އާ ސިޔާސީ ޕާޓީއެއް އުފެއްދުމުގެ ހުއްދަ ދީފި

"މޯލްޑިވްސް ކޮމިޔުނިޓީ ޕާޓީ" (އެމްސީޕީ)ގެ ނަމުގައި އާ ސިޔާސީ ޕާޓީއެއް އުފެއްދުމުގެ ހުއްދަ އިލެކްޝަންސް ކޮމިޝަން (އީސީ) އިން މިއަދު ދީފި އެވެ.

އީސީން ބުނީ ސިޔާސީ ޕާޓީގެ ގާނޫނުގެ 12 ވަނަ މާއްދާގައިވާ ގޮތުގެ މަތިން ސިޔާސީ ޕާޓީއެއް އުފެއްދުމަށް ކުރަންޖެހޭ މަސައްކަތްތައް ކުރުމުގެ ހުއްދަ ގ. ކްރެބްޓްރީ، އަލީ އަހުމަދަށް ދިނުމަށް ކޮމިޝަނުން ނިންމާފައިވާ ކަމަށެވެ.

އަލީ އަހުމަދަކީ ޓްރާންސްޕޯޓް މިނިސްޓްރީގެ އިސްވެރިއެއްގެ ގޮތުން ގިނަ ދުވަސްތަކެއް ވަންދެން މަސައްކަތް ކުރައްވާފައިވާ ބޭފުޅެކެވެ.

ސިޔާސީ ޕާޓީއެއް އުފެއްދުމުގެ ހުއްދަ އީސީން ދިނުމުން ޕާޓީ ރަޖިސްޓްރީ ކޮށްދޭނީ މަދުވެގެން 3،000 މީހުންގެ ސޮޔާ އެކު ހުށަހެޅުމުންނެވެ. ދައުލަތުން ސިޔާސީ ޕާޓީތަކަށް ދޭ ފައިސާ ލިބޭނީ 10،000 މީހުން ހަމަވާ ޕާޓީތަކަށް އެކަންޏެވެ.

މި އަހަރު ވަނީ ގްރީން ޕާޓީ އޮފް މޯލްޑިވްސް އާއި ޖަސްޓިސް އެންޑް ޑިވެލޮޕްމަންޓް ޕާޓީގެ ނަމުގައި ސިޔާސީ ޕާޓީއެއް އުފެއްދުމުގެ ހުއްދަ ވެސް ދީފަ އެވެ.

ރާއްޖޭގައި މިވަގުތު 11 ޕާޓީއެއް ހިންގަ އެވެ އެވެ. އެއީ ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ) އަދާލަތު ޕާޓީ އާއި ޖުމްހޫރީ ޕާޓީއާއި ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އާއި ޕީއެންސީ އާއި މޯލްޑިވްސް ތާޑްވޭ ޑިމޮކްރެޓްސް (އެމްޓީޑީ) އާއި ޕީޕަލްސް ނޭޝަނަލް ފްރޮންޓް(ޕީއެންއެފް) އާއި މޯލްޑިވްސް ރިޕޯމް މޫވްމަންޓް (އެމްއާރްއެމް) މޯލްޑިވްސް ނޭޝަނަލް ޕާޓީގެ އިތުުރުން ދަ ޑިމޮކްރެޓްސް އެވެ.

އެ ޕާޓީތަކުގެ ތެރެއިން 50،851 މެމްބަރުންނާ އެކު އެންމެ ގިނަ މީހުން މިވަގުތު ތިބީ އެމްޑީޕީގަ އެވެ. ޕީޕީއެމްގެ ދަފްތަރުގައި ތިބީ 34،698 މެމްބަރުންނެވެ. ތިންވަނަ އަށް އެންމެ ގިނަ މެމްބަރުން ތިބީ ސަރުކާރު ހިންގާ ޕާޓީ ޕީއެންސީގަ އެވެ. އެއީ 28,983 މެމްބަރުންނެވެ.