ޓީމު ނަގާއިރު ދަރިފުޅަށް ވީތީ އިސްކަމެއް ނުދެން: ސިމިއޯނީ

މެޑްރިޑް (ނޮވެމްބަރު 4) – އެތުލެޓިކޯ މެޑްރިޑްގެ ޓީމުގައި އޭނާގެ ދަރިފުޅު ޖޫލިއާނޯ ސިމިއޯނީ އަށް ވަކި އިސްކަމެއް ނުދޭކަމަށް، އެ ޓީމުގެ ކޯޗު ޑިއޭގޯ ސިމިއޯނީ ބުނެފި އެވެ.

ލަސްޕަލަމްސްއާ ދެކޮޅަށް، އެތުލެޓިކޯއިން ރޭ ކުޅުނު މެޗުގައި ޖޫލިއާނޯ ވަނީ ކުޅެފަ އެވެ. އަދި އުމުރުން 21 އަހަރުގެ ފޯވާޑް ވަނީ އޭނާގެ ބައްޕަ ވެސް ކުރިން ކުޅުނު ޓީމަށް އޭނާގެ ފުރަތަމަ ލަނޑު ޖަހައި ދީފަ އެވެ.

އަމިއްލަ ދަނޑުގައި ކުޅެ 2-0 ން މޮޅުވި މެޗުގައި އެތުލެޓިކޯ އަށް ލީޑް ނަގައި ދިނީ ޖޫލިއާނޯ އެވެ. އަނެއް ލަނޑު ޖެހީ އެލެގްޒެންޑާ ސޯލޮތު އެވެ.

މެޗަށް ފަހު ކޯޗު ސިމިއޯނީ ވަނީ އޭނާގެ ދަރިފުޅަށް ވަރަށް ބޮޑަށް ތައުރީފު ކޮށްފަ އެވެ. އެކަމަކު އޭނާގެ ދަރިފުޅަށް ވީތީ ދޭނެ ވަކި އިސްކަމެއް ނެތް ކަމަށް އާޖެންޓީނާގެ ކޯޗު ބުންޏެވެ.

"އޭނާ ދަނީ ވަރަށް ރަނގަޅަށް މަސައްކަތް ކުރަމުން. ފަރިތަކުރުންތައް ރަނގަޅަށް ކުރިއަށް ގެންދޭ. އެއީ އޭނާގެ ކުރިއެރުމަށް ވަރަށް މުހިންމު ކަމެއް. ހިތްތިރިކަމާ އެކު އޭނާ މަސައްކަތް ކުރަމުންދާނަމަ އޭނާ ހިތް އެކަމަށް މަހުދައްކާނެ،" ސިމިއޯނީ ބުންޏެވެ.

ސިމިއޯނީ ބުނީ އޭނާ ދަރިފުޅަށް ވެސް ފުރުސަތު ދޭން ނިންމީ، އެހެން ކުޅުންތެރިންނެކޭ ވެސް އެއްގޮތަށް ކަމަށެވެ. އެއީ އެކަމަށް ހައްގުވާކަން އޭނާ ސާބިތުކޮށް ދިނުމުން ކަމަށް، ސިމިއޯނީ ބުންޏެވެ. ލޯނު އުސޫލުން މިދިޔަ ސީޒަނުގައި އޭނާ ހޭދަ ކުރީ ޑިޕޯޓިވޯ އަލަވޭޒްގަ އެވެ.

"ޖޫލިއާނޯ އަހަންނަށް ފެންނަނީ އެހެން ކުޅުންތެރިންނެކޭ އެއްގޮތަށް. އޭނާ ޓީމުގައި މަޑުކުރަން އަހަރެމެން ނިންމީ ހަމަ އެހެން ކުޅުންތެރިންނާ މެދު ނިންމާ ގޮތަށް. އަހަރެމެންނަށް ފެނުނީ މި ޓީމަށް އެހީވާން އޭނާ އަށް ދައުރެއް އަދާކުރެވޭނެ ކަމަށް،" ސިމިއޯނީ ބުންޏެވެ.

"އަހަރެން ވިސްނަނީ ހަމައެކަނި ޓީމާ މެދު. އެހެން މީހަކާ މެދު ނޫނީ އެހެން ކަމަކާ މެދަކު ވެސް ނޫން. އަހަރެންގެ ދަރިފުޅަށް ވިޔަސް އެ ތަފާތު ކުރުމެއް ނޯންނާނެ. ދަނޑުގައި ކުރަން ޖެހޭ ކަންތައް އޭނާ އެ ކުރީ. އެހެންވެ އެތުލެޓިކޯގައި އޭނާ އެ ހުރީ."

ޖޫލިއާނޯ އުފަންވީ، 2002 ގައި އިޓަލީގެ ރޯމްއަށެވެ. އޭރު އޭނާގެ ބައްޕަ ކުޅެމުން ދިޔައީ ލާޒިއޯ އަށެވެ. އެތުލެޓިކޯގެ އެކަޑަމީ އަށް އޭނާ ބަދަލުވީ 2019 ގައެވެ.

މެޗުން މޮޅު އެތުލެޓިކޯ އޮތީ ބާސެލޯނާ އާއި ރެއާލް މެޑްރިޑްގެ ފަހަތުން ތިންވަނައިގަ އެވެ. އެއްވަނައިގައި އޮތް ބާސާއިން ރޭ އެސްޕަންޔޯލްއާ ދެކޮޅަށް ކުޅުނު މެޗު ކާމިޔާބު ކުރީ 3-1 ންނެވެ.