އެމްއައިބީ އިން ބޭންކިން ދާއިރާގައި އާ މިސްރާބަކަށް، ރާއްޖެ އަށް މުޅިން އާ ހިދުމަތްތަކެއް

މޯލްޑިވްސް އިސްލާމިކް ބޭންކް (އެމްއައިބީ) އިން ރާއްޖޭގައި ބޭންކިން ދާއިރާ އަށް އާ ހިދުމަތްތަކެއް ރޭ ތައާރަފުކޮށްފި އެވެ.

ގިނަ ބައެއްގެ މެދުގައި މަގުބޫލުކަން ހޯދަމުން އަންނަ އެމްއައިބީ އިން އެ ހިދުމަތްތައް ތައާރަފުކުރީ ހުޅުމާލޭ ސެންޓްރަލް ޕާކުގައި ބޭއްވި ހާއްސަ ރަސްމިއްޔާތެއްގަ އެވެ. ވަރަށް ގިނަ ބަޔަކު ބައިވެރިވި އެ ހަފުލާގައި ވަނީ ބޭންކިން ދާއިރާގެ މުހިންމު ގިނަ ހިދުމަތްތަކެއް ތައާރަފުކޮށްފަ އެވެ.

* ފައިސާ މޮބައިލް އެކްސް މޮބައިލް އެޕް

މިއީ އެމްއައިބީ އިން މިހާރު ގެންގުޅޭ ފައިސާ މޮބައިލްގެ އަޕްގްރޭޑަޑް ވާޝަނެކެވެ. މި އެޕަކީ އެ ބޭންކުގެ އޮންލައިން ބޭންކިން ހިދުމަތްތައް ދޭ ފައިސާ ނެޓުގެ ހުރިހާ ފީޗާތަކެއް ވެސް ހިމެނޭ އެޕެކެވެ. މި އެޕުން ކަސްޓަމަރުންގެ ހުރިހާ އެކައުންޓުތަކެއް މެނޭޖު ކުރެވޭނެ އެވެ. އޭގެ ތެރޭގައި އަމިއްލަ ވިޔަފާރީގެ ކޯޕަރޭޓް އެކައުންޓުތަކާއި ކުޑަކުދިންނަށް ހަދައި ދީފައިވާ އެކައުންޓުތައް ވެސް ހިމެނެ އެވެ.

މި އެޕަށް ފައިސާނެޓް އައިޑީއިން ނުވަތަ އީފާސް ބޭނުން ކޮށްގެން ރަޖިސްޓަރީ ކުރެވޭނެ އެވެ. އަދި ބަޔޯ މެޓްރިކްސްގެ އެހީގައި ޕާސްވޯޑާ ނުލައި ފޭސް ރެކޮގްނިޝަން އިން އެޕަށް ވަދެ ބޭނުން ކުރެވޭނެ އެވެ.

ކަސްޓަމަރުން ބޭނުން ފީޗާއެއް ހޯމް ސްކްރީންގެ ކުއިކް އެކްޝަނަށް އެ އެޕްގައި އެޑް ކުރެވޭނެ އެވެ. އެޕްގައި ހިމެނޭ "ކުއިކް ޓްރާންސްފާ" ފީޗާގެ އެހީގައި އެޕްގައި ސޭވް ކޮށްފައި ހުރި ކޮންމެ ބޭންކެއްގެ އެކައުންޓަކަށް ވެސް ފަސޭހަ އިން ޓްރާންސްފާ ކުރެވޭނެ އެވެ.

މި އެޕުގައި ފައިސާ ނެޓުގައި ހިމެނޭ ހުރިހާ ކޯޕަރޭޓް ފީޗާތަކެއް ހުންނާނެ އެވެ.

މިއީ ރައްކާތެރި، ހަލުވި އެޕެއް ކަމަށް އެމްއައިބީ އިން ބުންޏެވެ. މިއީ އަބަދުވެސް އަޕްޑޭޓުވެ، އިވޯލްވެ، އާ ފީޗާތައް އަޕްގްރޭޑުވޭވެ ހުންނާނެ އެޕެކެވެ.

އެއީ 100 ޕަސެންޓު ދިވެހިންގެ އުފެއްދުމެކެވެ.

* ބިންގާ އެކައުންޓު

މިއީ ކުޑަކުދިންނަށް ހާއްސަ އެޕެކެވެ. ބޭނުމަކީ ކުޑަކުދިންނަށް ފައިސާ ބޭނުންކޮށް، މެނޭޖުކުރަން ދަސްކޮށްދިނުމެވެ. "ބިންގާ" ގެ ނަމުގައި އެމްއައިބީ އިން ތިން ވައްތަރެއްގެ އެކައުންޓު ވަނީ ތައާރަފްކޮށްފަ އެވެ. އޭގެ ތެރޭގައި ހިމެނެނީ:

- ބިންގާ ޓީއާރުއެކްސް: މިއީ އުމުރުން ހަތް އަަހަރުން މަތީގެ ކޮންމެ ކުއްޖަކަށް ވެސް ބެލެނިވެރިން މެދުވެރިވެގެން ހައްދައި ދެވޭނެ އެކައުންޓެކެވެ. މި އެކައުންޓަށް އޮންލައިން ބޭންކިންގެ ހިދުމަތް ލިބޭނެ އެވެ. މިއީ ކުޑަކުދިންނަށް އެ ކުދިންގެ އާއްމު ދިރިއުޅުމަށް ބޭނުންވާ ހަރަދުތައް ކުރުމަށް ޕޮކެޓު މަނީ ދީ، މާލީ ގޮތުން ޒިންމާދާރުކޮށް، ހޭލުންތެރި ކުރުވުމަށް ތައާރަފް ކޮށްފައިވާ އެކައުންޓެކެވެ.

