މައްސަލަ ބޮޑުވެފައިވާ ނޫސްވެރިކަމުގެ އިނާމުގެ މާކްސްތައް އެމްއެމްސީން އާންމުކޮށްފި

މޯލްޑިވްސް މީޑިއާ ކައުންސިލް (އެމްއެމްސީ) އިން ބޭއްވި މިދިޔަ އަހަރުގެ ނޫސްވެރިކަމުގެ އިނާމުގެ ފަނޑިޔާރުންގެ މާކްސްތައް އެ އިދާރާ އިން ރޭ އާންމުކޮށްފި އެވެ.

އެމްއެމްސީން ވަނީ އެކި ދާއިރާތަކުން ފަނޑިޔާރުން ނޫސްވެރިންގެ އުފެއްދުންތަކަށް ދީފައިވާ މާކްސްތަކުގެ ތަފްސީލް ފެންނަ ޝީޓަކާއި ފަނޑިޔާރުންގެ ރިޕޯޓް ވެސް އާންމުކޮށްފަ އެވެ.

މިދިޔަ އަހަރު ނޫސްވެރިން ކޮށްފައިވާ މަސަައްކަތަށް ދިން މާކްސްގެ ތަފުސީލްތައް އެމްއެމްސީން މި އާންމުކުރީ، އެ މާކްސްތަކާ މެދު ސުވާލު އުފެދޭ ގޮތަށް އިނާމަށް އިންސާފު ކޮށްދިން ފަނޑިޔާރުންނާއި ބައެއް ނޫސްވެރިން ވެސް ވާހަކަތައް ދައްކަމުންދާ ދަނޑިވަޅެއްގަ އެވެ.

ހާއްސަކޮށް ބޮޑަށް މައްސަލަ ދިމާވީ އޯޑިއޯ/ވީޑިއޯ ކެޓަގަރީގެ ތަހުގީގީ ނޫސްވެރިކަމުގެ އިނާމު "އަދަދު" އޮންލައިނަށް ދިނީ އުސޫލުތަކާއި މަގުސަދުތަކާ ހިލާފަށް ކަމަށް ފަނޑިޔާރުން ބުނެފައިވާތީ އެވެ.

ތަހުގީގީ ދާއިރާއިން ނޫސްވެރިކަމުގެ އިނާމު ލިބުނީ "އަދަދު" އޮންލައިންގެ "ސްކީލާން" ޑޮކިއުމެންޓްރީއަށެވެ. އެއީ ރައީސް ޑރ. މުހައްމަދު މުއިއްޒުގެ ދޮންމަންމާފުޅު ސްކީލާން އެ މަނިކުފާނަށް ބޮޑެތި ތުހުމަތެއް ކުރައްވާފައިވާ ޑޮކިއުމަންޓްރީއެކެވެ.

މިދިޔަ އަހަރުގެ ރިޔާސީ އިންތިހާބުގެ ކެމްޕެއިން ތެރޭގައި ނެރުނު އެ ޑޮކިއުމެންޓްރީގައި ކުރާ ތުހުމަތުތައް ރައީސް މުއިއްޒުގެ ފަރާތްޕުޅުން އޭރު ވެސް ވަނީ ދޮގު ކުރައްވައިފަ އެވެ. ރައީސްގެ ފަރާތްޕުޅުން ވިދާޅުވެފައި ވަނީ އެއީ ހަގީގަތާ ހިލާފު ވާހަކަތަކެއް ހިމެނޭ ވީޑިއޯއެއް ކަމަށެވެ.

އެކަމަކު، އެމްއެމްސީން ރޭ ނެރުނު މާކްސް ޝީޓުން އެނގޭ ގޮތުގައި އޯޑިއޯ/ވީޑިއޯ ކެޓަގަރީގެ ތަހުގީގީ ނޫސްވެރިކަމުގެ އިނާމަށް ހުށަހެޅި ހަމައެކަނި ޑޮކިއުމެންޓްރީ "ސްކީލާން" ފަނޑިޔާރުން ބަލައިގަނެ ވަނީ މާކްސް ދީފަ އެވެ. އެންމެ މޮޅު ޑޮކިއުމެންޓްރީއަކަށް އެ ހޮވުނީ 69.47 މާކްސްއާ އެކު އެވެ، އެ އިނާމް ދިނުމުގެ އުސޫލުގައިވާ ގޮތުން އެ ކެޓަގަރީއަކުން އެވޯޑް ލިބޭނީ 65 ޕަސެންޓަށް ވުރެ މަތިން އެންމެ ގިނައިން މާކްސް ލިބޭ އުފެއްދުމަށެވެ.

