ޝަނާ: ލިޔަން ޖެހިލުމެއް ނުވާނެ، ނަތީޖާ ނެރޭނެ

އެމްއެމްސީ އެވޯޑްސް ނައިޓްގައި ރޭގައި އެންމެ ބޮޑު އުފަލެއް ލިބޭނެ އެއް ތަރިއަކީ ޔަގީނުން ވެސް "މިހާރު"ގެ ފާތިމަތު ޝަނާ މުހައްމަދެވެ. މިދިޔަ އަހަރުގެ އެންމެ މޮޅު ނޫސްވެރިޔާގެ ފަހުރުވެރި އެވޯޑް ލިބުނުތާ ވާނީ މަދު ވަގުތު ކޮޅެކެވެ. ހުޅުމާލޭގައި ދިރިއުޅެމުން އަންނަ ޝަނާ ރޭގެ ދަންވަރު 12:30 ވާން އުޅެނިކޮށް އެ ނައްޓާލީ ރައްޔިތުންގެ މަޖިލިހަށް މިއަދު ހުށަހަޅަން ތައްޔާރުވާ ދައުލަތުގެ ބަޖެޓުގެ ކުރިން ފިނޭންސް މިނިސްޓްރީގައި ބޭއްވި ބްރީފިންއަށެވެ.

އެއީ ޝަނާ އެވެ. "މިހާރު"ގެ ބިޒްނަސް ޑެސްކުގެ ހެޑެވެ. ފަސްޖެހުމެއް ނެތި، ކޮންމެ ވަގުތެއްގައި ވެސް ނޫސްވެރިކަމުގެ މަސައްކަތެއް ނަމަ ޝަނާ ހުންނާނީ އެ ކަމަކަށް ތައްޔާރަށެވެ. ވަކި ދަންވަރެއް ނުކިޔަމާ ހިނގާށެވެ. އެއީ، އަހަރެމެންނަށް ކޮންމެ ދުވަހަކު ޝަނާގެ ފަރާތުން ފެންނަ ކަންކަމެވެ. ޝަނާގެ ދާއިރާގައި އޭނާއަކީ މަސައްކަތުގެ ނަތީޖާ ނެރެދޭ، ހީވާގި ނޫސްވެރިއެކެވެ. "މިހާރު" ގައި އޭނާ ހޭދަކުރި މުއްދަތުގައި އެ އޮންލައިނާއި ނޫހުގެ ކިޔުންތެރިންނަށް ވަރަށް ޝައުގުވެރިވި ރިޕޯޓުތަކާއި ފީޗާތަކާއި ޚަބަރުތައް އޭނާ ގެނެސް ދީފި އެވެ.

މިދިޔަ އަހަރުގެ އެންމެ މޮޅު ނޫސްވެރިޔާގެ މަގާމަށް އުމުރުން 31 އަހަރުގެ ޝަނާގެ ނަން "މިހާރު" އިން ހުށަހެޅި މައިގަނޑު ސަބަބަކީ ވެސް އެއީ އެވެ. ލިޔެފައި ހުރީ މުޅިން ތަފާތު ރިޕޯޓުތަކެވެ. ޝަނާގެ ދާއިރާއަކީ ވިޔަފާރި ކަމަށް ވާއިރު، އެއީ ވަރަށް ބޮޑަށް ދިރާސާކޮށް، ތަފާސްހިސާބުގެ އަލީގައި ދައްކަން ޖެހޭ ވާހަކަތަކެކެވެ. ހިސާބުގެ އަލީގައި ނޫން ގޮތަކަށް ޝަނާގެ ދާއިރާގެ ވާހަކަތައް ގިނަ ފަހަރު ދެއްކޭކަށް ނެތެވެ. ރާއްޖޭގެ ހާލަތަށް ބަލާއިރު އެއީ އެންމެ ކްރިޓިކަލް އެއް ދާއިރާ އެވެ. އެންމެ ސެންސިޓިވް މައްސަލަތައް ވެސް ލިޔަން ޖެހޭ އެއް ދާއިރާ އެވެ.

މި ފަހަރުގެ އެންމެ މޮޅު ނޫސްވެރިޔާގެ މަގާމު ހޯދަން ޝަނާގެ ފަރާތުން ހުށަހެޅީ ވެސް އެފަދަ މޮޅެތި އަދި ފާހަގަކުރެވޭ ލިޔުންތަކެކެވެ. އެއީ ވަރަށް ބޮޑަށް ދިރާސާކޮށް، އެކި ފަރާތްތަކާ ވާހަކަ ދައްކައިގެން އަދި ގިނަ ވަގުތު ހޯދައިގެން ޝަނާކުރި މަސައްކަތްތަކެކެވެ. އެ ރިޕޯޓްތައް މި ތަނުގައި ފާހަގަކޮށްލާނަމެވެ.

