މޮރީނިއޯ ދެން ފެންނާނީ އިނގިރޭސި އާދައިގެ ކްލަބަކުން؟

އިސްތަންބޫލް (އޮކްޓޯބަރު 28) – ދެން ހަވާލުވާން ބޭނުންވަނީ ޔޫރަޕުގެ މުބާރާތެއްގައި ނުކުޅޭ، ޕްރިމިއާ ލީގުގެ ކްލަބަކާ ކަމަށް ތުރުކީގެ ފެނަބާޗޭގެ ކޯޗު ހޯޒޭ މޮރިނިއޯ ބުނެފި އެވެ.

ފެނަބާޗޭއާ އެކު މޮރީނިއޯ ސޮއި ކުރީ ދެ އަހަރުގެ އެއްބަސްވުމެއްގަ އެވެ. އޭނާ ބުނީ އެ ކްލަބުޔގެ މަސައްކަތަށް ފަހު ދެން ބޭނުންމީ ޕްރިމިއާ ލީގުގެ އެންމެ ފަހަތުގައި އޮންނަ ޓީމަކާ ހަވާލުވާން ކަމަށެވެ.

"އަހަންނަށް ހީވަނީ ފެނަބަޗޭ ދޫކޮށްލާއިރު، އަހަރެން ކުރަން އެންމެ ރަނގަޅު ކަމަކީ ޔުއެފާ މުބާރާތްތައް ނުކުޅޭ ކްލަބަކަށް ދިއުން ހެން،" މޮރީނިއޯ ބުންޏެވެ. "އެހެންވީމަ ތާވަލުގެ އެންމެ ފުލުން އިންގްލެންޑްގައި ކްލަބެއް ހޯދަނީ، ދެ އަހަރު ފަހުން ކޯޗެއް ބޭނުން ވާ ކްލަބަކަށް އަހަރެން މިހުރީ ދާން ތައްޔާރަށް. އަދި އެކަމާ ބެހޭގޮތުން އިތުރަށް އެއްޗެއް ބުނާކަށް ބޭނުމެއް ނޫން."

އެފަދަ ކްލަބަކާ ހަވާލުވެ އެ ކްލަބެއް ބިނާ ކުރަން އޭނާ އިސްކަން ދޭނެ ކަމަށް މޮރީނިއޯ ބުންޏެވެ.

މޮރީނިއޯ ވަނީ ޕްރިމިއާ ލީގުގެ ޗެލްސީއާ އެކު ގިނަ ކާމިޔާބީތަކެއް ހޯދައިފަ އެވެ. އޭގެ ފަހުން މެންޗެސްޓާ ޔުނައިޓެޑާ އެކު ވެސް މަސައްކަތްކުރި އެވެ. މޮރީނިއޯ ވަނީ ޕޯޗުގަލްގެ ޕޯޓޯ އާއި އިޓަލީގެ އިންޓަ މިލާނާ އެކު ޗެމްޕިއަންސް ލީގު ކާމިޔާބުކޮށްފަ އެވެ. އަދި ޔުނައިޓެޑާ އެކު ޔުރޮޕާ ލީގު، އިޓަލީގެ ރޯމާއާ އެކު ކޮންފަރެންސް ލީގު ކާމިޔާބުކުރި އެވެ.