ލަންކާގެ އިންތިހާބީ ޝަކުވާތަކާ ގުޅިގެން 190 މީހަކު ހައްޔަރުކޮށްފި، ހަ ކެންޑިޑޭޓަކު ވެސް ހިމެނޭ

އަންނަ ހަފުތާގައި ސްރީ ލަންކާގައި ބާއްވާ އާންމު އިންތިހާބާ ގުޅޭ އެކި ކަންކަމުގައި ލިބިފައިވާ ޝަކުވާތަކާ ގުޅިގެން މިހާތަނަށް 190 މީހަކު ހައްޔަރުކޮށްފައިވާ ކަމަށާއި އޭގެ ތެރޭގައި ހަ ކެންޑިޑޭޓަކު ވެސް ހިމެނޭ ކަމަށް އެ ގައުމުގެ ފުލުހުން ބުނެފި އެވެ.

މި މަހުގެ 14 ވަނަ ދުވަހަށް އިންތިހާބު ތާވަލްކޮށްފައި ވާއިރު ފުލުހުން ބުނީ އިންތިހާބާ ގުޅޭ ގޮތުން ހިންގާފައިވާ ކަމަށް ބުނާ މަނާ ކަންކަމާ ގުޅޭ 168 ޝަކުވާއެއް ލިބިފައިވާ ކަމަށެވެ.

"މީގެ ތެރޭގައި ޖިނާއީ ކުށާ ގުޅޭ 30 މައްސަލައަކާއި އިންތިހާބުތަކާ ބެހޭ ގާނޫނާ ހިލާފްވި ކަމަށް ބުނެ ހުށަހަޅާފައިވާ 138 މައްސަލައެއް ހިމެނޭ،" ލަންކާގެ ފުލުހުންގެ ތަރުޖަމާނު ޑެޕިއުޓީ އިންސްޕެކްޓަ ޖެނެރަލް ނިހާލް ތަލްދުވާއާ ހަވާލާދީ ނިއުސް ފަސްޓް ނޫހުން ބުނެފައިވެ އެވެ.

"ހައްޔަރުކުރި 191 މީހުންގެ ތެރޭގައި، އަންނަ ހަފްތާގައި ބާއްވާ އިންތިހާބުގައި ވާދަކުރާ ހަ ކެންޑިޑޭޓަކު ވެސް ހިމެނޭ."

ހުށަހަޅާފައިވާ މައްސަލަތަކާ ގުޅިގެން 45 ވެހިކަލެއް ވެސް ފުލުހުންގެ ބެލުމުގެ ދަށަށް ގެންގޮސްފައިވާ ކަމަށް ތަރުޖަމާނު ވިދާޅުވި އެވެ.

އިލެކްޝަން ކޮމިޝަނުން ބުނެފައިވާ ގޮތުގައި އެ އިދާރާއަށް ވަނީ އިންތިހާބާ ގުޅޭ ގޮތުން 1،259 ޝަކުވާއެއް ލިބިފަ އެވެ. މީގެ ތެރެއިން 13 މައްސަލައަކީ ހަމަނުޖެހުން ހިންގުމާ ގުޅޭ ގޮތުން ހުރި މައްސަލަތައް ކަމަށް ނޫހުގައިވެ އެވެ.

ލަންކާގެ ގާނޫނު ހަދާ މަޖިލީހުގެ އިންތިހާބު މި ބާއްވަނީ މިދިޔަ ސެޕްޓެމްބަރު މަހުގެ ރިޔާސީ އިންތިހާބަށް ފަހުގަ އެވެ. އެ އިންތިހާބުގައި ވަނީ ސިޔާސީ މައިދާނުގެ ނުފޫޒުގަދަ ބޭފުޅުންނަށް ނާކާމިޔާބީއާ ކުރިމަތިވެ ވަޑައިގެންފަ އެވެ. އިންތިހާބު ކާމިޔާބުކުރެއްވީ އަނޫރާ ކުމާރާ ޑިސެނަޔަކަ އެވެ. އުމުރުން 55 އަހަރުގެ އަނޫރާއަކީ، ލަންކާގެ ރައީސްކަމަށް ވަޑައިގެންނެވި ވާތުފިޔައިގެ ފުރަތަމަ ސިޔާސީ ލީޑަރެވެ.