ތުހުމަތުކުރެވޭ މުވައްޒަފުން މަސައްކަތުން އެކަހެރި ކޮށްފިން: ހޯކްސް

"ދަ ހޯކްސް" ކުންފުނީގެ ތެޔޮ ބޯޓެއްގައި ވަގަށް ސިނގިރޭޓު ރާއްޖެ އަށް އެތެރެކުރުމުގެ ޝާމިލްވި ކަމަށް ތުހުމަތު ކުރެވޭ މުވައްޒަފުން މަސައްކަތުން އެކަހެރިކޮށް، ތަހުގީގީ އިދާރާތަކަށް އެކަން އަންގާފައިވާ ކަމަށް އެ ކުންފުނިން މިއަދު ބުނެފި އެވެ.

ރާއްޖެ އަށް އެންމެ ފުޅާކޮށް ތެޔޮ އެތެރެކޮށް ވިއްކާ ހޯކްސް ކުންފުނީގެ ތެޔޮ ބޯޓު "އެމްޓީ ހޯކްސް ޖަވާހިރު" ގިނަ އަދަދަކަށް ސިނގިރޭޓް އެތެރެކުރަން އުޅޭ ކަމުގެ މައުލޫމާތު މިދިޔަ ހުކުރު ދުވަހުގެ ރޭ ލިބުމުން ހިންގި ހާއްސަ އޮޕަރޭޝަންގައި، ވަގަށް ގެނައި 8،000 އަށް ވުރެ ގިނަ ސިނގިރޭޓް ކާޓަންގެ ޝިޕްމަންޓް ކަަސްޓަމްސް އިން ވަނީ އަތުލައިގަނެފަ އެވެ.

އެ އިދާރާ އިން ރޭ ދަންވަރު 12 ޖަހާކަންހާއިރު ނެރުނު ބަޔާނެއްގައި ބުނީ، އޭރު ވެސް ބަލައިފާސްކުރަމުންދާ ކަމަށާއި އެހާ ހިސާބަށް ވެސް 8،450 ކާޓަންގެ ސިނގިރޭޓް ފެނިފައިވާ ކަމަށެވެ. އެއީ ގާތްގަނޑަކަށް 1.695 މިލިއަން ސިނގިރޭޓް ސްޓިކްސް ކަމަށް އެ އިދާރާ އިން ބުންޏެވެ.

އެ މައްސަލާގައި ހޯކްސް އިން މިއަދު ނެރުނު ބަޔާނެއްގައި ބުނީ، ހުކުރު ދުވަހުގެ ރޭ އެ ކުންފުނީގެ ބޯޓުޔާޑަށް ފުލުހުން ފުރަތަމަ ގޮސް ބަލައި ފާސްކުރީ ކޯޓު އަމުރެއް ނެތި ކަމަށެވެ.

އެ ހާދިސާ ހިނގުމާ ގުޅިގެން ކުންފުނިން އިދާރީ ތަހުގީގެއް ކުރަން ފަށައިފައިވާ ކަމަށާއި ކެމެރާ ފޫޓޭޖްތައް ބެލިބެލުމުން އެ ކުންފުނީގެ މުވައްޒަފުންތަކެއްގެ މައްޗަށް ޣައިރު ގާނޫނީ ހަރަކާތްތަކަކަށް ކުންފުނީގެ މުދާ ބޭނުންކޮށްގެން އަމިއްލަ މަންފާ ނަގަން މަސައްކަތް ކޮށްފައިވާކަމުގެ ތުހުމަތު ކުރެވޭ ކަމަށް ވެސް ހޯކްސް އިން ބުންޏެވެ.

ވަގަށް ސިނގިރޭޓު އެތެރެކުރުމަށް އެ އަމަލުގައި ބައިވެރިވި ހޯކްސް ކުންފުނީގެ ހުރިހާ މުވައްޒަފުން މަސައްކަތުން އެކަހެރި ކޮށްފައިވީ ނަމަވެސް އެއީ ކިތައް މުވައްޒަފުން ކަމެއް ނުބުނެ އެވެ.

