އަޒާން: ފުވައްމުލަކުގެ ރާޅުގަނޑުން ގޮނޑުދޮށަށް ބީއްސާލި ޗެމްޕިއަނެއް

އޯ ލެވެލް އިމްތިހާނުގައި ވެސް އެކަށީގެންވާ ނަތީޖާއެއް ނުހޯދުނެވެ. ސްކޫލުގައި އޭނާ ލައްވާލާނީ އެވްރެޖަށް ވުރެ ވެސް ދަށް ނަތީޖާ ހޯދި ކުއްޖެއްގެ ގޮތުގަ އެވެ. އުޅެއުޅެ ކިޔެވުމުގައި ކުރިއެރުން ހޯދޭ ވަރެއް ނުވި އެވެ. އުމުރުން 17 އަހަރުގެ އަހަރުގެ މުހައްމަދު އަޒާން އަހުމަދު އެ ހިސާބުން ކަނޑައެޅީ ސްކޫލްގެ ހަތަަރު ފާރުތެރޭގައި ނާކާމިޔާބު ކުއްޖަކަށް ވިޔަސް އުމުރުގެ ބާކީ ދުވަސްތަކުގައި ގައުމު ބޭނުންވާ ކަންކަން ކޮށްދިނުމުގެ އަޒުމެވެ.

އެހެންވެ އަޒާން ކުރިއަށް ދާން ބޭނުންވީ، ކުޑައިރުން ފެށިގެން އޭނާ ދެވިހިފައިފައިވާ ރާޅުތަކުގެ މަތީގަ އެވެ. ފުޅިމަދުގަނޑެއްގެ މަތީގައި ފުވައްމުލަކުގެ ރާޅުގަނޑުގައި އޭނާ މުގުރާފައިވާ ރެކޯޑުތައް ހިފައިގެން ދެން ބީއްސާލީ ރާއްޖޭގެ ބޯޑީބޯޑިންގެ އެންމެ މައްޗަށެވެ.

ބޮޑީބޯޑިން ލީގުގެ ލަބަރޭ ޗެލެންޖުގެ ޖޫނިއާ ބައިން އެއްވަނަ ހޯދައި، އަޒާން މިހާރު ހުރީ އެ ކެޓަގަރީގައި އެހެން އެތުލީޓަކަށް އޭނާ އަތުނުލެވޭ ހިސާބުގަ އެވެ.

ސީނިއާ ބައިގައި ވެސް އަހަރަކަށް ފަހު އަހަރެއް ކުރި ހޯދަމުން، ރާއްޖޭގެ ތަޖުރިބާކާރު އެތުލީޓުންނާ އަޒާން ވަދަކުރެ އެވެ. ލަބަރޭ ޗެލެންޖު މުބާރާތުގައި އޯޕަން ބައިގައި އޭނާ ވަނީ މި އަހަރު ތިންވަނަ ހޯދައިފަ އެވެ. މިދިޔަ އަހަރު ދެވަނަ ހޯދި އެވެ. އެކަމަކު އެއީ ފަހަތަށް ވެއްޓުމެއް ކަމަކަށް އޭނާ ގަބޫލެއް ނުކުރެ އެވެ.

"ދަސްވާ ޓެކްނިކްތަކާ ލިބޭ އެކްސްޕީރިއަންސްތަކަށް ބަލާއިރު އަހަރުން އަހަރަށް އިމްޕްރޫވް އެބަ އާދޭ ގައިމު ވެސް،" އަޒާން ބުންޏެވެ.

ރާޅުތަކުގެ މަތީގައި ބަނޑުދަށަށް ފިލާގަނޑެއް ލައިގެން އަޒާން އެންމެ ފުރަތަމަ ނުކުތީ އެކަންޏެވެ. އޭރު އޭނާގެ ފަހަތުގައި އާއިލާ ވެސް ހިތްވަރުދޭކަށް ނެތެވެ. ރާޅާ އަޅާ މީހުންނަކީ "ކަޑަ ބައެއް" ކަމުގެ ވިސްނުމުގައި އޭރު އޭނާގެ އާއިލާގެ މެންބަރުން ވެސް ތިބީ ތާށި ވެފަ އެވެ.

"ފެމެލީ މީހުންނަކަށް ވެސް އަސްލު އޭރު ގަބޫލެއް ނުކުރެވޭ މިއީ ކުރިމަގެއް އޮތް ކަމެއް ކަމަކަށް. އެހެންވެ އޭރު [އާއިލާ] ގަބޫލެއް ނޫން އަޒާން މިކަން ކުރާކަށް ވެސް،" ބޮޑީބޯޑިން މުބާރާތްތަކުގައި 2020 ގައި ވާދަކުރަން ފެށި އަޒާން ބުންޏެވެ.

"އެކަމަކު ފަހުން މުބާރާތްތަކުގައި ވާދަކޮށް ކާމިޔާބު ހޯދަން ފެށީމާ ފެމެލީ އަށް ގަބޫލު ކުރެވިއްޖެ މިއީ ސްކޯޕެއް އޮތް ދާއިރާއެއްކަން."

