އުމްރާއަށް އަގު ހެޔޮ ޕެކޭޖްތައް ތައާރަފްކުރަން މިނިސްޓަރު އެދިވަޑައިގެންފި

ރާއްޖެ އިން ވީހާވެސް ގިނަ ބަޔަކަށް އުމްރާއަށް ދެވޭނެ މަގު ފަހިކޮށްދޭން، އަގުހެޔޮ އުމްރާ ޕެކޭޖްތަކެއް ތައާރަފް ކުރަން އުމްރާ ގްރޫޕްތަކުގައި އިސްލާމިކް މިނިސްޓަރު ޑރ. ޝަހީމް އަލީ މިއަދު އެދިވަޑައިގެންފި އެވެ.

"ހައްޖު އުމްރާ ކޮންފަރަންސް" ފެށުމަށް އިސްލާމިކް މިނިސްޓްރީގައި މިއަދު ބޭއްވި ޖަލްސާގައި ވާހަކަ ދައްކަވަމުން މިނިސްޓަރު ވަނީ އާންމުކޮށް އުމްރާއަށް ގެންދާ ގްރޫޕްތަކަށް ހުށަހެޅުމެއް ހުށަހަޅުއްވައިފަ އެވެ.

އުމްރާއަށް ގެންދިއުމުގައި ނިޒާމީ ބަދަލެއް ގެންނަން ޖެހޭކަން ފާހަގަ ކުރައްވައި މިނިސްޓަރު ވިދާޅުވީ އެއީ މިނިސްޓްރީން ކުރަން ޖެހޭ މަސައްކަތެއް ނޫން ކަމަށެވެ.

"މިހާރު މި އޮންނަނީ ރޯދަ އުމްރާ، ޖެނުއަރީ، ފެބްރުއަރީ އުމްރާ ގޮތަށް. ނިޒާމީ ބަދަލެއް ގެންނަން އެބަ ޖެހޭ. އެއީ އަބަދު ވެސް އުމްރާއަށް ދެވޭނެ ގޮތެއް އޮތުން. ކޮންމެ އިރެއްގައި ވެސް އުމްރާއަށް ދެވޭނެ ގޮތެއް އޮތުން، ކޮންމެ ދުވަހެއްގައި ވެސް އެ މީހަކަށް ފަސޭހަ ދުވަހެއްގައި ދެވޭނެ މަގު ކޮށާފައި ބޭއްވުން،" ޝަހީމް ވިދާޅުވި އެވެ.

މިނިސްޓަރު ވިދާޅުވި ގޮތުގައި މައްކާ އާއި މަދީނާގައި ވެސް ޕެކޭޖް ތަކުގެ އަގު ބޮޑުވަނީ ހަރަމްފުޅާ ކައިރިން ހޮޓަލްތައް ނަގާތީ އެވެ. ހަރަމްފުޅާ ދުރުން ހޮޓަލްތައް ނެގުމުން އުމްރާ ޕެކޭޖުތައް އަގުހެޔޮވާނެ ކަމަށް މިނިސްޓަރު ވިދާޅުވި އެވެ.

ރާއްޖެ އިން އާއްމުކޮށް މިހާރު އުމްރާއަށް ގެންދާ ޕެކޭޖްތަކުގައި، ކޮންމެ މީހަކަށް ނުދެވިދާނެ ކަން ފާހަގަކުރައްވައި މިނިސްޓަރު ވިދާޅުވީ 20،000ރ. އަށް ނުވަތަ 15،000ރ. އަށް ލިބޭ ޕެކޭޖުތަކެއް ތައާރާފް ކޮށްފި ނަމަ ދެވޭނެ މީހުން އުޅޭނެ ކަމަށެވެ.

"އަދި ޒުވާނުންނާއި ދަރިވަރުންނާއި ބެލެނިވެރިންނަށް އެކިއެކި ފަރާތްތަކަށް އަގުހެޔޮ ޕެކޭޖުތައް ތައާރަފް ކުރުން....އަޒީޒިއްޔާގައި ތިބޭ ގޮތަށް ހުޅުވާލާ ޕެކޭޖުތައް އަގުހެޔޮވާނެ. ކޮނޑުގައި ދަބަސް އަޅުވާލައިގެން ބާރުގަދަ ޒުވާނުންނަށް ބަހުގައި ފަސް ނަމާދަށް އާދެވޭނެ. ހުރިހާ ނަމާދަކަށް ހަރަމްފުޅަށް ދެވޭނެ،" ޝަހީމް ވިދާޅުވި އެވެ.

"ދަރިވަރުންނާއި ބެލެނިވެރިންނަށާއި ޒުވާނުންނަށް އަގުހެޔޮ ޕެކޭޖުތައް އަންނަންވީ، މައްކާ އަދި މަދީނާއަށް ދެވޭނެ ފަދަ ގޮތަކަށް."

ހާއްޖާއި އުމްރާ ޕެކޭޖުތައް އަގުބޮޑު ކަމުގެ ޝަކުވާ އަބަދު ވެސް ކުރެ އެވެ. އުމްރާ ޕްކޭޖެއް މިހާރު އުޅެނީ 28،000ރ. އާއި 37،000ރ. ދެމެދު އެވެ.