- ބިންގާ ސޭވިންގްސް: މިއީ ކުރުމުއްދަތުގެ އަމާޒުތައް ހާސިލް ކުރުމަށް ހުޅުވާ ސޭވިންގެ އެކައުންޓެކެވެ. އާއިލާގެ މީހެއްގެ އުފަންދުވަހުގެ ހަދިޔާއަކަށް ނުވަތަ އަމިއްލަ އަށް އަގުހުރި އެއްޗެއް ގަތުމަށް ޕޮކެޓް މަނީ ސޭވްކޮށް ހެދޭނެ އެކައުންޓެކެވެ. މިއީ އަމިއްލަ އަށް އަގުހުރި އެއްޗިހި ގަތުމަށް ފައިސާ ރައްކާކުރަން ހިތްވަރު ދިނުމުގެ ގޮތުން ތައާރަފްކުރި އެކައުންޓެކެވެ.

- ބިންގާ އިންވެސްޓް: މިއީ ދިގު މުއްދަތަކަށް ސޭވް ކުރުމަށް ހުޅުވާ އެކައުންޓެކެވެ. ބޭނުމަކީ ކުޑަކުދިންގެ ކުރިމަގަށް ރައްކާކުރަން ބޭނުންވާ ފައިސާ ބެހެެއްޓުމެވެ. މަތީ ތައުލީމަށް ކިޔެވުމަށް ނުވަތަ އެޕާޓްމެންޓެއް ގަތުން ފަދަ ބޮޑެތި ކަންކަމަށް އަމާޒުކޮށް "ބިންގާ އިންވެސްޓް" އެކައުންޓުގައި ފައިސާ ރައްކާ ކުރެވޭނެ އެވެ. މިއީ ކުއްޖާ އަށް އުމުރުން 18 އަހަރުވުމުން އެކްސެސް ލިބޭނެ އެކައުންޓެކެވެ.

ބިންގާގެ ސޭވިންގް އެކައުންޓުތަކަށް ރަނގަޅު ޕްރޮފިޓެއް ލިބޭނެ ކަމަށް އެމްއައިބީ އިން ބުންޏެވެ. އަދި ފައިސާ ރައްކާ ކުރުމަށް ހިތްވަރު ދިނުމަށް، ރިވޯޑާއި ވައުޗަރުތައް ވެސް ދޭނެ ކަމަށް ބުންޏެވެ.

"ބިންގާ"އިން ލިބޭ އެކައުންޓު ނަމްބަރަކީ ކޮންމެ ކުއްޖަކަށް 18 އަހަރު ފުރުމަށް ފަހު ވެސް ބޭނުން ކުރެވޭނެ އެކައުންޓެކެވެ.

"ބިންގާ"ގެ ދަށުން ކުޑަކުދިންނަށް ޑެބިޓު ކާޑާއި އޮންލައިން ބޭންކިންގެ ހިދުމަތް ވެސް ވަނީ ތައާރަފްކޮށްފަ އެވެ.

* "ފައިސާ ވެއާ" އަނގޮޓި

"ފައިސާ ވެއާ"ގެ ނަމުގައި އެމްއައިބީގެ ކަސްޓަމަރުންނަށް ހާއްސަކުރި އަނގޮޓިއަކީ ރާއްޖޭގައި ޕޭމަންޓުތައް ހެދުމަށް ތައާރަފްކުރި އެފަދަ ފުރަތަމަ ޕްރޮޑަކްޓެވެ. މި އަނގޮޓީގައި ހިމެނޭ ޓެކްނޮލޮޖީގެ އެހީގައި ކޭޝް ކާޑު މެޝިންތަކުގައި އަނގޮޓިން ޓެޕް ކޮށްލައިގެން ފައިސާ ދެއްކޭނެ އެވެ.

މިއީ ހުރިހާ މޫސުމަކާ ގުޅޭ، ދަލާއި ފެން ޖެހުނަސް ގެއްލުން ނުވާނެ ގޮތަށް ޑިޒައިން ކޮށްފައިވާ އަނގޮޓި އެކެވެ.

މިއީ ތަރައްގީ ވެފައިވާ ބޮޑެތި ގައުމުތަކުގައި ބޭނުން ކުރަމުންދާ ޓެކްނޮލޮޖީ އެކެވެ.

އެމްއައިބީ އިން ވަނީ މި އަނގޮޓީގެ އެކި ޑިޒައިންތައް ނެރެފަ އެވެ. މިއީ އެކި ސްޓައިލްތަކަށް ފެތޭނެ، ރީތި ސްޓައިލިޝް ޑިޒައިންތައް ހިމެނޭ ކަލެކްޝަނަކާ އެކު ނެރުނު އެއްޗެކެވެ. އެމްއައިބީގެ ކޮންމެ ކަސްޓަމަރަކަށް ވެސް އަނގޮޓި ބޭނުން ކުރެވޭނެ އެވެ. ކޭޝް ކާޑުގެ ބަދަލުގައި މި އަނގޮޓިން އެމްއައިބީގެ ކަސްޓަމަރުންނަށް އެމްއައިބީގެ ކާޑު ބޭނުން ކުރެވޭ ހުރިހާ ތަނަކަށް ފައިސާ ދެއްކޭނެ އެވެ.

އެމްއައިބީ އިން ތަފާތު އިންގިލާބީ ޕްރޮޑަކްޓުތަކެއް ނެރުމަށް ބޭއްވި ހާއްސަ ހަރަކާތް ނިންމާލީ ލައިޓް ޝޯއަކާއި ކުލަ ގަދަ ހަވާގެ ހަރަކާތަކުންނެވެ.