ތުރުކީ ރެފްރީން ކުށްވެރި ކުރުމުން މޮރީނިއޯ އަށް އަދަބު ދީފި

އިސްތަންބޫލް (ނޮވެމްބަރު 9) - ތުރުކީ ލީގުގައި އާދީއްތަ ދުވަހު ޓްރަބްޒޮންސްޕޯ އަތުން ފަހު ސިކުންތުގައި 3-2 އިން ފެނަބާޗޭ މޮޅުވި މެޗަށް ފަހު ހޯޒޭ މޮރީނިއޯ، އެ ލީގުގެ ރެފްރީންގެ ފެންވަރު ދަށް ކަމަށް ބުނެ ވާހަކަ ދެއްކުމުން އޭނާ އަށް އަދަބު ދީފި އެވެ.

ކުރިން ޗެލްސީ އާއި މެންޗެސްޓާ ޔުނައިޓެޑް އަދި ރެއާލް މެޑްރިޑަށް ވެސް ކޯޗު ކޮށްދިން މޮރީނިއޯ ވަނީ ފެނަބާޗޭ މޮޅުވި ގޯލު ޖެހުމުން ދަނޑުމަތީގައި ވަރަށް ބޮޑަށް އުފާފާޅު ކޮށްފަ އެވެ. ނަމަވެސް މެޗަށް ފަހު އޮތް ނޫސްވެރިންގެ ބައްދަލުވުމުގައި ވަނީ މެޗު އޮފިޝަލުންނަށް ވަރަށް ބޮޑަށް ފާޑު ކިޔައިފަ އެވެ.

މިއާ ގުޅިގެން ތުރުކީގެ ފުޓްބޯޅަ ފެޑެރޭޝަނުން ވަނީ މޮރީނިއޯ އެއް މެޗަށް ސަސްޕެންޑް ކޮށް، 15،000 ޕައުންޑުން ޖޫރިމަނާ ކޮށްފަ އެވެ.

ތުރުކީގެ ފުޓްބޯޅަ ފެޑެރޭޝަނުން ނެރުނު ބަޔާނުގައި ވަނީ، މޮރީނިއޯގެ ބަސްމަގު ހުރީ ކުޅިވަރުގެ ރޫހާ ހިލާފަށް ކަމަށާއި އޭއީ ގައުމުގެ ކުޅިވަރުގެ އަގު ވެއްޓޭފަދަ ވާހަކަތަކެއް ކަމަށެވެ.

މީގެ ފަސް މަސް ކުރިން ފެނަބާޗޭއާ ހަވާލުވި މޮރީނިއޯ ހިތްހަމަ ނުޖެހުނީ، އެ މެޗުގައި ޓްރަބްޒޮންސްޕޯ އަށް ރެފްރީ ދެ ޕެނަލްޓީ ދިނުމުންނެވެ. ދެ ފަހަރު ވެސް ޕެނަލްޓީ ދިނީ ވީއޭއާރު ބެލުމަށް ފަހު އެވެ.

އަދި އެ މެޗުގައި ފެނަބާޗޭ މޮޅު ކޮށްދޭން ސޮފްޔާން އަމްރަބާޓް ގޯލު ޖެހުމުގެ ކުރިން ފެނަބާޗޭ އަށް ޕެނަލްޓީއެއް ވެސް ލިބެން ޖެހޭ ކަމަށް ގަބޫލުކުރާ ކަމަށް ވެސް މޮރީނިއޯ ބުންޏެވެ.

ބުރާސްފަތި ދުވަހުގެ ރޭ ފެނަބާޗޭ ޔޫރޮޕާ ލީގުގައި ނެދަލެންޑްސްގެ އޭޒެޑް އަލްކަމާއާ ދެކޮޅަށް ކުޅެ 3-1 އިން ބަލިވި މެޗުގައި ވެސް މޮރީނިއޯ ހުރީ ސަސްޕެންޝަނުގަ އެވެ. އެއީ މިދިޔަ މަހު މެންޗެސްޓާ ޔުނައިޓެޑާ ދެކޮޅަށް ޔޫރޮޕާ ލީގުގައި ކުޅުނު މެޗުގައި އޭނާ އަށް ރަތް ކާޑެއް ދެއްކުމުގެ ސަބަބުންނެވެ.