މިއީ 130 އަހަރު ތެރޭ އޮކްޓޯބަރު މަހެއްގައި ފުޖީ ފަރުބަދާގައި ސްނޯ ނެތް ފުރަތަމަ ފަހަރު

މިދިޔަ 130 އަހަރު ތެރޭގައި އޮކްޓޯބަރު މަހެއްގައި ޖަޕާނުގެ ފުޖީ ފަރުބަދާގައި ސްނޯ ނެތް ފުރަތަމަ ފަހަރަށް މި އަހަރު ވެއްޖެ އެވެ.

ޖަޕާނުގެ އެންމެ އުސް ފަރުބަދަ، ފުޖީއަށް އާންމު ގޮތެއްގައި ކޮންމެ އަހަރަކު ވެސް އޮކްޓޯބަރު މަހުގެ ކުރީކޮޅުގައި ކޮންމެވެސް ވަރަކަށް ސްނޯ ފައިބަ އެވެ. އެކަމަކު، މި އަހަރުގެ ހޫނު މޫސުން ދިގުލައިގެން ދިއުމުގެ ސަބަބުން މިދިޔަ މަސް ނިމުނީ އެ ފަރުބަދައަށް އެއްވެސް ވަރަކަށް ސްނޯ ނުވެހި އެވެ.

އޭއެފްޕީން ބުނި ގޮތުގައި، މިދިޔަ އަހަރު އެ ފަރުބަދައަށް ސްނޯ ފައިބަން ފެށީ އޮކްޓޯބަރު މަހު ފަހެއްގަ އެވެ.

މިއީ ޖަޕާނަށް ރެކޯޑް މިންވަރަކަށް ހޫނު ގަދަވި ވެސް އަހަރެކެވެ. މިދިޔަ ޖޫން މަހުން ފެށިގެން އޮގަސްޓް މަހުގެ ނިޔަލަށް ބައެއް ދުވަސްތަކުގައި ޖަޕާނުގެ ހޫނުމިން އެވްރެޖު ފިނިހޫނުމިނަށް ވުރެ 1.76 ޑިގްރީ ސެލްސިއަސް މަތިވެފައިވެ އެވެ. ހޫނު މޫސުމުގައި އެ ގައުމުގެ އެވްރެޖު ފިނިހޫނުމިން ހުންނަނީ 16-30 ޑިގްރީ ސެލްސިއަސްއާ ދެމެދުގަ އެވެ.

ޖަޕާނުގެ މޫސުމާ ބެހޭ އިދާރާ އިން ބުނި ގޮތުގައި، މި އަހަރު ގިނަ ދުވަސްތަކުގައި ހޫނުމިން ހުރީ އެވްރެޖުކޮށް 32 ޑިގްރީ ސެލްސިއަސްގަ އެވެ. އަދި ބައެއް ދުވަސް ދުވަހު 35 ޑިގްރީ ސެލްސިއަސް އަށް ވެސް ހޫނުމިން މަތިވެފައިވެ އެވެ.

މިދިޔަ ސެޕްޓެމްބަރު މަހު ވެސް ޖަޕާނަށް ވަރަށް ބޮޑަށް ހޫނުގަދަވި އެވެ. އޭގެ އެންމެ ބޮޑު އެއް ސަބަބަކީ ސަބް ޓްރޮޕިކަލް ޖެޓް ސްޓްރީމް ދުނިޔޭގެ އިރަށް މާ ބޮޑަށް ޖެހިފައި އޮތުމުން ޖަޕާނު އޮންނަ ސަރަހައްދަށް ހޫނުވައި ދައުރުވުން އިތުރުވުމެވެ. -- ޖެޓް ސްޓްރީމަކީ ދުނިޔޭގެ އިރުން ދެކުނަށް ވަރަށް ބާރަށް، ވައި ދައުރުވާ ދައުރުވުމެވެ. މި ވައި ޖެހެނީ ދުނިޔޭގެ ދެކުނު ބިތުން އަންނަ ހޫނު ވަޔާއި އުތުރު ބިތުން އަންނަ ފިނި ވައި އެކުވެގެންނެވެ.

ސްނޯ ފައިބަން ފަށަނީ ފިނިހޫނުމިން ސުމަކަށް ނުވަތަ ސުމަކަށް ވުރެ ދަށަށް ދިއުމުންނެވެ. ނަމަވެސް، އެކްޓޯބަރު މަސް ނިމުނުއިރު، ސުމަކާ ކައިރިއަށް ވެސް ޖަޕާނުގެ ފިނިހޫނުމިން ދަށްވެފައި ނުވެ އެވެ.

ޖަޕާނުގެ މޫސުމީ ރެކޯޑުތައް ދައްކާ ގޮތުގައި، މީގެ ކުރިން ވެސް މި ހާލަތު އައިސްވެފައިވެ އެވެ. އެއީ 1894 ވަނަ އަހަރު އެވެ. އަދި 1955 ވަނަ އަހަރާއި 2016 ވަނަ އަހަރު ވެސް އެ ފަރުބަދައަށް ސްނޯ ފޭބީ ވަރަށް ލަހުންނެވެ. އެއީ، އޮކްޓޯބަރު 25 ގަ އެވެ.

އުސްމިނުގައި 3،776 މީޓަރު ހުންނަ ފުޖީއަކީ ޖަޕާނުގެ އެންމެ އުސް ފަރުބަދަ އެވެ. މިދިޔަ އަހަރުގެ ޖުލައި މަހާއި ސެޕްޓެމްބަރު މަހާ ދެމެދުގައި 220،000 އަށް ވުރެ ގިނަ މީހުން ވަނީ އެ ފަރުބަދައިގެ އެންމެ އުހަށް އަރައިފަ އެވެ.