"ސްކީލާން" ޑޮކިއުމެންޓްރީގެ ފަނޑިޔާރުންނަކީ ޝަމްއާން ޝާކިރާއި އަބްދުﷲ އަޒްމީން އަދި އަޝްވާ އެވެ.

އެމްއެމްސީން ކުރިން ނެރުނު ބަޔާނެއްގައި ބުނީ އެއްވެސް ދާއިރާއަކުން އެވޯޑް ދިނުމުގައި އިނާމު ދިނުމުގެ އުސޫލާ ޚިލާފަށް އެއްވެސް ކަމެއް އެ އިދާރާ އިން ކޮށްފައި ނުވާނެ ކަމުގެ ޔަގީންކަން ދޭ ކަމަށެވެ. ފަނޑިޔާރުން ނެރެފައިވާ ބަޔާނުގައި ނޫސްވެރިކަމުގެ އިނާމުގެ އިންސާފުވެރިކަމާއި ކައުންސިލްގެ މިނިވަންކަމާ މެދު ދައްކާފައި ވަނީ ހަގީގަތާ ޚިލާފު ބޮޑެތި ތުހުމަތުތަކެއް ކަމަށް އެމްއެމްސީން ބުންޏެވެ.

އޯޑިއޯ/ވީޑިއޯ ކެޓަގަރީގެ ތަހުގީގީ ދާއިރާއިން ނޫސްވެރިކަމުގެ އިނާމު ލިބުނު "ސްކީލާން" ޑޮކިއުމެންޓްރީއަށް އެވޯޑް ދިނީ އުސޫލާ ހިލާފަށް ކަމަށް ފަނޑިޔާރުންގެ ޕެނަލުންނާއި ކައުންސިލްގެ ރައީސް އަހުމަދު މުސްތަފާ ވިދާޅުވެފައިވެ އެވެ.

އެމްއެމްސީން ބުނީ އިނާމު ދިނުމުގެ ހަފުލާގައި އެވޯޑްތައް ހަވާލުކުރުމާ ހަމައަށް ފަނޑިޔާރުންގެ ފަރާތުން އެއްވެސް ކަންބޮޑުވުމެއް އަދި ޝަކުވާއެއް ކައުންސިލަށް ލިބިފައި ނުވާ ކަމަށެވެ. ޑޮކިމެންޓްރީއާ މެދު އެއްވެސް ސުވާލެއް އުފައްދައި ފަނޑިޔާރުންގެ ފަރާތުން އެއްވެސް ކަމެއް ކައުންސިލަށް ހުށަހަޅާފައި ނުވާ ކަމަށް ވެސް ބުނެފައިވެ އެވެ.

"އިނާމަށް ހުށަހެޅި ހުށަހެޅުންތަކާ މެދު އެއްވެސް ގޮތެއް ނިންމަން ކައުންސިލާ މަޝްވަރާކުރާކަށް ނުޖެހޭނެ. އެކަން ނިންމުމުގެ ބާރު ހަމައެކަނި ލިބިގެންވަނީ ފަނޑިޔާރުންނަށް،" އެމްއެމްސީން ބުންޏެވެ.

"އޯޑިއޯ ވީޑިއޯ ކެޓަގަރީން ތަހުގީގީ ނޫސްވެރިކަމުގެ ދާއިރާގެ ރުބްރިކްގައި ތަހުގީގީ ނަޒަރަކުން އެ އުފެއްދުމަށް އިންސާފުކުރަން ހަނިކޮށްފައިވާ ކަމަށް ފަނޑިޔާރުން ނެރެފައިވާ ކަމަށް ބުނާ ލިޔުމުގައި ފާހަގަކޮށްފައިވާއިރު، އެފަދަ ކަންބޮޑުވުމެއް ފަނޑިޔާރުންގެ ފަރާތުން ކައުންސިލާ ހިއްސާ ކޮށްފައެއް ނުވޭ."