ވިލާ ކޮލެޖުން އަންނަ ޖެނުއަރީ އިންޓޭކަށް ހުޅުވާލައިފި

ވިލާ ކޮލެޖުގެ ޖެނުއަރީ އިންޓޭކުގައި ފެށުމަށް ހަމަޖެހިފައިވާ ކޯސްތަކުގައި ބައިވެރިވުމުގެ ހުޅުވާލައިފި އެވެ.

މިކަން އިއުލާންކުރަން ބޭއްވި ނޫސްވެރިންގެ ބައްދަލުވުމުގައި އެ ކޮލެޖުގެ ވައިސް ރެކްޓާ ޑރ. އަލީ ނަޖީބު ވިދާޅުވީ ޖެނުއަރީ އިންޓޭކަށް ޑިސެމްބަރު 21 ވަނަ ދުވަހުގެ ނިޔަލަށް ހުށަހެޅުމުގެ ފުރުސަތު އޮންނާނެ ކަމަށެވެ.

އެ ކޮލެޖެހުން ހުޅުވާލީ މާސްޓާސް ފެންވަރުގެ 21 ކޯހަކާއި ޕޯސްޓް ގްރެޖުއޭޓް ޑިޕްލޮމާ އަދި ޕޯސްޓު ޕޯސްޓް ގްރެޖުއޭޓް ސެޓްފިކެޓް ފެންވަރުގެ 26 ކޯހަކާއި ޑިގްރީ ފެންވަރުގެ 48 ކޯހަކާއި ޑިޕްލޮމާ ފެންވަރުގެ 50 ކޯހަކާއި ފައުންޑޭޝަން ފެންވަރުގެ 17 ކޯހަކާއި އަދި ސެޓްފިކެޓް 3 ފެންވަރުގެ 17 ކޯހަކާއި ސެޓްފިކެޓް ލެވެލް ދޭއްގެ ކޯހެކެވެ. މީގެ ތެރޭގައި ވިލާ ކޮލެޖުގެ އަމިއްލަ ޕްރޮގްރާމްތަކާއި ޔޫކޭގެ ޔުނިވާސިޓީ އޮފް ވެސްޓް އިންގްލެންޑުގެ ޕްރޮގްރާމްތަކާއި މެލޭޝިއާގެ ޓޭލާސް ޔުނިވާސިޓީގެ ޕްރޮގްރާމްތައް ހިމެނޭނެ ކަަމަށް ވައިސް ރެކްޓާ ވިދާޅުވި އެވެ.

ޑރ. ނަޖީބު ވިދާޅުވީ އެ ކޮލެޖުގެ ކޯސްތަކަކީ ވަޒީފާގެ މައިދާނަށް ބޭނުންވާނެ ހުނަރުތައް ދަސްކޮށްދޭނެ ކޯސްތަކެއް ކަމަށެވެ.

"އަޅުގަނޑުމެން ކޯސްތައް ކޮންމެ ދާއިރާއަކުން ވެސް ފަރުމާކުރަނީ ވަޒީފާގެ މައިދާނަށް ބޭނުންވާނެ ކަންތައްތައް ހިމަނައިގެން. ދަރިވަރުން ކޯސް ނިންމާފައި ނުކުންނަ އިރު، ވަޒީފާއަށް ނުކުމެ މަސައްކަތް ކުރުމުގެ ގާބިލުކަން ހުންނާނެކަން އަޅުގަނޑުމެން ޔަގީންކުރަން،" ޑރ. ނަޖީބު ވިދާޅުވި އެވެ.

އެ ބައްދަލުވުމުގައި ޑރ. ނަޖީބު ވިދާޅުވީ އެ ކޮލެޖުގެ ފެސިލިޓީތައް ފުޅާކުރަން ކުރަމުން އަންނަ މަސައްކަތްތަކުގެ ދަށުން އެ ކޮލެޖުގައި ސައިކޮލޮޖީއަށް ހާއްސަ ލެބެއް ގާއިމުކުރުމުގެ މަސައްކަތް މިހާރު ކުރަމުން އަންނަ ކަމަށެވެ. އަދި މިހާރު ވެސް ވިލާ ކޮލެޖުގައި ކިޔަވައިނުމުގައި އޮގްމެންޓެޑް ރިއަލިޓީ، ވަރޗުއަލް ރިއަލިޓީ އާއި އެކްސްޓެންޑެޑް ރިއަލީ ފަދަ ޒަމާނީ ވަސީލަތްތައް ފުޅާ ދާއިރާއެއް ބޭނުން ކުރާކަން އޭނާ ފާހަގަކުރެއްވި އެވެ.

އެ ކޮލެޖުން ދަރިވަރުންނަށް ކެރިއާއެއް ހިޔާރުކުރުމުގައި އެހީތެރިވުމުގެ ގޮތުން ހިލޭ ކެރިއާ ގައިޑެންސް ދެމުން އަންނަ ކަމަށް ވެސް ވިދާޅުވި އެވެ.

ޑރ. ނަޖީބު ވިދާޅުވީ އެ ކޮލެޖުން މިހާރު ހުރިހާ ދަރިވަރުންނަށް އަމާޒުކޮށް ސަސްޓެއިނަބިލިޓީ މޮޑިއުލްއެއް ވެސް ތައާރަފްކޮށްފައިވާ ކަމަށެވެ. އަދި މިއީ އެ ކޮލެޖުގައި ކިޔަވާ ކޮންމެ ދަރިވަރަކަށް ވެސް ކިޔެވޭނެ މޮޑިއުލެއް ކަމަށް ވިދާޅުވި އެވެ.

ވިލާ ކޮލެޖަށް ދުނިޔޭގެ ޔުނިވާސީޓިތަކުގެ ފެންވަރު ވަޒަން ކުރާ ސިސްޓަމް، ކިއުއެސް ރޭޓިންގައި އެކްސެލެންސަށް ރޭޓް ކޮށްފައިވާ ހަމައެކަނި ރާއްޖޭގެ އިންސްޓިޓިއުޓެވެ. އެ ކޮލެޖުން ވަނީ ކިއުއެސް ސްޓާ ރޭޓިންގައި ތިން ދާއިރާއަކުން ފައިވް ސްޓާ ރޭޓިން ހޯދާފަ އެވެ. އޭގެތެރޭގައި އެމްޕްލޯޔަބިލިޓީ، އޮންލައި ލާނިން އަދި އެންވަޔަރަމަންޓަލް އިމްޕެކްޓް ހިމެނެ އެވެ.

ވިލާ ކޮލެޖުން ފުރުސަތު ހުޅުވާލާފައިވާ ކޯސްތަކުގެ މައުލޫމާތު އެ ކޮލެޖުގެ ވެސްބައިޓުން ލިބޭނެ އެވެ. އެ ކޮލެޖުގެ ކޯސްތަކަށް ވިލާ ކޮލެޖުގެ ވެބްސައިޓާއި އީމެއިލް މެދުވެރިކޮށް އަދި ކެމްޕަހަށް ގޮސް އެޕްލައިކުރެވޭނެ އެވެ. ވިލާ ކޮލެޖުގެ ވެބްސައިޓުން އެޕްލިކޭޝަންގެ ސްޓޭޓަސް ފެންނަން ހުންނާނެ އެވެ. އަދި ތިން ދުވަހާއި ފަސް ދުވަހުގެ ތެރޭގައި އެޕްލިކޭޝަން ފޯމުގެ ޖަވާބު ލިބޭނެ އެވެ.