"ކުންފުނީގެ މަދު މުވައްޒަފުންތަކެއް ބައިވެރިވެގެން ކުންފުނީގެ މުވައްޒަފުން މެނޭޖްމެންޓާމެދު ކުރި އިތުބާރާއި ޔަގީންކަން ގެއްލޭގޮތަށް ހިންގާފައިވާ މި އަމަލަކީ ކުންފުންޏަށް ލިބުނު ބޮޑު ހައިރާން ކަމެކެވެ،" އެ ބަޔާނުގައިވެ އެވެ.

ރާއްޖޭގެ އެންމެ މަޝްހޫރު އަމިއްލަ ކުންފުނިތަކުގެ ތެރޭގައި ހިމެނޭ ހޯކްސް އިން ބުނީ ތަފާތު 10 ގައުމެއްގެ 900 އަށް ވުރެ ގިނަ މުވައްޒަފުން އެ ކުންފުނީގައި މަސައްކަތްކުރާ ކަމަށެވެ. އަދި ގެންގުޅެނީ ޒީރޯ ޓޮލަރެންސް ސިޔާސަތެއް ކަމަށް ހޯކްސް އިން ބުންޏެވެ.

ހޯކްސް މުދާ ނަހަމަ ގޮތުގައި ބޭނުންކުރުން ހުއްޓުވުމަށް އެތެރޭގެ ކޮންޓްރޯލް ހަރުދަނާ ކުރުމަށް އިތުރު ފިޔަވަޅުތައް ވެސް އަޅާނެ ކަމަށް އެ ކުންފުނީގެ ބަޔާނުގައި ބުންޏެވެ.

ކަސްޓަމުން ރޭ ބުނެފައި ވަނީ އެހާތަނަށް 'ހޯކްސް ބޯޓްޔާޑް' ބަލައިފާސްކުރުމުން، އެ ތަނުގައި ހުރި އެކޮމަޑޭޝަނުންނާއި ވޯކްޝޮޕުން މެންޗެސްޓާ ބްރޭންޑުގެ ސިނގިރޭޓު، 1.695 މިލިއަން ސިނގިރޭޓް ސްޓިކްސް ކަސްޓަމްސް އަށް ފެނިފައިވާ ކަމަށެވެ. އެއީ 8،450 ކާޓަން ނުވަތަ 84،500 ފޮއްޓެވެ.

އެ މައްސަލާގައި ހޯކްސް ކުންފުނީގެ މެނޭޖްމެންޓާ އެއްވެސް ގުޅުމެއް ނޯންނާނެ ކަމަށް އެ ކުންފުނިން ކުރިން ބުނެފައިވާއިރު މިހާރު ވަނީ ބޯޓުގެ ކްރޫންގެ ބަޔާން ވެސް ނަގައިފަ އެވެ. އެ މީހުން އޭގެ ޒިންމާ އަޅުވަނީ ބޯޓުގެ ކެޕްޓަންގެ ބޮލުގައި ކަމަށް އެނގިފައި ވެ އެވެ.

ރާއްޖެ އަށް ގިނަ އަދަދެއްގެ ސިނގިރޭޓް ވަގަށް އެތެރެކުރިކަން މި ފަޅާއެރީ ސިނގިރޭޓާއި ބިޑީގެ އިމްޕޯޓް ޑިއުޓީ އަންނަ މަހުން ފެށިގެން ބޮޑުކުރާ ގޮތަށް ސަރުކާރުން ނިންމާފައި ވަނިކޮށެވެ. ސިނގިރޭޓާއި ބިޑީގެ ވެސް ސްޕެސިފިކް ރޭޓް 3ރ. އިން 8ރ. އަށް ބޮޑުކުރުމަށްޓަކައި މިހާރު ވަނީ ރައްޔިތުންގެ މަޖިލިހަށް ބިލެއް ވެސް ހުށަހަޅައިފަ އެވެ.