ފެންނަނީ ބިރުވެރިކަމުގެ ތެރެއަށް ރާއްޖެ ފުރޮޅެމުންދާ މަންޒަރު: އިބޫ

މިހާރު ފެނިވަޑައިގަންނަވަނީ ބިރުވެރިކަމުގެ ތެރެއަށް ރާއްޖެ ފުރޮޅެމުންދާ މަންޒަރު ކަމަށާއި ބާރުތައް ޖަމާކޮށް، މިސްރާބު ހިފާފައި ހުރީ ހުދުމުހުތާރު ވެރިކަމަކާ ދިމާއަށް ކަމަށް ވިދާޅުވެ، ކުރީގެ ރައީސް އިބްރާހިމް މުހައްމަދު ސޯލިހު (އިބޫ) މިރޭ ވަރަށް ބޮޑަށް ފާޑުވިދާޅުވެއްޖެ އެވެ.

އެމްޑީޕީގެ ވެރިކަން ބަދަލުވިތާ އަހަރެއް ފުރެން ގާތްވެފައި ވަނިކޮށް، މި އަހަރު އެ ޕާޓީން ބޭއްވި މިފަދަ ފުރަތަމަ ޖަލްސާގައި އިބޫ ވިދާޅުވި ގޮތުގައި، އޭސީސީ އާއި އިލެކްޝަންސް ކޮމިޝަންގެ މެމްބަރުން ވަކިކޮށް، މިނިވަން މުއައްސަސާތަކަށް އަތް ބާނައި، ބާރުތައް ޖަމާކޮށް، ހުދުމުހުތާރު ވެރިކަމަށް ބަދަލުވުމުގެ މަންޒަރު ދަނީ ފެންނަމުންނެވެ.

"މިއަދު މި ފެންނަނީ މި ބިރުވެރިކަމުގެ ތެރެއަށް ރާއްޖެ ފުރޮޅެމުންދާ މަންޒަރު،" އެ މަނިކުފާނު ވިދާޅުވި އެވެ.

އެ ކަން ކުރަމުންދަނީ، އިބޫ ތުހުމަތު ކުރެއްވި ގޮތުގައި، 2028 ގައި އޮންނަ ރިޔާސީ އިންތިހާބަށް ނުފޫޒު ފޯރުވުމަށެވެ.

އަންނަ އަހަރަށް ލަފާކޮށް ސަރުކާރުން ރައްޔިތުންގެ މަޖިލީހަށް ހުށަހަޅާފައިވާ ދައުލަތުގެ ބަޖެޓުގައި އެއްވެސް ތަފްސީލެއް ހިމަނާފައި ނުވާ ކަމަށް ތުހުމަތު ކުރައްވައި، އެކަމަށް ވެސް އެ މަނިކުފާނު ވަރަށް ބޮޑަށް ފާޑުވިދާޅުވި އެވެ.

ގާނޫނުއަސާސީގެ އިތުރުން ލާމަރުކަޒީ ގާނޫނުގައި ވަކި ގޮތަކަށް ބަޔާންކޮށްފައި އޮއްވައި، އެކަމަށް ބެލުމެއް ނެތި، ކައުންސިލްތަކަށް ދޭންޖެހޭ ބަޖެޓު ކުޑަކުރީ، އިބޫ ވިދާޅުވި ގޮތުގައި، މުޅި ނިޒާމު ފުނޑާލުމުގެ ނިޔަތުގަ އެވެ.

"ފުދިއްޖެ، ފުނޑިއްޖެ" ގެ ނަމުގައި އެމްޑީޕީން އާޓިފިޝަލް ބީޗް ސަރަހައްދުގައި ބޭއްވި ޖަލްސާގައި އިބޫ ވިދާޅުވި ގޮތުގައި، މި ސަރުކާރުގެ ބައިވެރިވުމާ އެކު މި އަހަރަށް ރައްޔިތުންގެ މަޖިލީހުން ފާސްކޮށްދިން ބަޖެޓު ވެރިކަމުގެ 8 މަސް ދުވަހުގެ ތެރޭގައި ހުސްކޮށްލިއިރު، އެ ފައިސާ އިން ކުރި އެއްވެސް ކަމެއް ފެންނާކަށެއް ނެތެވެ.

އެގޮތުން، 49.8 ބިލިއަންގެ ބަޖެޓު ހުސްވެގެން، އިތުރު ފަސް ބިލިއަން ރުފިޔާގެ ކޮންޓިންޖެންސީ ހުށަހެޅި އިރު، ރަށެއްގައި ހިންގި މަޝްރޫއެއް، ކުރި މަސައްކަތެއް އަދި ދެއްކި ލޯނެއް ވެސް ފެންނަން ނެތް ކަމަށް އެ މަނިކުފާނު ވިދާޅުވި އެވެ.

އޭގެ ބަދަލުގައި، މި ސަރުކާރުން ވި ވައުދާ ސީދާ ހިލާފަށް، ފެންނަމުންދަނީ އާސަންދަ ކުޑަކޮށް، ސަބްސިޑީތައް ކަނޑާލައި، ޓެކްސްތައް ބޮޑުކޮށް، މަސްވެރިންނަށް ފައިސާ ނުދީ ވިޔަފާރިވެރިން ބަނގުރޫޓުކޮށް، ޒުވާނުން ނިކަމެތިކުރާ މަންޒަރު ކަމަށް އިބޫ ވިދާޅުވި އެވެ.

"އަޅުގަނޑުމެންނަށް މި ފެންނަނީ އިގުތިސާދީ ކުރިއެރުން ހުއްޓިފައި އޮތް މަންޒަރު. ވެގެން މި އުޅޭ ގޮތަކީ ހިންގަން ނޭނގުނީ. މެނޭޖު ކުރަން ނޭނގުނީ،" އެ މަނިކުފާނު ވިދާޅުވި އެވެ.

އިދިކޮޅު އެމްޑީޕީގެ ގިނަ މެމްބަރުންތަކަކާ އެކު، އާޓިފިޝަލް ބީޗް ސަރަހައްދުގައި އެ ޕާޓީން މިރޭ ޖަލްސާއެއް މި ބޭއްވީ މި ސަރުކާރަށް އަހަރެއް ފުރެން ފަސް ދުވަހަށް ވެފައި ވަނިކޮށެވެ. ވެރިކަން ބަދަލުވި ފަހުން މިހާތަނަށް އެމްޑީޕީގެ ބައްދަލުވުންތައް ބާއްވަމުން އައީ ޗާންދަނީ މަގުގައި ހުންނަ އެ ޕާޓީގެ ހަރުގޭގަ އެވެ.