ތެލުގެ ހަރަދު ކުޑަކުރަން މިފަހަރު ވެސް ފިއުލް ހެޖިން ހިމަނައިފި

ސަރުކާރުން ތެލަށް ކުރާ ހޭދަ ކުޑަކުރުމަށް ފިއުލް ހެޖިންއަށް ބަޖެޓުގައި 216 މިލިއަން ރުފިޔާ ހިމަނައިފި އެވެ.

އަންނަ އަހަރަށް ލަފާކުރާ ބަޖެޓުގައި ފިއުލް ހެޖިން އަށް ހިމަނާފައި ވާއިރު އެކަމާ ގުޅޭ މުހިންމު މަސައްކަތްތައް ނިމިފައިވާ ކަމަށް ފިނޭންސް މިނިސްޓްރީން ބުންޏެވެ. އެކަމުގެ މަޝްވަރާތައް މިހާރު ވެސް ކުރިއަށްދާ ކަމަށް މިނިސްޓްރީން ވަނީ ބުނެފަ އެވެ. އަދި އިދާރީ ގޮތުން ކުރަން ޖެހޭ ބައެއް ހަރަދުތަކަށް މިއަހަރުގެ ބަޖެޓުގައި ވެސް 108 މިލިއަން ރުފިޔާ ބަޖެޓުގައި ހިމަނާފައިވެ އެވެ.

ފިއުލް ހެޖިން އަކީ ވަކި މުއްދަތަކަށް ދެ ފަރާތުން ކަނޑައަޅާ ވަކި އަގެއްގައި ތެޔޮ ގަތުމަށް ވެވޭ އެއްބަސްވުމެކެވެ. އޭރުން ތެޔޮ ގަތުމުގައި މާކެޓު އަގަށް އަންނަ ބަދަލުތަކުގެ އަސަރެއް ނުކުރާނެ އެވެ. އެެހެންވެ، އެއްބަސްވުން ހަދާ މުއްދަތުގައި ތެލުގެ އަގު ބާޒާރުގައި ބޮޑުވި ނަމަވެސް، ނުވަތަ ކުޑަވި ނަމަވެސް، ސަރުކާރުން ތެޔޮ ގަންނަން ޖެހޭނީ ފިއުލް ހެޖިން އެއްބަސްވުމުގައި ކަނޑައަޅާފައިވާ އަގަށެވެ.

ދައުލަތުން މިހާރު ވެސް އެންމެ ބޮޑު ހޭދައެއް ކުރަން ޖެހެނީ ތެލުގެ ސަބްސިޑީއަށެވެ. މިއަހަރު ތެލުގެ ސަބްސިޑީއަށް ވަނީ 1.3 ބިލިއަން ރުފިޔާ އަށެވެ. މިދިޔަ އަހަރު ވެސް ތެލުގެ ސަބްސިޑީއަށް ވަނީ 1.9 ބިލިއަން ރުފިޔާ ހޭދަކޮށްފަ އެވެ.

މިއަހަރު ސަރުކާރުން ސަބްސިޑީއަށް ކުރާ ހޭދަ 11 ބިލިއަން ރުފިޔާއަށް އަރާނެ ކަމަށް ބެލެވެ އެވެ. މިއީ މިދިޔަ އަހަރަށް ވުރެ ގާތްގަނޑަކަށް އެއް ބިލިއަން ރުފިޔާ އިތުރު އަދަދެކެވެ. މިދިޔަ އަހަރު ވަނީ ސަބްސިޑީއަށް 10 ބިލިއަން ރުފިޔާ ހޭދަކޮށްފަ އެވެ.