މީޑިއާ ކޮމިޝަންގެ ބިލް އަނބުރާ ގެންދިއުމުގެ ވިސްނުމެއް ނެތް: ހަންނާން

ގިނަ ފާޑުކިޔުންތަކެއް އަމާޒުވެފައިވާ މީޑިއާ ކޮމިޝަންގެ ބިލް އަނބުރާ ގެންދިއުމުގެ ވިސްނުމެއް ނެތް ކަމަށް އެ ބިލް ހުށަހެޅުއްވި ރައްޔިތުންގެ މަޖިލީހުގެ ތުޅާދޫ ދާއިރާގެ މެމްބަރު އަބްދުލް ހަންނާން އަބޫބަކުރު މިއަދު ވިދާޅުވެއްޖެ އެވެ.

ނޫސްވެރިންނާއި މީޑިއާތައް ޖޫރިމަނާކޮށް އަދި މީޑިއާތަކުގެ ލައިސަންސް ބާތިލް ކުރެވޭ ގޮތަށް ހުށަހަޅާފައިވާ ބިލާ ގުޅޭގޮތުން ހަންނާން "މިހާރު"އަށް ވިދާޅުވީ އެ ބިލް ޑްރާފްޓް ކުރެއްވީ އޭނާ އަދި އޭނާގެ "ޓީމް" ގުޅިގެން ކަމަށެވެ. އެ ޓީމުގައި ހިމެނިވަޑައިގަންނަވަނީ މަޖިލިސް މެމްބަރުން ނޫން ކަމަށް ވިދާޅުވިޔަސް، އެ ޓީމުގެ އިތުރު ތަފްސީލެއް ނުދެއްވަ އެވެ. އަދި އެ ބިލް ހުށަހެޅުއްވީ އެއްވެސް ޕާޓީއެއްގެ ތާއީދާއެކު ނޫން ކަމަށް މަޖިލީހުގައި އަމިއްލަ މެމްބަރެއްގެ ގޮތުގައި ހުންނެވި ހަންނާން ވިދާޅުވި އެވެ.

"ގައުމު އިސްވާތީ މި ބިލް ހުށަހެޅީ. އެ ބިލް އަނބުރާ ގެނައުމުގެ ވިސްނުމެއް ނެތް،" ހަންނާން ވިދާޅުވި އެވެ.

ބިލުގައިވާ ގޮތުން، ބްރޯޑްކާސްޓަރުން ތަބާވާންޖެހޭ ސުލޫކީ މިންގަނޑުގެ ތެރޭގައި ގާނޫނުގެ ވެރިކަން ދެމެހެއްޓުމުގެ އަސާސްތައް ދެމެހެއްޓުން ހިމެނެ އެވެ.

މީޑިއާ ކައުންސިލާއި ބްރޯޑްކާސްޓިން ކޮމިޝަން އުވާލުމަށްފަހު މީޑިއާ ކޮމިޝަން އުފައްދާނީ ބިލުގައިވާ ގޮތުން، ޖުމްލަ ހަތް މެމްބަރުންގެ މައްޗަށް އެކުލެވޭ ގޮތަށެވެ. އަދި އެ ކޮމިޝަނުގައި ތިބޭނީ މަޖިލީހުގެ ރުހުން ލިބިގެން ރައީސުލްޖުމްހޫރިއްޔާ އައްޔަންކުރާ ހަތަރު މެމްބަރަކާއި މީޑިއާތަކުން އައްޔަންކުރާ ތިން މީހެކެވެ. އެގޮތަށް ކޮމިޝަން އެކުލަވާލައިފިނަމަ މަޖިލީހާއި ސަރުކާރުން ބޭނުން ގޮތަކަށް މައްސަލަތައް ނިންމުމުގެ ފުރުސަތު އޮންނާނެ އެވެ.

އެ ކޮމިޝަނުގެ ރައީސާއި ނައިބު ރައީސް އައްޔަން ކުރުމުގެ ބާރު، ބިލުގައި ދީފައިވަނީ މަޖިލީހުގެ ރުހުމާ އެކު ރައީސުލްޖުމްހޫރިއްޔާ އަށެވެ.

ހަންނާން ވިދާޅުވީ ނޫސްވެރިންގެ ކަންބޮޑުވުންތައް ހުރިކަން ގަބޫލު ކުރައްވާ ކަމަށާއި އަދި ބިލާ ގުޅޭގޮތުން ކޮމެޓީ މަރުހަލާގައި ކުރާ މަޝްވަރާތަކުގައި އެކަންކަމަށް ރިއާޔަތް ކުރާނެ ކަމަށް އޭނާ ވިދާޅުވި އެވެ.

"އަޅުގަނޑު ބޭނުންވަނީ ގައުމުގައި ހިނގާ ކަންކަން ހަމައަކަށް އެޅުވުމަށް މުހިއްމު ކަމެއްގެ ގޮތުގައި ފެންނާތީ. އެކިއެކި މީޑިއާތައް އަދި ނޫސް މަޖައްލާތައް ބޭނުންކޮށްގެން މީހުންގެ ވާހަކަތައް ވަރަށް ބޮޑަށް އެބަހުރި، ކީކޭތޯ ދަންނަވާނީ، ދޮގު ހަމަ، ދޮގު ސިމްޕަލްކޮށް ބުނަންޏާ ދޮގު ހަބަރުތައް." އޭނާ ވިދާޅުވި އެވެ.

އެ ބިލުގައިވާ ގޮތުން މީޑިއާތަކުން އަމަލުކުރަން ޖެހޭ ސުލޫކީ މިންގަނޑާ ހިލާފު ވެއްޖެ ނަމަ 5،000ރ. އާއި 50،000ރ. އާ ދެމެދުގެ އަދަދަކުން އަދި ވަކިވަކި ނޫސްވެރިން 5،000ރ. އާއި 10،000ރ. އާ ދެމެދުގެ އަދަދަކުން ޖޫރިމަނާކޮށް، މީޑިއާތަކުގެ ލައިސެންސް ހިފެހެއްޓުމުގެ ބާރުމީޑިއާ ކޮމިޝަނަށް ދީފައިވެ އެވެ.