އޭޓީއެމް 90 ރަށުގައި، ބާކީ ހުރި ރަށްތަކުގައި އަންނަ އަހަރު އޭޓީއެމް ބަހައްޓަނީ

ރާއްޖޭގެ ހުރިހާ ރަށެއްގައި އޭޓީއެމް ބެހެއްޓުމަށް ސަރުކާރުން ވެފައިވާ ވައުދާ އެއްގޮތަށް، މިހާރު ހިދުމަތް ނުފަށާ ރަށްތަކުގައި، އަންނަ އަހަރު އިތުރު 103 އޭޓީއެމް ބަހައްޓަން ނިންމައިފި އެވެ.

އެ މަޝްރޫއުގެ އެމްއޯޔޫގައި މިއަދު ވަނީ ބީއެމްއެލް އާއި އިކޮނޮމިކް މިނިސްޓްރީއާ ދެމެދު ސޮއިކޮށްފަ އެވެ.

ރައީސް އޮފީހުގައި ބޭއްވި މި ރަސްމިއްޔާތުގައި، އެ މަޝްރޫއު ފައްޓަވައި ދެއްވުމުގެ ގޮތުން އދ. އޮމަދޫގައި ވަނީ އޭޓީއެމްގެ ހިދުމަތް ފަށައިފަ އެވެ. މިއީ، ބީއެމްއެލްގެ 150 ވަނަ އޭޓީއެމެވެ.

ބީއެމްއެލްގެ ސީއީއޯ މުހައްމަދު ޝަރީފު ވިދާޅުވީ، އެ ބޭންކުން މިހާތަނަށް ރާއްޖޭގެ 90 ރަށެއްގައި އޭޓީއެމް ބަހައްޓާފައިވާ އިރު ރާއްޖޭގެ ހުރިހާ ރަށެއްގައި އަންނަ އަހަރުގެ ނިޔަލަށް އޭޓީއެމް ބަހައްޓައި ހިދުމަތް ދޭން ފަށަން އަމާޒު ހިފާފައިވާ ކަމަށެވެ. އެ ޕްރޮޖެކްޓްގެ ދަށުން އޭޓީއެމްތައް ބަހައްޓާނީ، ދެ ފިޔަވައްސަކަށް ބަހާލައިގެން ކަމަށް ވިދާޅުވި އެވެ.

ފުރަތަމަ ފިޔަވަހީގެ ދަށުން، އަންނަ އަހަރުގެ ފުރަތަމަ ތިން މަހުގެ ތެރޭގައި 17 ރަށެއްގައި އޭޓީއެމް ބެެހެއްޓޭނެ ކަމަށް އޭނާ ވިދާޅުވި އެވެ.

ބީއެމްއެލް އިން އެންމެ ފުރަތަމަ ރާއްޖޭގައި އޭޓީއެމް އެއް ބެހެއްޓީ 2000 ވަނަ އަހަރު މާލޭގަ އެވެ. އަންނަ އަހަރު ހުޅުވާ 103 އޭޓީއެމާ އެކު ބީއެމްއެލްގެ އޭޓީއެމްގެ އަދަދު 250 އަށް އިތުރުވާނެ އެވެ.

ޝަރީފު ވިދާޅުވީ އެ ބޭންކުގެ އޭޓީއެމްތަކުން މިހާރު ވެސް 15 މިލިއަނަށް ވުރެ ގިނަ ޓްރާންސެކްޝަންތައް ހިންގާ ކަމަށެވެ. އަދި ރާއްޖޭގެ ހުރިހާ ރަށެއްގައި އޭޓީއެމް ބެހެއްޓުމުން، މާލީ ހިދުމަތްތައް މިހާރަށް ފަސޭހަ އިން ކަސްޓަމަރުންނަށް ބޭނުން ކުރެވޭ ކަމަށް ވިދާޅުވި އެވެ.

