އިންޑިއާގެ އެއާލައިންތަކަށް އިންޒާރު ދޭތީ ސޯޝަލް މީޑިއާއަށް އިންޒާރެއް

މި މަހު އިންޑިއާގެ އެއާލައިންތަކަށް ލިބުނު، ހަގީގަތެއް ނެތް އެތައް ސަތޭކަ އިންޒާރެއްގެ ސަބަބުން ދަތުރުފަތުރަށް އެޅުނު ހުރަސްތަކާއި، ގައުމީ ސަލާމަތަށް ނުރައްކާވާ ފަދަ ބިރުވެރިކަން އުފެދުމާ ގުޅިގެން، އިންޑިއާއިން ސޯޝަލް މީޑިއާ ޕްލެޓްފޯމްތަކަށް އިންޒާރު ދީފި އެވެ.

މަތިންދާބޯޓުގައި ބޮމެއް އޮތް ކަމަށް ބުނެ ދީފައިވާ ބައެއް އިންޒާރުތަކުގެ ސަބަބުން މަތިންދާބޯޓުތައް ކެނެޑާ އަދި ޖަރުމަނަށް ޑައިވާޓްކުރަން ޖެހުނެވެ. އަދި ޔޫކޭ އާއި ސިންގަޕޫރު ސަރަހައްދުން މަތިންދާބޯޓުތަކާ އެކު ފައިޓަ ޖެޓްތައް ފޮނުވަން ޖެހުނެވެ.

އިންޑިއާ ސަރުކާރުން ބުނީ މިފަދަ އިންޒާރުތައް އެއްވެސް ހިފެހެއްޓުމެއް ނެތި ނުރައްކާ ދަރަޖައަކަށް މިހާރު ފެތުރޭ ކަމަށެވެ.

އިންޑިއާ ސަރުކާރުން ބުނީ މިފަދަ އިންޒާރުތަކީ ދޮގު މައުލޫމާތު ކަމަށާއި އެހެންވެ އެއީ ދޮގުކަން އެނގުމާ އެކު އަވަހަށް ސޯޝަލް މީޑިއާއިން އެ ނެގުމަކީ ސޯޝަލް މީޑިއާ ޕްލެޓްފޯމްތަކުގެ ޒިންމާއެއް ކަމަށެވެ. އެ ޒިންމާ އަދާ ނުކުރާ ނަމަ އަޅަންޖެހޭ ފިޔަވަޅުތައް އަޅާނެ ކަމަށް ވަނީ އިންޒާރު ދީފަ އެވެ.

"އެއާލައިންތަކަށް ދޭ މިފަދަ ދޮގު ބޮމު އިންޒާރުތަކުގެ ނުބައި އަމަލުތަކަކީ އާންމު އަމަން އަމާންކަމަށާއި ދައުލަތުގެ ސަލާމަތަށް ފޯރާފާނެ ނުރައްކަލެއް" ކަމަށް ހޮނިހިރު ދުވަހު ނެރުނު ބަޔާނެއްގައި ބުނެފައިވެ އެވެ.

މިފަދަ ދޮގު އިންޒާރުތަކުން އެތައް ބަޔަކަށް އުނދަގުލާއި ބިރުވެރިކަން ކުރިމަތިވުމުގެ އިތުރުން ގައުމުގެ އިގްތިސާދީ ސަލާމަތަށް ނުރައްކާވާ ކަމަށް ބަޔާނުގައިވެ އެވެ.

ޕްރެސް ޓްރަސްޓް އޮފް އިންޑިއާ (ޕީޓީއައި) ނިއުސް އެޖެންސީގެ މައުލޫމާތުން ދައްކާ ގޮތުގައި އޮކްޓޯބަރު މަހުގެ މެދަކާ ހިސާބުން ފެށިގެން މިހާތަނަށް، މަދުވެގެން 275 ބޮމު އިންޒާރު ލިބިފައިވެ އެވެ. މި ހުރިހާ އިންޒާރުތަކަކީ ވެސް ދޮގު އިންޒާރުތަކެއް ކަމަށް ރިޕޯޓުކޮށްފައިވެ އެވެ. އިންޑިއާގެ އެހެން މީޑިއާތަކުން ބުނާ އަދަދުތަކަށް ބަލާއިރު މިފަދަ އިންޒާރުތަކުގެ އަދަދު 400 އާ ގާތްކުރެ އެވެ.