މިއީ ވެސް އާމްދަނީ ހޯދޭނެ ދާއިރާ އެކެވެ. އަޒާން ބުނީ ކޯސް ހަދައިގެން ކިޔަވައިގެން އާމުދަނީ ހޯދިދާނެ ފުރުސަތުތައް ރާޅާއެޅުމުގައި އެބަ ހުރި ކަމަށެވެ.

"ކޯހެއް ހަދަން އެބަ ވިސްނަން. ކޯހެއް ހަދާނީ ވެސް ހަމަ މީގެ ތެރެއިން. އެއީ ސާފް ގައިޑަކަށް ވާން،" އަޒާން ބުންޏެވެ.

ޓޫރިޒަމް ދާއިރާގައި ސާފް ގައިޑުންގެ ގޮތުގައި މަސައްކަތް ކުރާނެ ގިނަ ފުރުސަތުތަކެއް އެބަހުއްޓެވެ. ރާޅާ އެޅުމުގެ ގިނަ އެތުލީޓުން މިހާރު ވެސް އެކި ރިސޯޓްތަކާއި ޓޫރިޒަމް ދާއިރާގެ އެކި ކުންފުނިތަކުގައި މަސައްކަތް ކުރެ އެވެ. އެ އެތުލީޓުންގެ އާމްދަނީ ގުޅިފައި ވަނީ އެ ދާއިރާއާ އެވެ.

"ރަށުގައި ހުންނައިރު ވެސް މޫދަށް ނުދާ ދުވަހެއް ނޯންނާނެ. ކޮންމެ ދުވަހަކު ވެސް މެންދުރު ފަހުން އެރިފައި އަނެއްކާ އަސުރު ނަމާދަށް އަރާފައި ދެން ހަވީރު ހައެއް ޖަހާއިރު ދެން އަނެއްކާ ވެސް އެރެނީ. އަބަދުވެސް ޕްރެކްޓިސް ކުރުމުގައި އުޅޭނީ،" އަޒާން ބުންޏެވެ.

ރާޅުތަކުގެ ތެރެއަށް އެންމެ ފުރަތަމަ ގޮސް އޭނާ އަށް ކުރެވުނީ ރަނގަޅު ތަޖުރިބާއެއް ނޫނެވެ. އެ ބިރުގައި ޖެހި އޭނާ ދުވަސްގަނޑެއް ވަންދެން މޫދަށް ނޭރި ވެސް ހުއްޓެވެ.

"ރާޅު ބޮޑު ދުވަހެއްގައި ހަތަރު ފޫޓުގެ ބޯޑެއްގެ މަތީގައި ފިންސެއް ނުލައި ރާޅާ އަޅަނިކޮށް ގެނބިގެން ދިޔައީ. އެ ދުވަހު ވަރަށް ބިރުގަތް. ދުވަސްގަނޑެއް ވަންދެން ހުރިން ރާޅަށް ނުގޮސް ވެސް،" އަޒާން ކިޔައި ދިނެވެ.

އެކަމަކު ފަހުން އެ ބިރު ފިލައި އަލުން ރާޅާ އަޅަން ނުކުތް ގޮތަކަށް އޭނާ ހުއްޓައެއް ނުލަ އެވެ. ކުރު އަދި ދިގު މުއްދަތުގެ އަމާޒުތައް ހާސިލުކުރުމުގެ އަޒުމު އޭނާ ވަނީ ކަނޑައަޅައިފަ އެވެ.

ކޮންމެ ކުޅިވަރެއްގެ އެތުލީޓެއް ކަމަށް ވިޔަސް އަނެއް ހަރުފަތަށް ދާން ރާއްޖެ އިން ބޭރުގެ ފުރުސަތުތައް މުހިންމު ކަމަށް އަޒާން ބުންޏެވެ. އެހެންވެ، އޭނާ ހުރީ ބޭރުގައި ތަމްރީނު ވުމުގެ ފުރުސަތެއްގެ އިންތިޒާރުގަ އެވެ. ދެން އޮތީ ރާއްޖޭގައި ބާއްވާ ބައިނަލްއަގްވާމީ މުބާރާތް މޯލްޑިވްސް ޕްރޯގެ ޖޫނިއާ ކެޓަގަރީ މެޑައްޔެއް ހޯދުމުގެ އަމާޒެވެ.

"އަބަދުވެސް ބޭނުންވޭ އަޅުގަނޑުގެ ފަރާތުން ރާއްޖެ އަށް ކަމެއް ކޮށްދޭން. އެ އުއްމީދު އޮވޭ،" އަޒާން ބުންޏެވެ.

ބައިނަލްއަގްވާމީ މުބާރާތެއް ކާމިޔާބުކޮށް ދިނުމަކީ އޭނާގެ އެންމެ ބޮޑު އުއްމީދެވެ. ފުވައްމުލަކުގެ ރާޅުގަނޑުގެ ހުދު ފޮނުތަކުން އޭނާ ޖަރީ ކުރުވި ހުވަފެނަކީ އެއީ އެވެ. އަޒާންގެ ކުރިމަގު އަދި އޮތީ އެވެ. ބޭރު ގައުމުތަކަށް ގޮސް ތަމްރީނު ހޯދައި ރާއްޖޭގައި އެންމެ އުހަށް ދެވޭނެ ކަމާ މެދު ސުވާލެއް ނެތެވެ.