"މި ބޭންކް މިވަނީ ދުނިޔޭގެ ފެންވަރުގެ މާލީ ހައްލުތައް ހޯދައިދިނުމާއި ކަސްޓަމަރުންނަށް ފަސޭހަކަން ހޯދާ ދިނުމުގައި ކުރިއެރުންތަކެއް ހޯދާފައި. ބައި މިލިއަނަށް ވުރެ ގިނަ ކާޑު ދޫކޮށްފައިވާ އިރު އަޅުގަނޑުމެން ވަނީ ބައިނަލްއަގްވާމީ އެންމެ ބޮޑެތި ކާޑު އަދި ޕޭމެންޓް ނެޓްވޯކްތަކާ އެކު ގުޅުން ބަދަހިކޮށް ކަސްޓަމަރުންނަށް ދުނިޔޭގެ ކޮންމެ ހިސާބެއްގައި ތިބެގެން ވެސް ފައިސާ ދެއްކޭނެ ހިދުމަތް ވެސް މަގުތަނަވަސް ކޮށްދީފައި،" އޭނާ ވިދާޅުވި އެވެ.

ބީއެމްއެލް އަކީ ރާއްޖޭގެ އެންމެ ގިނަ ބަޔަކު ބޭނުން ކުރާ ބޭންކެވެ. އެ ބޭންކުގެ ޕޭމެންޓް ސިސްޓަމުތައް 7،000 އަށް ވުރެ ގިނަ ވިޔަފާރިތަކުން އަންނަނީ ބޭނުން ކުރަމުންނެވެ.

އިކޮނޮމިކް މިނިސްޓަރު މުހައްމަދު ސައީދު ވިދާޅުވީ، އަންނަ އަހަރުގެ ފުރަތަމަ ހަ މަސް ތެރޭ 47 ރަށުގައި އޭޓީއެމް ބަހައްޓައި، ފަހު ހަ މަހު 56 އޭޓީއެމް ބެހެއްޓޭނެ ކަމަށެވެ.

ސައީދު ވިދާޅުވީ ހުރިހާ ރަށެއްގައި އޭޓީއެމް ބެހެއްޓުމަށް ފެށި މަސައްކަތް މިހާ ހިސާބަށް އައީ ރައީސްގެ އިސްނެންގެވުމާ އެކު ކުރި ބުރަ މަސައްކަތުން ކަމަށެވެ.

"އޭޓީއެމް އެކަންޏެއް ނޫން ފައިނޭންޝަލް އިންކްލޫޝަން އަކީ މުހިއްމު ބައެއް. ރައްޔިތުންގެ ބައިވެރިވުމާ އެއްވަރަށް ރައްޔިތުންނަށް އާމްދަނީ އިތުރު ކުރެވޭނެ ކަންކަން އެބަ ޖެހޭ ކޮމިއުނިޓީތަކަށް އިތުރު ކުރަން،" އޭނާ ވިދާޅުވި އެވެ.

އޭނާ ވިދާޅުވި ގޮތުގައި މި ޒަމާނުގައި ފައިނޭންޝަލް އިންކްލޫސިވްނެސް ހާސިލްކުރުމަށް ކޮންމެހެން އިދާރާތަކަށް ގޮސް ހިދުމަތްތައް ހޯދާކަށް ނުޖެހޭނެ އެވެ.

"ޑޮލަރުގެ އޭޓީއެމް ބެހެއްޓުމަކީ ވެސް ރައީސް ވެވަޑައިގެންފައިވާ ވައުދެއް. ބައެއް ރަށްރަށުގައި އެކަން ކުރުމަކީ އެމަނިކުފާނުގެ ވައުދުފުޅެއް. ހަމައެއާ އެކު އެންމެ ޒަމާނީ ޕޭމެންޓް ގޭޓްވޭސް ތަކަށް އެކްސެސް ހޯދުން ވެސް ހިމެނޭ،" އޭނާ ވިދާޅުވި އެވެ.