ދިރާގުން ނެޓް ޕްރޮޓެކްޓް ތައާރަފްކޮށްފި

އިންޓަނެޓް ބޭނުން ކުރުމުގައި ރައްކާތެރިކަން ކަށަވަރުކުރުމުގެ ގޮތުން ދިރާގުން "ނެޓް ޕްރޮޓެކްޓް" ތައާރަފްކޮށްފި އެވެ.

ދިރާގު "ނެޓް ޕްރޮޓެކްޓް" ބޭނުން ކުރުމުން ރައްކާތެރި ނޫން ވެބްސައިޓުތަކާއި ލިންކުތަކުން ރައްކާތެރިކަން ލިބޭނެ އެވެ. އެގޮތުން އަމިއްލަ މައުލޫމާތުތައް ވެބްސައިޓްތަކަށް ދޭ އިރު، އެ ވެބްސައިޓަކީ ރައްކާތެރި ނޫން ވެބްސައިޓެއްނަމަ އެކަން ކަސްޓަމަރަށް އަންގާނެ އެވެ.

މި ހިދުމަތް ތައާރަފް ކުރުމަށް ދިރާގު ހެޑް އޮފީހުގައި މިއަދު ނޫސްވެރިންނަށް މައުލޫމާތު ދެއްވަމުން ދިރާގުގެ ކަސްޓަމާ ވެލިއު މެނޭޖަރު، ބްރޯޑްބޭންޑް އެންޑް ޑިވައިސަސް އަހުމަދު އިޝާން ވިދާޅުވީ މިއީ ސައިބާ ސެކިއުރިޓީއަށް އެޅޭނެ ރަނގަޅު ފިޔަވަޅެއް ކަމަށެވެ.

"އަޅުގަނޑުމެން މަސައްކަތް މި ކުރަނީ ދިރާގުގެ ކަސްޓަމަރުންނަށް އެންމެ ރައްކާތެރިކަމާ އެކު އިންޓަނެޓްގެ ހިދުމަތް ލިބޭނެ ގޮތް ހަދައިދިނުން. މި ހިދުމަތަކީ ކޮންމެ ކަސްޓަމަރަކު ވެސް ދިރާގުގެ މައި އެކައުންޓް ލޮގިންއަށް ވަދެގެން އެކްޓިވޭޓް ކުރެވޭނެ ހިދުމަތެއް." އޭނާ ވިދާޅުވި އެވެ.

މި ހިދުމަތަކީ އިތުރު ސޮފްޓްވެއާއެއް ބޭނުން ނުކޮށް އަދި އިތުރު އެޕްލިކޭޝަނެއް އިންސްޓޯލް ނުކޮށް ކަސްޓަމަރުންނަށް ރައްކާތެރިކަމާ އެކު އިންޓަނެޓް ބޭނުން ކުރެވޭނެ ހިދުމަތެއް ކަމަށާއި އަދި މިއީ ބޭނުން ގޮތަކަށް ކަސްޓަމައިޒް ކުރެވޭނެ ހިދުމަތެއް ކަމަށް އޭނާ ވިދާޅުވި އެވެ.

"ދިރާގު ނެޓް ޕްރޮޓެކްޓް މެދުވެރިކޮށް އެކި ވެބްސައިޓުތައް ފިލްޓާކޮށް ބްލޮކް ކުރެވޭނެ. ވަކި ގަޑިތަކެއްގައި ވަކި ވެބްސައިޓުތަކެއް ބްލޮކްކޮށް، އަންބްލޮކް ވެސް ކުރެވޭނެ. މިއީ ކުޑަކުދިންނަށް ފެންނަން ބޭނުންނުވާ ފަދަ އެކި ވެބްސައިޓުތައް ފިލްޓާކޮށްލަން ބޭނުން ކުރެވޭނެ އެއްޗެއް." އޭނާ ވިދާޅުވި އެވެ.

ދިރާގު ނެޓް ޕްރޮޓެކް ކަސްޓަމައިޒް ކުރެވޭނީ ޕްރޮޓެކްޓް ޕޯޓަލްއިންނެވެ. މި ހިދުމަތް ދިރާގުން ފަށާފައި ވަނީ މޮބައިލް އިންޓަނެޓް އަދި ފިކްސްޑް ބްރޯޑްބޭންޑް ހިދުމަތަށެވެ. މި ހިދުމަތް އެކްޓިވޭޓްކޮށް ބޭނުން ކުރުމަށް މޮބައިލް ކަސްޓަމަރުން މަހަކު 35ރ. ދައްކަން ޖެހެ އެވެ. އަދި ފިކްސްޑް ބްރޯޑްބޭންޑް ކަސްޓަމަރުން މަހަކު 50ރ. ދައްކަން ޖެހެ އެވެ.

މި ހިދުމަތަކީ އެކައުންޓް މައުލޫމާތާއި އަމިއްލަ މައުލޫމާތުތައް ލީކުވުމާއި މުޖުތަމައުއާ ނުގުޅޭ އެކި މަންޒަރުތައް ހިމެނޭ ވެބްސައިޓުތައް ބްލޮކް ކުރުމަށް ބޭނުން ކުރެވޭނެ ހިދުމަތެކެވެ. ދިރާގުން މަސައްކަތް ކުރަމުން ދަނީ އެ ކުންފުނިން ދޭ ހިދުމަތްތަކަކީ ރައްކާތެރި ހިދުމަތްތަކަކަށް ހެދުމަށެވެ.