މޫސުމީ ލަނޑުދަނޑިތައް ހާސިލު ކުރުމުން ދަރަނި މާފުކޮށްދޭން ރައީސް ހުށަހަޅުއްވައިފި

މޫސުމީ ގެއްލުންތަކުން އަރައިގަންނަން ރާއްޖެ ފަދަ ކުދި ގައުމުތަކަށް ކުރިމަތިވާ މާލީ ހުރަސްތައް ގިރާކުރަން، އާ ވިސްނުންތަކެއް ބޭނުންވާ ކަމަށް ވިދާޅުވެ، މޫސުމީ ލަނޑުދަނޑިތައް ހާސިލުކުރުމާއި ދަރަނި މާފުކޮށްދިނުމާ ގުޅުވައިދޭން ރައީސް ޑރ. މުހައްމަދު މުއިއްޒު މިއަދު ހުށަހަޅުއްވައިފި އެވެ.

އަޒަރުބައިޖާންގެ ބާކޫގައި މިހާރު ކުރިއަށް ގެންދާ ކޮންފަރެންސް އޮފް ދަ ޕާޓީސް (ކޮޕް29) ސަމިޓުގައި، ކްލައިމެޓް ފައިނޭންސާ ގުޅޭ މަތީ ފަންތީގެ ބައްދަލުވުމުގައި ރައީސް ވިދާޅުވީ، މޫސުމީ ބަދަލުތަކާ ގުޅިގެން ރާއްޖޭން ވެސް ހިފާފައިވާ އަމާޒުގެ މަތީގައި ހަރުދަނާ ފިޔަވަޅުތަކެއްގައި އަމަލީ ސިފަ ޖައްސަން ފަށާފައިވާ ކަމަށެވެ.

"އަޅުގަނޑުމެން ވަނީ ހާއްސަ މޫސުމީ ފަންޑެއް ގާއިމުކުރުމުގެ މަސައްކަތް ފަށާފައި. އަޅުގަނޑުމެން މި ދަނީ އިގުތިސާދު ސިންދަފާތު ކުރުމުގެ މަސައްކަތް ކުރަމުން. އެކަމަކު ގިނަ ފަހަރު އަޅުގަނޑުމެން މި ދާން ޖެހެނީ އަޅުގަނޑުމެންގެ ގާބިލުކަމުގެ އިމުގެ ބޭރަށް،" އެ މަނިކުފާނު ވިދާޅުވި އެވެ.

ގައުމީ ފެންވަރުގައި ހާއްސަ އޮނިގަނޑެއް އެކުލަވާލައިގެން، މޫސުމީ ގެއްލުންތަކުން އަރައިގަތުމަށް ލިބެން ހުރި ބޭރުގެ މާލީ އެހީ ހޯދުމުގެ މަސައްކަތުގެ ތެރެއިން، ވިލުންވެރި، ތިމާވެއްޓާ ރަށްޓެހި ތަރައްގީ ގެނައުމަށް އެތައް ބިލިއަން ޑޮލަރެއް ބޭނުންވާ ކަން ހާމަވެފައިވާ ކަމަށް ރައީސް ވިދާޅުވި އެވެ.

އެއާ އެކު، އެ މަނިކުފާނު ވަނީ، އެންމެ ނާޒުކު ގައުމުތައް ބާކީ ނުވާނެ ގޮތަށް، މޫސުމީ މާލީ އެހީގެ އާ ލަނޑުދަނޑިއެއް ކޮޕް 29 ގެ ބައްދަލުވުމުގައި ކަނޑައެޅުމަށް ގޮވާލައްވައިފަ އެވެ.

"އެކަމަކު، މިއީ ހަމައެކަނި ހެޔޮ ނިޔަތެއް އޮވެގެން ފުދޭނެ ކަމެއް ނޫން. މިކަމުގައި އަޅުގަނޑުމެން އަމަލީ ސިފަ ޖައްސަންޖެހޭ. އެއީ އިތުބާރު ހުރި، އެކަށީގެންވާ، ދެމެހެއްޓެނިވި މާލީ އެހީތެރިކަން ލިބުން،" ރައީސް ވިދާޅުވި އެވެ.

"އަޅުގަނޑުމެން ބޭނުންވަނީ އާ ވިސްނުންތަކެއް. ދަރަނި މާފުކުރުމާއި މޫސުމީ ލަނޑުދަނޑިތައް ހާސިލުކުރުމާ ގުޅުވުން ފަދަ ކަންކަން."

ރައީސް މުއިއްޒު ވިދާޅުވި ގޮތުގައި، ރާއްޖެ ފަދަ ގައުމުތަކުގެ ނާޒުކު ކަމަކީ ބަލި ފައެއްގެ ގޮތުގައި ނުދެކި، މޫސުމީ ވިލުންވެރިކަމަކީ އާބާދީގެ މުސްތަގުބަލަށް ކުރެވޭ މުހިންމު އިންވެސްޓުމަންޓެއްގެ ގޮތުގައި ދުނިޔޭ މާލީ ނިޒާމު އެކީގައި ބަދަލުކުރަންޖެހެ އެވެ.

އަމިއްލަ ފަރާތްތައް ރަސްމީ މާލީ އިދާރާތަކާ ގުޅުވައިދީ، ލުއި ގޮތެއްގައި މާލީ އެހީ ލިބޭނެ މަގުފަހިކޮށްދޭންޖެހޭ ކަމަށް ރައީސް ވިދާޅުވި އެވެ.

"މިހާތަނަށް ވަކި އަތަކަށް ބުރަވެފައި އޮތް އުސޫލުން ބޭރުވެ، އެއްބައިވަންތަކަމަށް ޖާގަ ދޭން ޖެހޭ. ތަރައްގީވަމުން އަންނަ ކުދި ޖަޒީރާ ގައުމުތަކަށް ހަގީގީ ހައްލުތައް ފޯރުކޮށްދޭންޖެހޭ،" އެ މަނިކުފާނު ވިދާޅުވި އެވެ.

ރައީސް ވިދާޅުވީ، ރާއްޖެ ފަދަ ގައުމުތަކަށް އަތް އުރާލައިގެން ދެން ތިބެވެން ނެތް ކަމަށާއި މޫސުމީ ބަދަލުތަކާ ދެކޮޅަށް ކުރާ މަސައްކަތުގައި އަމަލީ ސިފަ ޖައްސަންޖެހޭ ވަގުތު ޖެހިއްޖެ ކަމަށެވެ.