1- ސިޔާސީ ބޭނުމަށް ކުންފުނިތައް ނޮޅާލުން- ރިހޭފައިގައި ޖެހުން ކަހަލަ ކަމެއް.

2- ބަލަބަލައި ތިއްބާ ވިޔަފާރި ކޮންޓްރޯލް ނަގައި ބިދޭސީންގެ ޖީބުތައް ފުރެނީ.

3- މަސް ކިލޯއެއް 25ރ. ކިހާ ދުވަހަކަށް ހިފަހައްޓާލެވޭނެބާ؟

4- ބަދަލު ނުވަނީ ޑޮލަރުގެ އަގު، އަދިވެސް މައްޗަށް.

5- ޓެކްސްގެ ބާގަނޑުން ވަދެ، ރިސޯޓްތަކުން ނާޖާއިޒު ފައިދާ ނަގަނީ.

އަހަރުގެ އެންމެ މޮޅު ނޫސްވެރިޔާގެ ޝަރަފާ ހިސާބުން އެ ނިމުނީއެއް ނޫނެވެ. މިދިޔަ އަހަރު ވިޔަފާރީގެ ދާއިރާގެ އެންމެ މޮޅު ނޫސްވެރިއަކަށް ވެސް ޝަނާ ވަނީ ރޭ ހޮވިފަ އެވެ. އަދިވެސް ނިންމޭކަށް ނެތެވެ. މިދިޔަ އަހަރުގެ އެންމެ މޮޅު ކަވަރޭޖު ވެސް ލިބުނީ "މިހާރު" އަށް ކަމަށް ވާއިރު އެ ކަވަރޭޖުގައި ވެސް ޝަނާގެ ހިއްސާ ވަރަށް ބޮޑެވެ.

ފަހުގެ ތާރީހެއްގައި ރާއްޖޭގައި ހިންގި އެންމެ ބޮޑު އެއް ޖަރީމާ، އެފްއޭއެމް "ހަފުސްކޮށްލި" ގޮތް ދައްކައިދޭން "މިހާރު" ގެ "މެދުސަފުހާ" އިން ހުށަހެޅި ކަވަރޭޖުގައި ޝަނާ ކިޔައިދިނީ އެ އިދާރާ އިން ޑޮލަރު މާރުކުރި ގޮތެވެ. އެފްއޭއެމުން އެކަން ކުރި ގޮތާއި އެކި މީސްމީހުންނަށް ލިބުނު ކެހި އެވެ. އެ މައްސަލައިގެ އެންމެ އަޑިއަށް ފީނައި، ކަމާ ގުޅުން ހުރި މީހުންނާ ވާހަކަ ދައްކައި މައުލޫމާތު އެއްކުރި އެވެ. އެއީ ތަހުގީގީ ނޫސްވެރިކަމުގެ ވަރުގަދަ ކަވަރޭޖެއްގައި ޝަނާގެ ވަރުގަދަ ރިޕޯޓެކެވެ. އެތައް ބަޔަކު ސިއްސުވައިލި ރިޕޯޓެކޭ ބުނަން ޖެހެނީ އޭގެ ފަހުން ކަންތައް ވީ ގޮތުންނެވެ.

އެފްއޭއެމްގެ އޭރުގެ ރައީސް ބައްސާމް އަދީލް ޖަލީލް އިސްވެ ހުރެ، އެ ހިންގި ޖަރީމާތަކުގެ އަޑީގައިވާ ކަންކަން މުޅި ރާއްޖެ އަށް ތިލަވެ، ސަރުކާރުގެ ސަމާލުކަމަށް އައިލެއް ބޮޑުވި އެވެ. އެރި ރާޅު ވަރަށް ބޮޑެވެ.

ޝަނާގެ މެންޓާއެއްގެ ގޮތުގައި ގިނަ ދުވަސްތަކެއް ވަންދެން މަސައްކަތްކުރި އެކަމަކު ސިއްހީ ސަބަބުތަކަށްޓަކައި މިހާރު މަސައްކަތާ ދުރުގައި ހުރި އެޑިޓަރު އިސްމާއިލް ނަސީރު ދެކެވަޑައިގަންނަވާ ގޮތުގައި ޝަނާއަކީ މިވަގުތު ރާއްޖޭގައި ތިބި ވިޔަފާރީގެ ދާއިރާގެ ނޫސްވެރިންނަށް ބަލާއިރު ތަފާތު ނޫސްވެރިއެކެވެ.

