދާކުރަންޖެހޭ އަަގު ވަރަށް ބޮޑުވާނެ ކަމަށެވެ. އިޒްރޭލުގެ އޮފިޝަލުން ވަނީ އީރާނަށް ދިން ހަމަލާ އަކީ ބޭނުން އިރަކު އީރާންގެ ބޭނުން ތަނަކަށް ހަމަލާ ދެވޭނެ ގާބިލްކަން ހުރިކަން އީރާނަށް ދައްކާލުމެއްގެ ގޮތުގައި ސިފަކޮށްފަ އެވެ.

އަނެއްކޮޅުން އެމެރިކާއިން ވެސް ބުނެފައި ވަނީ އެއް ބަޔަކު އަނެއް ބަޔަކަށް ހަމަލާދީ ބަދަލު ހިފުން ތަކުރާރު ކުރުން މި ހިސާބުން ދެން ހުއްޓާލަން ވެއްޖެ ކަމަށެވެ.

އީރާނުން ބުނި ގޮތުގައި އިޒްރޭލުގެ ހަމަލާތަކުން އީރާންގެ ނިއުކްލިއާ އެއްވެސް ފެސިލިޓީއަކަށް އަދި ތެޔޮ ކާރުހާނާއަކަށް ވެސް ގެއްލުމެއް ނުވެ އެވެ.

އީރާންގެ ވެރިރަށް ތެހެރާންގެ ވަށައިގެން ހުރި މިސައިލް ސައިޓްތަކާއި އަސްކަރީ އެހެން ތަންތަނަށް ދިން ހަމަލާތަކަކީ ބައިނަލްއަގުވާމީ ގާނޫނުތަކާއި އާންމު އުސޫލާ ވެސް ހިލާފް އަމަލެއް ކަމަށް ބުނެ އަރަބި އަދި އިސްލާމީ ގިނަ ގައުމުތަކަކުން ވަނީ އިޒްރޭލު ކުށްވެރިކޮށްފަ އެވެ. އަނެއްކޮޅުން، ހުރިހާ ގައުމަކުން ވެސް ދަނީ މިހެން ހަމަލާ ދީގެން މެދުއިރުމަތީގެ ހާލަތު އިތުރަށް ގޯސް ނުކުރުމަށް ގޮވާލަމުންނެވެ.