ރޯދަ މަހުގެ ފަހު 10 އަކާ ދިމާވާތީ ރާއްޖޭގެ މެޗު ފިލިޕީންސަށް ބަދަލުކޮށްފި

އޭޝިއަން ކަޕް ކޮލިފައިންގައި ފިލިޕީންސާ ދެކޮޅަށް ރާއްޖޭގައި ކުޅެން ތާވަލުކޮށްފައިވާ މެޗު ފިލިޕީންސްގައި ކުޅެން ހަމަޖައްސައިފި އެވެ.

އެފްއޭއެމްގެ އެކްޓިން ޖެނަރަލް ސެކްރެޓަރީ މުހައްމަދު ޝުޖާއު ވިދާޅުވީ ރާއްޖެ އާއި ފިލިޕީންސްގެ ފުރަތަމަ ލެގް މެޗު އެ ގައުމުގައި ކުޅެން ހަމަޖެއްސީ ރޯދަ މަހުގެ ފަހު 10 އަކާ ދިމާވާތީ ރާއްޖޭގައި މެޗު ކުޅެން ބޭނުން ނުވާތީ ކަމަށެވެ.

ކުރިން އޮތް ގޮތުން ފުރަތަމަ ލެގް މެޗު ކުޅޭނީ ރާއްޖޭގަ އެވެ. މިހާރު ގެނައި ބަދަލާ އެކު ރާއްޖޭގައި ކުޅޭނީ ދެ ޓީމު ބައްދަލު ކުރާ ދެވަނަ ލެގް މެޗެވެ. އެ މެޗު ކުޅޭނީ ނޮވެމްބަރު މަހު އެވެ.

ފުރަތަމަ ލެގް މެޗު ކުޅެން ހަމަޖައްސާފައި ވަނީ އަންނަ މަހުގެ 25 ގަ އެވެ. އެއީ ރަމްޟާން މަހުގެ ފަހު 10 އެއްގެ ތެރޭގަ އެވެ.

"ފަހަރެއްގައި ރަމްޟާން މަހުގެ 27 ވަނަ ރެޔަށް ނުވަތަ އޮނަހިރި ރެޔަކަށް ވެސް ދިމާވެދާނެ. ރާއްޖޭގައި އާންމުކޮށް އެ ރޭތަކުގައި ކުޅިވަރުގެ ހަރަކާތްތައް ނުބާއްވާތީ ފިލިޕީންސް އެފްއޭ އާއި އޭއެފްސީއާ ވާހަކަ ދައްކައިގެން މެޗު ސްވޮޕް ކުރީ،" ޝުޖާ ވިދާޅުވި އެވެ.

އެ މެޗު އެހެން ތާރީހަކަށް ބަދަލު ކުރެވޭތޯ ވެސް އެފްއޭއެމުން މަސައްކަތް ކުރި އެވެ. އެކަމަކު މެޗެއް ފަސް ކުރުމަކީ ފަސޭހަ ކަމަކަށް ނުވާނެތީ ފިލިޕީންސާ އެކު ރާއްޖޭން އެއްބަސްވީ މެޗު ބަދަލު ކުރުމަށެވެ.

ޝުޖާ ވިދާޅުވީ އޭއެފްސީގެ ސިސްޓަމުން ވެސް މެޗު މިހާރު ބަދަލުކޮށްފައިވާ ކަމަށެވެ. އެހެންވެ ދަނޑުގެ އިންތިޒާމުތަކުގައި ވެސް އުނދަގޫ ކުރިމަތިނުވާނެ ކަމަށް އޭނާ ވިދާޅުވި އެވެ.

އަންނަ މަހުގެ މެޗުގައި ޓީމު އޭ ގެ ގޮތުގައި ވެސް ލިސްޓް ކުރާނީ ފިލިޕީންސެވެ. ރާއްޖޭގެ ކުޅޭ މެޗުގައި ޓީމު އޭ އަށް ވަނީ ދިވެހި ޓީމެވެ. އެ މެޗު ކުޅޭނީ ނޮވެމްބަރު 18 ގަ އެވެ.

ކޮލިފައިންގައި ރާއްޖެ އާއި ފިލިޕީންސް ހިމެނެނީ ގުރޫޕް އޭ ގަ އެވެ. އެ ގުރޫޕްގައި ދެން ހިމެނެނީ ތަޖިކިސްތާނާއި ޓިމޯ ލެސްޓޭ އެވެ.