ބޮޑު މޮޅަކާ އެކު ބާސެލޯނާ އިން ފޯމު ދަމަހައްޓައިފި

ރޮބަޓް ލެވޮންޑޮސްކީގެ ދެ ލަނޑާ އެކު ސާބިއާގެ ރެޑް ސްޓާ ބެލްގްރޭޑް އަތުން 5-2 އިން މޮޅުވެ ސްޕެއިނުގެ ބާސެލޯނާ އިން އެ ޓީމުގެ ފޯމު ދަމަހައްޓައިފި އެވެ.

ޗެމްޕިއަންސް ލީގުގައި މިދިޔަ މަހުގެ ދެ ވަނަ ދުވަހު ޔަންގް ބޯއިސް އަތުން 5-0 އިން މޮޅުވި ފަހުން ބާސެލޯނާ މިވަނީ ވިދިވިދިގެން ހަތް މެޗުން މޮޅުވެފަ އެވެ. އަދި އޭގެ ތެރެއިން ކޮންމެ މެޗެއްގައި މަދުވެގެން ތިން ގޯލު ވަނީ ޖަހައިފަ އެވެ.

ބާސެލޯނާގެ މި ކާމިޔާބު ސިލްސިލާގައި ޗެމްޕިއަންސް ލީގުގައި ގަދަފަދަ ބަޔާން މިއުނިކް އަތުން 4-1 އިން ހޯދި މޮޅާއި، ސްޕެނިޝް ލީގުގައި ވާދަވެރި ރެއާލް މެޑްރިޑް އަތުން 4-0 އިން ހޯދި މޮޅު ހިމެނެ އެވެ.

ޗެމްޕިއަންސް ލީގުގައި ބާސެލޯނާ ކުޅުނު ހަތަރު މެޗުގެ ތެރެއިން ތިން މެޗުން މޮޅުވެ އޮތީ ނުވަ ޕޮއިންޓާ އެކު ހަ ވަނައިގަ އެވެ. އެ ޓީމަށް ބާކީ ހަތަރު މެޗު އޮތްއިރު ގަދަ އަށް ޓީމުގެ ތެރޭ ހިމެނި މުބާރާތުގެ ގަދަ 16 ޓީމުގެ ބުރުން ޖާގަ ލިބޭނެ ކަމަށް ބެލެވެ އެވެ.

ރެޑް ސްޓާގެ ސްޓޭޑިއަމުގައި ކުޅުނު މި މެޗުގައި ބާސެލޯނާގެ ފުރަތަމަ ގޯލު ޖެހީ އިނިގޯ މާޓިނޭޒް އެވެ. ރެޑް ސްޓާ އިން އެއްވަރުކުރި ނަމަވެސް ބާސެލޯނާ އިން ވަނީ ލެވަންޑޮސްކީ ޖެހި ދެ ގޯލާއި، ރަފީނިއާ ޖެހި ގޯލާއި، ފާމިން ލޯޕޭޒްގެ ގޯލުން އަލުން ތަފާތު ބޮޑުކޮށްފަ އެވެ. މި ގޯލުތަކާ އެކު ލެވޮންޑޮސްކީ ވަނީ ޗެމްޕިއަންސް ލީގުގައި އޭނާގެ ގޯލުގެ އަދަދު 99 އަށް އަރުވައިފަ އެވެ.

ބާސެލޯނާގެ ކޯޗު ހަންސީ ފްލިކް ބުނީ އަދިވެސް ރަނގަޅު ކުރެވޭނެ ކަންކަން އެބަހުރި ކަމަށާއި، އެކަމަކު މިވަގުތަށް އޭނާ ހުރީ ވަރަށް އުފަލުން ކަމަށެވެ.

މުބާރާތުގައި ރޭ ސްޕެއިނުގެ އެތުލެޓިކޯ މެޑްރިޑުން ވަނީ ފްރާންސް ޕީއެސްޖީ އަތުން ފަހު ވަގުތު 1-0 އިން މޮޅުވެފަ އެވެ. ޕީއެސްޖީގެ ވަރެން ޒަޔަ-އެމެރީ 14 ވަނަ މިނެޓުގައި ލީޑު ނަގައިދީފައިވަނިކޮށް އެތުލެޓިކޯ އިން ވަނީ 18 ވަނަ މިނެޓުގައި ނަހުއެލް މޮލިނާގެ ގޯލުން އެއްވަރުކޮށްފަ އެވެ. އެ ޓީމު މޮޅުވީ އިތުރު ވަގުތުގެ ތިން ވަނަ މިނެޓުގައި އެންހެލް ކޮރެއާ ޖެހި ގޯލުންނެވެ. މި މޮޅާ އެކު އެތުލެޓިކޯ އޮތީ ހަ ޕޮއިންޓް ހަމަކޮށް 23 ވަނައިގަ އެވެ. އަދި ޕީއެސްޖީ އޮތީ ހަތަރު ޕޮއިންޓާ އެކު 25 ވަނައިގަ އެވެ.

މުބާރާތް މި ފަހަރު ރޭވިފައިވަނީ ވާދަކުރާ 36 ޓީމު، ކޮންމެ ޓީމެއް އަށް މެޗު ކުޅޭ ގޮތަށެވެ. އޭގެ ތެރެއިން އެންމެ ގިނަ ޕޮއިންޓް ހޯދާ އަށް ޓީމަށް ގަދަ 16 ބުރުން ސީދާ ޖާގައެއް ލިބޭނެ އެވެ. އަދި ނުވަ ވަނަ އާއި 24 ވަނައިގައި ހިމެނޭ ޓީމުތައް ޖެހޭނީ ގަދަ 16 ޓީމުގެ ބުރުން ޖާގަ ހޯދަން ޕްލޭއޮފް ކުޅޭށެވެ.