މޫސުމީ ގެއްލުންތަކާ ބައްދަލު އެހީގެ ލަނޑުދަނޑިއެއް ކަނޑައަޅަން ރައީސް ގޮވާލައްވައިފި

މޫސުމީ ބަދަލުތަކުގެ ސަބަބުން ލިބެމުންދާ ގެއްލުންތަކާ އެކަށީގެންވާ މިންވަރަށް އެހީގެ ލަނޑުދަނޑި ކަނޑައެޅުމަށް ރައީސް ޑރ. މުހައްމަދު މުއިއްޒު ދުނިޔެއަށް ގޮވާލައްވައިފި އެވެ.

އަޒަރުބައިޖާންގެ ބާކޫގައި މިހާރު ކުރިއަށްދާ ކޮންފަރެންސް އޮފް ދަ ޕާޓީސް (ކޮޕް29) ސަމިޓުގައި ވާހަކަ ދައްކަވަމުން ރައީސް ވިދާޅުވީ، މޫސުމީ ގެއްލުންތަކުން ވިލުންވެރި ގައުމެއް ބިނާކުރުމުގެ މަސައްކަތް، އެ މަނިކުފާނުގެ ސަރުކާރުން އިއުލާނުކޮށް، މަސައްކަތް ފަށާފައިވާ ކަމަށެވެ.

އެކަމަކު އެ މަސައްކަތަށާއި އަމާޒަށް އޮތް އެންމެ ބޮޑު ހުރަކީ މާލީ އެހީ ލިބުމުގައި ހުރި ދަތިކަން ކަމަށް އެ މަނިކުފާނު ވިދާޅުވި އެވެ.

"އާ ކްލައިމެޓް ފައިނޭންސް ލަނޑުދަނޑިއަކީ، މޫސުމީ ގެއްލުންތަކުގެ ހަގީގީ މިންވަރު ރަމްޒުވާ ފަދަ ލަނޑުދަނޑިއަކަށް ވާންޖެހޭ. ބޭނުންވެފައި އޮތް މިންވަރު އޮތީ، ބިލިއަންގައެއް ނޫން، ޓްރިލިއަންގައި،" ރައީސް ވިދާޅުވި އެވެ.

އެއާ އެކު އެ މަނިކުފާނު ވަނީ، ރާއްޖެ ފަދަ ތަރައްގީވަމުން އަންނަ ކުދި ޖަޒީރާ ގައުމުތަކަށް ކުރިމަތިވެފައިވާ ހާއްސަ ހާލަތްތަކަށް ރިއާއަތް ކުރުމަށް ގޮވާލައްވައިފަ އެވެ.

އަދި ކުރިއަރާފައިވާ ގައުމުތަކުން، މޫސުމީ ބަދަލުތަކަށް އަރައިގަތުމަށް ކުރާ މަސައްކަތާ އެކު އެހީ ދޭ މިންވަރު އިތުރުކުރަންޖެހޭ ކަމަށް ރައީސް ވިދާޅުވި އެވެ.

އެ މަނިކުފާނު ވިދާޅުވި ގޮތުގައި، ދުނިޔޭގެ އެކި ކަންކޮޅުތަކުގައި ހަނގުރާމަތަކަށް މިނެއް ނެތި ފައިސާ ހަރަދުކުރަމުންދާ އިރު، މޫސުމީ ގެއްލުންތަކަށް މާލީ އެހީ ދޭން އަދިވެސް ފަސްޖެހެ އެވެ.

އެހެންކަމުން، އިސްކަންދޭ ތަރުތީބަށް ބަދަލުގެނެސް، މުޅި ބައިނަލްއަގުވާމީ މާލީ ނިޒާމު އިސްލާހުކުރަންޖެހިފައިވާ ކަން ރައީސް ފާހަގަކުރެއްވި އެވެ.

"ކޮޕްގެ 28 ބައްދަލުވުމަށްފަހު ވެސް، ވިހަ ގޭސް ބޭރުކުރާ މިންވަރު ދަނީ އިތުރުވަމުން. ލިބޭ މާލީ އެހީ ދަށްވެ، އުއްމީދު ދަނީ ފަނޑުވަމުން،" ކޮޕްގެ މި ބައްދަލުވުމުގެ ނަތީޖާ ތަފާތުވާނެ ކަމުގެ އުއްމީދުގައި އެ މަނިކުފާނު ވިދާޅުވި އެވެ.

މިއަދުން ފެށިގެން މި މަހުގެ 22 އަށް އަޒަރުބައިޖާންގައި ބާއްވާ ކޮޕް 29 ސަމިޓުގައި ރައީސް މުއިއްޒު ތަގުރީރު ކުރައްވައި، މަތީ ފަންތީގެ އެކިއެކި އިވެންޓުތަކާއި މަޝްވަރާތަކުގައި ބައިވެރިވެވަޑައިގަތުމުގެ އިތުރުން ބައެއް ގައުމުތަކުގެ ވެރިންނާ ބައްދަލު ކުރައްވާނެ ކަމަށް ރައީސް އޮފީހުން ވަނީ ބުނެފަ އެވެ.

ކޮޕް29 ބައްދަލުވުމަކީ ރާއްޖެއިން ދެމެހެއްޓެނިވި ތަރައްގީގެ ލަނޑުދަނޑިތަކާއި މޫސުމީ ބަދަލުތަކަށް ހޭނުމަށް ކުރަމުންދާ މަސައްކަތަށް އަލިއަޅުވާލުމަށް ފުރުސަތު ލިބޭ ވަރަށް މުހިންމު ބައްދަލުވުމެއް ކަމަށް ސަރުކާރުން ބުންޏެވެ.

ރައީސް މުއިއްޒު ވަނީ މިދިޔަ އަހަރު ބޭއްވި ކޮޕް 28ގައި ވެސް ބައިވެރިވެވަޑައިގެންފަ އެވެ.

އެ ސަމިޓުގައި ރައީސް ވަނީ މޫސުމީ ބަދަލުތަކާ އެކު، ރާއްޖެ އަށް ކުރިމަތިވަމުންދާ ގޮންޖެހުންތަކާއި އެ ގޮންޖެހުންތަކުން އަރައިގަތުމަށް ރާވާފައި ހުރި މަސައްކަތްތަކާ ބެހޭ ގޮތުން ވާހަކަފުޅު ދައްކަވައިފަ އެވެ.