ހަންގޭރީ މުބާރާތުގައި އާން 8 އަހަރުވީ ރެކޯޑެއް މުގުރާލައިފި

ހަންގޭރީގައި ތަމްރީނު ހަދަމުން އަންނަ ރާއްޖޭގެ ޒުވާން ފެތުންތެރިޔާ މުހައްމަދު އާން ހުސެއިން ޝޯޓްކޯސް 100 މީޓަރު ފްރީސްޓައިލް އިވެންޓުގެ ގައުމީ ރެކޯޑް އާކޮށްފި އެވެ.

އާން ވަނީ 2016 ވަނަ އަހަރު 13 ވަނަ ފީނާ ވޯލްޑް ޗެމްޕިއަންޝިޕްގައި 56.25 ސިކުންތުން ފެތި ނިޝްވާން އިބްރާހިމް ހެދި ރެކޯޑް، މިދިޔަ މަހު ހަންގޭރީގައި އޮތް 2 ވަނަ ޝޯޓްކޯސް ބުޑަ ކަޕްގައި 54.89 ސިކުންތުން ފަތައިގެން މުގުރާލައިފަ އެވެ. އެއަށް ފަހު އޭނާ ވަނީ މިހާރު ކުރިއަށްދާ ހަންގޭރީގެ 20 ވަނަ ގައުމީ ޝޯޓްކޯސް ޗެމްޕިއަންޝިޕްސްގައި 53.45 ސިކުންތުން ފަތައިގެން ރެކޯޑް އާކޮށްފަ އެވެ.

ހަންގޭރީގެ ގައުމީ މުބާރާތުގައި އާން ވަނީ ޝޯޓްކޯސް 50 މީޓަރު ބެކްސްޓްރޯކް އިވެންޓުގައި 25.22 ސިކުންތުން ފަތައިގެން، މިއަހަރު އޮތް އޭއޯއެސްއައި އޭޖް ގްރޫޕް ސްވިމިން ޗެމްޕިއަންޝިޕްގައި 29.06 ސިކުންތުން ފަތައިގެން މުހައްމަދު ރިހާން ޝިހާމް ހެދި ގައުމީ ރެކޯޑް ވެސް މުގުރާލައިފަ އެވެ.

މިދިޔަ މަހު އޮތް ބުޑަ ކަޕްގައި އާން ވަނީ ޝޯޓްކޯސް 50 މީޓަރު ފްރީސްޓައިލް އިވެންޓްގެ ގައުމީ ރެކޯޑް އާކޮށްފަ އެވެ. އޭނާ ރެކޯޑް އާކުރީ 24.29 ސިކުންތުން ރޭސް ނިންމައިގެންނެވެ. މީގެ ކުރިން އާން އަތުގައި މި ރެކޯޑް އޮތީ 2021 ވަނަ އަހަރު އޮތް 15 ވަނަ ފީނާ ވޯލްޑް ސްވިމިން ޗެމްޕިއަންޝިޕްސްގައި 25.00 ސިކުންތުން ފަތައިގެންނެވެ.

ހަންގޭރީގައި ތަމްރީނުހަދަމުން އަންނަ އަންހެން ފެތުންތެރިޔާ ހަމްނާ އަހުމަދު ވެސް ވަނީ މިދިޔަ ހަފްތާ ހަންގޭރީގައި އޮތް ތިންވަނަ ޝޯޓްކޯސް ހާޖޯސް އަލްފްރެޑް ކޫޕާގައި 50 މީޓަރާއި 100 މީޓަރު ބްރެސްޓްސްޓްރޯކް އިވެންޓުގެ ގައުމީ ރެކޯޑް ގާއިމުކޮށްފަ އެވެ.

އެގޮތުން 50 މީޓަރު އިވެންޓުގެ ރެކޯޑް އާކުރީ 37.13 ސިކުންތުން ފަތައިގެންނެވެ. މީގެ ކުރިން ހަމްނާ ރެކޯޑް އާކުރީ މިދިޔަ އަހަރު އެގައުމުގައި ބޭއްވި ގައުމީ ޝޯޓްކޯސް މުބާރާތުގައި 37.88 ސިކުންތުން ފަތައިގެންނެވެ.

ސަތޭކަ މީޓަރު ބްރެސްޓް ސްޓްރޯކް އިވެންޓުން ހަމްނާ ރެކޯޑް މުގުރާލީ 1 މިނިޓް 23.76 ސިކުންތުން ފަތައިގެންނެވެ. މީގެ ކުރިން މި ރެކޯޑް އޮންނަނީ 2019 ވަނަ އަހަރު އޮތް 13 ވަނަ ސައުތު އޭޝިއަން ގޭމްސްގައި 1 މިނިޓް 23.81 ސިކުންތުން ފެތި އައިޝަތު ސާޖިނާ އަތުގަ އެވެ.