ޗައިނާގެ ނުފޫޒު ގަދަވެދާނެތީ ޓްރަމްޕް ސަރުކާރުން ޗާގޯސް ޑީލަށް ހުރަސް އަޅާފާނެ

އިނގިރޭސި ވިލާތުން ޗާގޯސްގެ ސިޔާދަތީ ބާރު ދޫކޮށްލައި މޮރިޝަސްއާ ހަވާލުކުރަން ވެފައިވާ އެއްބަސްވުމަށް އެމެރިކާގެ އާ ރައީސް ޑޮނަލްޑް ޓްރަމްޕްގެ ސަރުކާރުން ދެކޮޅު ހަދާފާނެ ކަމަށް، އެ ގައުމުގެ ރިޕޯމް ޕާޓީގެ ލީޑަރު ނައިޖަލް ފަރާޖް ވިދާޅުވެއްޖެ އެވެ.

ޓްރަމްޕަށް ތާއީދުކުރައްވާ އަދި އޭނާއާ ގާތް ގުޅުމެއް އޮންނަ ފަރާޖް ވިދާޅުވީ ޗާގޯސްގެ ރަށްތައް އިނގިރޭސި ވިލާތުން ދޫކޮށްލުމަކީ އިނގިރޭސި ވިލާތުގެ ގާތް އެކުވެރިޔަކާ ދެމެދު މައްސަލަތަކެއް އުފެދިދާނެ ކަމަކަށް ވެދާނެ އެވެ. ގާނޫނު ހަދާ މަޖިލީހުގެ މެންބަރެއް ކަމަށްވާ ފަރާޖް ވިދާޅުވި ގޮތުގައި މޮރިޝަސް އަށް ޗާގޯސް ދިނުމަކީ އެ ސަރަހައްދުގައި ޗައިނާގެ ނުފޫޒު ގަދަވެދާނެ ސަބަބަކަށް ވެދާނެ ކަމަށް ޓްރަމްޕުގެ ސެކިއުރިޓީ އެޑްވައިޒަރުން ގަބޫލުކުރައްވަ އެވެ.

ނަމަވެސް ފޮރިން އޮފީސް މިނިސްޓަރު ސްޓެފަން ޑައުޓީ ވިދާޅުވީ ޗާގޯސްގެ ކޮންޓްރޯލް މޮރިޝަސް އަށް ދިނުމާ ގުޅޭ އެއްބަސްވުމުގެ "ފުރިހަމަ ތަފްސީލް" ޓްރަމްޕް ސަރުކާރާ ހިއްސާކުރުމުން އެމެރިކާގެ ކަންބޮޑުވުންތައް ފިލާނެ ކަމުގެ ފުރިހަމަ ޔަގީންކަން އެބަ އޮތް ކަމަށެވެ.

މިއީ އޭނާ ވިދާޅުވި ގޮތުގައި "އެމެރިކާގެ ސަލާމަތީ ކަންކަމާ ގުޅޭ ހުރިހާ ދިމާލަކުން ރުހުން ލިިބިފައިވާ" ޕްލޭނެކެވެ.

މޮރިޝަސް އަށް ޗާގޯސްގެ ރަށްތައް ދޭއިރު އޭގެ ތެރޭގައި ހިމެނޭ ޑިއެގޯ ގާސިއާ އަކީ އިނގިރޭސި ވިލާތުން އެމެރިކާއަށް އަސްކަރީ ބޭނުންތަކަށް ކުއްޔަށް ދީފައިވާ ރަށެކެވެ. މޮރިޝަސްއާ ޗާގޯސް ހަވާލުކުރާއިރު ވެސް ޑިއެގޯ ގާސިއާ 99 އަހަރުގެ މުއްދަތަކަށް އިސްތިސްނާކޮށް އިނގިރޭސި ވިލާތާއި އެމެރިކާގެ ބޭނުންތަކަށް މިހާރު އެ އޮތް ގޮތުގައި ބާއްވަން އޮތީ ނިންމައިފަ އެވެ.

އިނގިރޭސި ވިލާތުން ބުނަނީ އަންނަ އަހަރު މި އެއްބަސްވުމަށް އަމަލުކުރަން ފެށޭނެ ކަމަށް ބެލެވޭ ކަމަށާއި މޮރިޝަސްގެ އިސްތިގުލާލަށް ތާއީދުކުރާ ބައިނަލްއަގްވާމީ ހުކުމްތަކާ ގުޅިގެން އެ ރަށްތަކާ މެދު އުފެދިފައިވާ ގާނޫނީ ނުތަނަވަސްކަން ނިމުމަކަށް އަންނާނެ ކަމަށް ވެސް ބުނެފައިވެ އެވެ.

ނަމަވެސް، ބްރިޓިޝް އިންޑިއަން އޯޝަން ޓެރިޓަރީގެ ނަމުން މަޝްހޫރުވެފައިވާ ޗާގޯސްގެ ސްޓްރެޓެޖިކް މުހިންމުކަމާ އެކު މި އެއްބަސްވުމުގެ ސަބަބުން ޗައިނާއަށް ސަލާމަތީ ގޮތުން އިތުރު ބާރުތަކެއް ލިބިގެންދާނެ ކަމަށް ބުނެ އެއްބަޔަކު ދަނީ ފާޑުކިޔަމުންނެވެ. އެމެރިކާގެ ރިޕަބްލިކަން ޕާޓީގެ ވަރަށް ގިނަ މެމްބަރުން ވަނީ މި އެއްބަސްވުމަށް ފާޑުކިޔައިފަ އެވެ. އެކަމަކު ޓްރަމްޕް މިކަމުގައި އާންމުކޮށް އެއްވެސް ވާހަކައެއް އަދި ނުދައްކަވަ އެވެ.