"ޝަނާއަކީ ކަންކަމަށް ވަރަށް ކްރިޓިކަލްކޮށް ވިސްނާ ނޫސްވެރިއެއް. އެއީ ނޫސްވެރިކަމުގެ އެންމެ މުހިންމު އެއް ސިފަ. ގަބޫލުކުރާ ގޮތެއްގައި ހުންނަން ޖެހުނަސް ދޫދޭން ޖެހޭ ދަނޑިވަޅުތަކުގައި އެކަން ވެސް ކުރަން ޝަނާއަށް އެނގޭ. ވިޔަފާރީގެ ދާއިރާގައި ހެލްތީ ޑިބޭޓްތައް ކުރަން ޝަނާ އަށް އެނގޭ،" އިސްމާއިލް ވިދާޅުވި އެވެ.

ޝަނާގެ ޝައުގުވެރިކަމުގެ ނަތީޖާ މިއީ. ނޫސްވެރިކަމުގައި ހުންނާނެ އެކި ދުވަސްތައް. އެކަމަކު، ފަސްނުޖެހި ކުރިއަށް ދިޔައީމާ ނުކުންނާނެ ނަތީޖާ ރޭ އެ ފެނުނީ."

އިސްމާއިލް އެ ވިދާޅުވީ ވަރަށް ބޮޑު ތެދެކެވެ. ޝަނާއަކީ "މިހާރު" ނިއުސްރޫމްގައި ކޮންމެ ދުވަހު ހިނގާ އުފެއްދުންތެރި ބަހުސްތަކުގައި އެންމެ ބޮޑަށް ކަންކަމާ މަޝްވަރާކުރާ ނުވަތަ ޑިބޭޓްްކުރާ ނޫސްވެރިޔާއޭ ބުނަން ޖެހެނީ ފަހުރުވެރިކަމާ އެކުގަ އެވެ. ނޫސްވެރިންގެ އެންމެ ހާއްސަ އެއް ސިފައަކީ އެއީ އެވެ. އެ ލިޔާ ޓޮޕިކާ މެދު ފުޅާދާއިރާއެއްގައި ބަހުސްކޮށް، ހުރިހާ ފަރާތެއްގެ ވާހަކަ ހޯދުމަކީ ޝަނާގެ ވަރަށް މުހިންމު ހުނަރެކެވެ. އެއީ "މިހާރު" ގެ ނިއުސްރޫމްގައި ކޮންމެ ދުވަހަކު ހިނގާ ކަމެކެވެ. ޝަނާ ޔަގީނުން ވެސް އެ ބަހުސްތަކުން ގެއްލޭ ދުވަހެއް ނެތެވެ.

ދިޓީވީ އާއި ރާއްޖެ ޓީވީގައި ވެސް މަސައްކަތް ކުރުމަށް ފަހު މީގެ ހަ އަހަރު ކުރިން 2018 ގައި "މިހާރު" އާ ގުޅުނު ޝަނާއަކީ މިދިޔަ މުއްދަތުގައި "މިހާރު" ގެ ބިޒްނަސް ޑެސްކުގެ މައި ތަނބެވެ. ހަ އަހަރުގެ ތެރެއިން ގިނަ އަހަރުތަކުގައި "މިހާރު" ގައި ވިޔަފާރީގެ ދާއިރާ ހިފަހައްޓައިދިން ނޫސްވެރިއަކީ ޝަނާ އެވެ. ކޮންމެ ގަޑިއެއްގައި ކޮންމެ އެއްޗެއް ލިޔަން ޖެހުނަސް އެޑިޓަރުން ގޮވާލަން ޖެހެނީ ޝަނާއަށެވެ.

ޝަނާއަކީ ސައުވީސްގަޑިއިރުގެ ނޫސްވެރިއެކެވެ. އާއިލާ އަށް ވަގުތު ދެމުން އެއާ އެކު، ނޫސްވެރިކަމުގެ ދާއިރާގައި އޭނާ އެ ކޮށްދެނީ ބުރަ މަސައްކަތްތަކެކެވެ. ކޮންމެ ތަނަކަށް ކޮންމެ ގަޑިއެއްގައި ވެސް ނޫސްވެރިކަމުގެ ދާއިރާއާ ގުޅޭ ކަމެއް ނަމަ "ނޯ" ބުނަން ޝަނާ ފަސްނުޖެހުމުގެ ނަތީޖާ ވަރަށް ރަނގަޅެވެ. އެމްއެމްސީ އެވޯޑްސްގައި ޝަނާ އުފުލައިލީ އޭގެ ފޮނިމީރުކަމުގެ ނަތީޖާ އެވެ. މުޅި "މިހާރު" ޓީމުގެ ފަހުރަކީ ޝަނާ އެވެ. މަރުހަބާއެވެ.