އޭސީސީ އާއި އީސީގެ ރައީސާއި ނައިބު ރައީސް ކަނޑައެޅުމުގެ ބާރު ރައީސަށް ދޭ ބިލް ބަލައިގެންފި

އެންޓި ކޮރަޕްޝަން ކޮމިޝަން (އޭސީސީ) އާއި އިލެކްޝަންސް ކޮމިޝަން (އީސީ) ގެ ރައީސް އާއި ނައިބު ރައީސް ކަނޑައެޅުމުގެ ބާރު ރައީސަށް ލިބިވަޑައިގަންނަވާ ގޮތަށް އެ ދެ ކޮމިޝަނާ ބެހޭ ގާނޫނުތަކަށް ސަރުކާރުން ހުށަހެޅި އިސްލާހުތައް ރައްޔިތުންގެ މަޖިލީހުން މިއަދު ބަލައިގެންފި އެވެ.

ސަރުކާރުގެ ފަރާތުން ހުށަހެޅި އެ ދެ ބިލު ބަލައިގަންނަން ފެންނަ ކަމަށް މަޖިލީހުގެ މިއަދު ޖަލްސާގައި 60 މެންބަރުން ވޯޓު ދެއްވި އެވެ. އޭސީސީގެ ގާނޫނަށް އެ އިސްލާހު ގެންނަން ނުފެންނަ ކަމަށް ފަސް މެންބަރުން ވޯޓު ދެއްވިއިރު އީސީގެ ގާނޫނަށް އެ އިސްލާހު ގެންނަން ނުފެންނަ ކަމަށް ހަ މެންބަރުން ވޯޓު ދެއްވި އެވެ.

އެހެންވެ އެ ބިލު ބަލައިގަންނަން ފާސްވި ކަމަށް ކަނޑައަޅައި، ރިޔާސަތުން ވަނީ އެ މައްސަލަތައް ދިރާސާ ކުރަން މަޖިލީހުގެ މިނިވަން މުއައްސަސާތަކާ ބެހޭ ކޮމިޓީ އަށް ފޮނުވައިފަ އެވެ.

އޭސީސީގެ ގާނޫނާއި އީސީގެ ގާނޫނުގައި މީގެ ކުރިން އޮންނަ ގޮތުން އެ ދެ ކޮމިޝަންގެ ރައީސް އާއި ނައިބު ރައީސް ކަނޑައަޅާނީ އެ ކޮމިޝަންތަކުގެ މެންބަރުންގެ ތެރޭގައި ނަގާ ވޯޓަކުންނެވެ.

ނަމަވެސް ސަރުކާރުގެ ފަރާތުން އެ ދެ ގާނޫނަށް ހުށަހަޅާފައިވާ އިސްލާހުގައިވާ ގޮތުން އޭސީސީ އާއި އީސީގެ ރައީސާއި ނައިބު ރައީސް ކަނޑައަޅާނީ ރައީސް އެވެ. އަދި އެ ފަރާތެއްގެ ނަން ފާސް ކުރަން މަޖިލީހަށް ފޮނުވައި، މަޖިލީހުން ފާސް ކުރަން ޖެހޭނެ ކަމަށް އެ ދެ ބިލުގައި ބުނެފައިވެ އެވެ.

އެ ބިލާ ގުޅިގެން މިނިވަން މުއައްސަސާތަކަށް ސަރުކާރުން ނުފޫޒު ފޯރުވުމުގެ މައްސަލަތައް އިތުރުވެގެން ދާނެ ކަމަށް ވިދާޅުވެ، އިދިކޮޅު އެމްޑީޕީގެ މެންބަރުންގެ ފާޑު ކިޔުން ވަރަށް ބޮޑަށް އަމާޒުވި އެވެ. ނަމަވެސް ސަރުކާރަށް ތާއީދު ކުރައްވާ ޕީއެންސީގެ މެންބަރުން ވިދާޅުވީ އެ ކޮމިޝަންތައް މިހާރު ވެސް ނުހިނގާ ކަމަށާއި އެ ކޮމިޝަންތައް އިތުރަށް ހަރުދަނާ ކުރުމަށް އެއީ މުހިންމު ފިޔަވަޅެއް ކަމަށެވެ.