މީޑިއާ ކައުންސިލް ހާޒިރުކުރި ކޮމިޓީ ސިއްރު ކޮށްފި

މޯލްޑިވްސް މީޑިއާ ކައުންސިލް (އެމްއެމްސީ) އާ ގުޅޭ ގޮތުން ރައްޔިތުންގެ މަޖިލީހަށް ހުށަހަޅާފައިވާ މައްސަލަތަކާ ގުޅިގެން އެ ކޮމިޝަންގެ މެމްބަރުން މިއަދު ހާޒިރުކުރި ކޮމިޓީ ސިއްރުކޮށްފި އެވެ.

އެމްއެމްސީގެ މެމްބަރުން މިނިވަން މުއައްސަސާތަކާ ބެހޭ ކޮމިޓީ އަށް ހާޒިރުކުރީ މިއަދުގެ ހެނދުނު 11:30 އަށެވެ.

އެ ބައްދަލުވުން ސިއްރުކުރަން ހުށަހެޅުއްވީ ކޮލަމާފުށީ ދާއިރާގެ ޕީއެންސީގެ މެމްބަރު އިބްރާހިމް ދީދީ އެވެ. އެ ހުށަހެޅުމަށް ތާއީދު ކުރެއްވީ ފުވައްމުލަކު ދެކުނު ދާއިރާގެ ޕީއެންސީގެ މެމްބަރު އިބްރާހިމް ހުސައިން އެވެ.

އެ ކޮމިޓީ ސިއްރު ކުރަން ހުށަހެޅުއްވި ސަބަބެއް ކަމަށް އިބްރާހިމް ދީދީ ވިދާޅުވީ، އެއީ މަސްލަހަތު ފުށުއަރާ މައްސަލަތަކެއް ކަމަށް ވާތީ އެވެ.

ކޮމިޓީގެ މުގައްރިރު މާފުށީ ދާއިރާގެ ޕީއެންސީގެ މެމްބަރު ހުސައިން ރިޒާ އާދަމް ވިދާޅުވި ގޮތުގައި އެމްއެމްސީގެ މެމްބަރުން ހާޒިރުކުރަނީ އެ ކޮމިޓީ ހުށަހަޅާފައިވާ ބައެއް ސިޓީތަކާއި ޝަކުވާތަކާ ގުޅިގެންނެވެ. ނަމަވެސް އެއީ ކޮން ސިޓީތަކެއް ކަމެއް ވިދާޅެ ނުވެ އެވެ.

އެކަމަކު، މިދިޔަ މަހުގެ ފަހުކޮޅު ބޭއްވި އެމްއެމްސީގެ މިދިޔަ އަހަރުގެ އެވޯޑު ހަފްލާގައި ތަހުގީގީ ދާއިރާއިން ނޫސްވެރިކަމުގެ އިނާމު ލިބުނު "އަދަދު" އޮންލައިންގެ "ސްކީލާން" ޑޮކިއުމެންޓްރީ ޕީއެސްއެމުން ލައިވްކޮށް، ދައްކަން ޖެހުނު މައްސަލަ ބޮޑުވެ ޕީއެސްއެމުން އެ މައްސަލަ މަޖިލީހަށް ހުށަހެޅި އެވެ.

އެ މައްސަލަ ޕީއެސްއެމުން ހުށަހެޅީ އެ މީޑިއާގެ ކޮންޓެންޓް އުސޫލާ ހިލާފު އެއްޗެއް ޕީއެސްއެމުން ދެއްކުމަކީ ދުރާލައި ރާވައިގެން އެންގުމަކާ ނުލައި އެމްއެމްސީން ކުރި ކަމެއްގެ ގޮތުގައި ތުހުމަތުކޮށެވެ.

ދޮގު ޚަބަރު ފަތުރާ ނޫސްތަކާ މެދު ފިޔަވަޅު ނާޅާތީ ކަމަށް ބުނެ ރައީސް އޮފީހުން ވެސް އޮތީ ރައްޔިތުންގެ މަޖިލީހަށް ސިޓީ ފޮނުވައިފަ އެވެ.

އެމްއެމްސީ އަށް މި އަހަރުގެ ތެރޭގައި އެންމެ ގިނަ ޝަކުވާ ހުށަހަޅާފައި ވަނީ ރައީސް އޮފީހުން ކަމަށް މީގެ ކުރިން ބޭއްވި ކޮމިޓީގެ ބައްދަލުވުމެއްގައި އެ ކައުންސިލުން ބުނެފައިވެ އެވެ.