އެއް މަހުން ސަބްސިޑީ އަށް 200 މިލިއަނެއްހާ ރުފިޔާ

ސަބްސިޑީގެ ހަރަދުގެ ގޮތުގައި މި އަހަރުގެ ފުރަތަމަ މަސް ދުވަހު ގާތްގަނޑަކަށް 200 މިލިއަން ރުފިޔާ ހޭދަކޮށްފި އެވެ.

ފިނޭންސް މިނިސްޓްރީގެ ތަފާސްހިސާބުތައް ދައްކާ ގޮތުން ސަބްސިޑީ އަށް ކުރި ހޭދަވަނީ މިދިޔަ އަހަރަށް ވުރެ ގާތްގަނޑަކަށް 300 ޕަސެންޓު އިތުރުވެފަ އެވެ. މިދިޔަ އަހަރުގެ އެ މުއްދަތުގައި ސަބްސިޑީ އަށް ހޭދަކުރީ 50 މިލިއަން ރުފިޔާ އެވެ.

ސަބްސިޑީ އާއި ހިލޭ އެހީ އާއި އާސަންދަ އަށް ކުރި ހޭދަވެސް މި އަހަރު ވަނީ އިތުރުވެފަ އެވެ. އެ ކަންކަމަށް ޖުމްލަ 473 މިލިއަން ރުފިޔާ ވަނީ ހޭދަކޮށްފަ އެވެ. އެއީ މިދިޔަ އަހަރަށް ވުރެ 19 ޕަސެންޓުގެ އިތުރުވުމެކެވެ. މިދިޔަ އަހަރުގެ އެ މުއްދަތުގައި ހޭދަކޮށްފައިވަނީ 397 މިލިއަން ރުފިޔާ އެވެ.

ސަބްސިޑީ އާއި ހިލޭ އެހީތަކަށް ކުރި ހޭދަ އިތުރުވި ނަމަވެސް، އާސަންދަ އަށް މި އަހަރުގެ މިހާތަނަށް ކުރި ހޭދަ ވަނީ ކުޑަވެފަ އެވެ. އާސަންދަ އަށް 63 މިލިއަން ރުފިޔާ ހޭދަކުރި އިރު މިދިޔަ އަހަރުގެ މި މުއްދަތުގައި އާސަންދަ އަށް 110 މިލިއަން ރުފިޔާ ހޭދަކޮށްފައި ވެ އެވެ.

ސަބްސިޑީ އާއި ދައުލަތުގެ ހަރަދުތައް ކުޑަކުރުމަށް މުހިއްމު ފިޔަވަޅުތަކެއް އަޅަން ބަޖެޓުގައި ފާހަގަކޮށްފައި އޮތް ނަމަވެސް، އޭގެ ތެރެއިން ބައެއް ކަންކަމަށް އަމަލު ނުކުރަން ރައީސް ޑރ މުހައްމަދު މުއިއްޒު މިހާރު ވަނީ ނިންމަވާފަ އެވެ. މިދިޔަ އަހަރުގެ ޑިސެމްބަރު މަހު ރައީސް ވިދާޅުވީ، ރައްޔިތުންނަށް ލިބޭ ސަބްސިޑީ އާއި އާސަންދަ އަދި ޕެންޝަންގެ ފައިސާ ކަނޑައެއް ނުލާނެ ކަމަށެވެ.

ދައުލަތުގެ ފިސްކަލް ހާލަތު ރަނގަޅުކޮށް، ހަރަދުތައް ބޮއްސުންލައިގެން ދިއުން ކުޑަ ކުރުމުގެ ގޮތުން، އާސަންދަ އަށް މުއްސަނދިންގެ އަތުން ވަކި އަދަދެއް އެ ނިޒާމަށް ދައްކަންޖެހޭ ޖެހޭ ގޮތަށް ބަދަލު ގެންނަން ބަޖެޓު ފޮތުގައި ފާހަގަކޮށްފައިވެ އެވެ. ހޮސްޕިޓަލްތަކުން އާސަންދަ އިން ކަނޑާ އަދަދުތައް އެއްހަމަ ކުރުމުގެ އިތުރުން އެންސްޕާ މެދުވެރިކޮށް ފޯރުކޮށްދޭ މެޑިކަލް ވެލްފެއާ ނިޒާމަށް ވެސް ބަދަލުތަކެއް ގެންނަން އޭރު ނިންމި އެވެ. އެންސްޕާ މެދުވެރިކޮށް އެންމެ މުއްސަނދިންނަށް ހިދުމަތް ދޭ ނަމަ އެކަން ކުރާނީ އިންޓްރެސްޓް ފްރީ ލޯނެއްގެ ގޮތުގަ އެވެ. އޭގެ އިތުރުން އުމުރުން ދުވަސްވީ މީހުންގެ އެލަވަންސް ދިނުމުގެ އުސޫލު ބަދަލުކޮށް، މާލީ ތަނަވަސްކަން ނެތް ފަރާތްތަކަށް އެ އިނާޔަތް ދޭ ގޮތަށް އެ ސްކީމަށް ބަދަލު ގެންނަން ވެސް ބަޖެޓުގައި ލަފާދީފައި ވެ އެވެ.

ނަމަވެސް، އެ ނިންމުންތައް އެގޮތަށް ކުރިއަށް ނުގެންދަން ސަރުކާރުން މިހާރު ވަނީ ނިންމައިފަ އެވެ.

ދައުލަތުގެ ހަރަދު ކުޑަކުރުމަށް ދައުލަތުގެ ބަޖެޓުގައި ހިމަނާފައިވާ ފިޔަވަޅުތައް ނާޅައިފި ނަމަ ބަޖެޓަށް ތިން ބިލިއަން ރުފިޔާ އިތުރުވާނެ ކަމަށް ފިނޭންސް މިނިސްޓްރީން ލަފާކުރެ އެވެ. އެހެންވެ، އިސްލާހީ އެއްވެސް ފިޔަވަޅެއް ކަނޑައަޅާފައިވާ ގޮތަށް ކުރިއަށް ނުގެން ގޮސްފި ނަމަ މި އަހަރުގެ ބަޖެޓުގައިވާ 57 ބިލިއަން ރުފިޔާ، 60 ބިލިއަން ރުފިޔާއަށް އިތުރުވުމުގެ ފުރުސަތު އެބަ އޮތެވެ.