އާސަންދައާ ގުޅޭ ކުއްލި މައްސަލަ ބަލައެއް ނުގަތް!

އާސަންދައިގެ ހިދުމަތް މެދުކެނޑުމެއް ނެތި ރައްޔިތުންނަށް ލިބޭނެ ކަން ކަށަވަރު ކުރުމަށް ސަރުކާރަށް ގޮވާލައި އިދިކޮޅުން ރައްޔިތުންގެ މަޖިލިހަށް މިއަދު ހުށަހެޅި ކުއްލި މައްސަލައިގެ ޝަރުތު ހަމަނުވާ ކަމަށް ކަނޑައަޅައި އެ ބަލައި ނުގަންނަން މަޖިލިހުގެ ރިޔާސަތުން ނިންމައިފި އެވެ.

ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) ހުށަހެޅުއްވި ކުއްލި މައްސަލައާ ގުޅޭ ގޮތުން، މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވީ އެ މައްސަލަ މަޖިލީހުގެ ގަވައިދުގެ 197 ވަނަ މާއްދާއާ ހިލާފު ކަމަށެވެ.

އެ މާއްދާއާ ހަވާލާ ދެއްވަމުން އަބްދުއްރަހީމް ވިދާޅުވީ، ކުއްލި މައްސަލައަކަށް ވާން ޖެހޭނީ ކުއްލިއަކަށް ހިނގައިގެން އުޅޭ ނުވަތަ މިދިޔަ ހަތް ދުވަސް ތެރޭގައި ހިނގާފައިވާ ކަމެއް ކަމަށެވެ.

"މަޖިލީހުގެ ގަވާއިދުގެ 197 ވަނަ މާއްދާގެ ހ. އަށް ބަލާއިރު، ކުއްލި މައްސަލައިގެ ޝަރުތު ފުރިހަމައެއް ނުވޭ. އެހެންވެ އެ މައްސަލާގައި ވޯޓަކަށް ދެންނެވެން ނެތް ވާހަކަ ދަންނަވަން، މަޖިލިހުގެ މިއަދުގެ ޖަލްސާގެ ރިޔާސަތުން އަބްދުއްރަހީމް ވިދާޅުވި އެވެ.

ސަރުކާރު ހިންގާ ޕާޓީ، ޕީއެންސީގެ އަޣުލަބިއްޔަތު އޮތް މަޖިލީހުން އެ މައްސަލަ ބަލައިނުގަތް ކަމުގެ ކަންބޮޑުވުމާ އެކު، އެމްޑީޕީގެ ޗެއާޕާސަން ފައްޔާޒް އިސްމާއިލް ވަނީ އެ ކުއްލި މައްސަލަ ސޯޝަލް މީޑިއާގައި އާންމު ކުރައްވައިފަ އެވެ.

އެ ކުއްލި މައްސަލާގައި ބުނެފައި ވަނީ ހޮސްޕިޓަލްތަކާއި ކްލިނިކްތަކުން ހިދުމަތް ހޯދުމަށް ދާ މީހުން ޑޮކްޓަރަށް ދެއްކުމަށާއި ޓެސްޓުތައް ހެއްދުމަށް ލިބެމުން އައި އާސަންދަ ހިދުމަތް ދިނުން ހުއްޓާލަމުންދާ ކަމަށާއި ބޭސް ސިޓީ އާއި ބޭސް ދޫކުރުމުގައި ލިބެމުން އައި އާސަންދައިގެ ހިދުމަތް ނުލިބި މިކަންކަމަށް އަމިއްލަ އަތުން ހަރަދު ކުރަން ޖެހުމުގެ ކަންބޮޑުވުމާއި ޝަކުވާ ރައްޔިތުންގެ ފަރާތުން އިންތިހާ އަށް އިތުރު ވެފައިވާ ކަމަށެވެ.

އިޖުތިމާއީ ސިއްހީ އިންޝުއަރެންސްގެ ގައުމީ ނިޒާމުގެ ގާނޫނުގައިވާ ގޮތުން، އިންޝުއަރެންސް ސްކީމް ހިންގުމަށް މާލީ ގޮތުން ދަތިވެއްޖެ ހާލަތްތަކުގައި އެކަމަށް ބޭނުންވާ ފައިސާ ހޯދުމަށް ފިނޭންސް މިނިސްޓްރީގައި އެދުމުން އެ މިނިސްޓްރީން އެކަން ހައްލު ކޮށްދޭން ޖެހޭނެ ކަމަށް ކުއްލި މައްސަލާގައި ވެ އެވެ.

އެހެންވެ، ދައުލަތުން ފައިސާ ދީގެން ހިންގަމުން އައިސްފައިވާ އެ ހިދުމަތް ފައިސާ ނުދިނުމުގެ ސަބަބުން ހުއްޓާލަން ޖެހޭ ހިސާބަށް ދިޔަ ނުދިނުމަށްޓަކައި އަޅަން ޖެހޭ ފިޔަވަޅުތައް އެޅުމަށް ވަނީ ގޮވާލައިފަ އެވެ.

ސަރުކާރުން ހަރަދު ކުޑަކުރުމުގެ ގޮތުން އާސަންދަ ސްކީމަށް ގެނައި ބަދަލުގެ ތެރޭގައި ޕްރައިވެޓް އިންޝުއަރެންސެއް އޮތް ނަމަ އޭގެ ލިމިޓް ހަމަވުމުން ނޫން ގޮތަކަށް އާސަންދަ ދޫނުކުރަން ސިއްހީ ހިދުމަތްދޭ ތަންތަނަށް އޮތީ އަންގައިފަ އެވެ.

ނަމަވެސް ސަރުކާރުގެ އެ ނިންމުމާ އެކު، ޕްރައިވެޓް އިންޝުއަރެންސްގެ ހިދުމަތްދޭ ބައެއް ތަންތަނުން ވަނީ ކޭޝްލެސް ހިދުމަތް މެދުކަނޑާލައިފަ އެވެ. އޭގެ ސަބަބުން ހިދުމަތް ހޯދާ މީހުންނަށް ޖެހުނީ އަމިއްލަ އަތުން ފައިސާ ދެއްކުމަށެވެ. އެކަމަކު، އެލައިޑު އިންޝުއަރެންސުން ވަނީ އެ ކުންފުނިން ނިންމި ނިންމުން ބަދަލުކޮށް، ކޭޝްލެސްގެ ހިދުމަތް ފަހުން ފަށައިފަ އެވެ.

އެ މައްސަލަ ބޮޑުވެ، އާންމުން ކަންބޮޑުވުން ފާޅުކުރުމުން ސިއްހީ ހިދުމަތްތަކަށް އަމިއްލަ އަށް ފައިސާ ދައްކަން ޖެހޭ ކޮންމެ ހާލަތެއްގައި އާސަންދަ ލިބޭނެ ކަމަށް އެންސްޕާ އިން އިއުލާން ކުރި އެވެ.