4،000 ފްލެޓު ނިންމަން އަދި 30 މިލިއަން ބޭނުންވޭ، އެ ލިބޭނެ ގޮތެއް ނެތް: ނާޒިމް

ހުޅުމާލެ 2 ގައި ކުރީގެ ސަރުކާރުން އިމާރާތް ކުރަން ފެށި 4،000 ފްލެޓުގެ މަސައްކަތް ނިންމަން އިތުރު 30 މިލިއަން ޑޮލަރު (463 މިލިއަން ރުފިޔާ) ބޭނުންވާ ކަމަށް ރައްޔިތުންގެ މަޖިލީހުގެ ނައިބު ރައީސް އަދި ދިއްގަރު ދާއިރާގެ މެންބަރު އަހުމަދު ނާޒިމް މިއަދު ވިދާޅުވެއްޖެ އެވެ.

މަޖިލީހުގައި މިއަދު ކުރިއަށް ގެންދާ ބަޖެޓް ބަހުސްގައި އޭނާ ވިދާޅުވީ، ކުރީގެ ރައީސް އިބްރާހިމް މުހައްމަދު ސޯލިހު (އިބޫ) ގެ ސަރުކާރުން ހައުސިން މަޝްރޫއުތައް ވެސް ހިންގީ ވަރަށް ދޯދިޔާކޮށް ކަމަށެވެ.

ނާޒިމް ވިދާޅުވިގޮތުގައި، ފަހި ދިރިއުޅުން ކޯޕަރޭޝަން (އެފްޑީސި) މެދުވެރިކޮށް ހިންގާ 4،000 ފްލެޓުގެ މަސައްކަތް ހަވާލުކޮށްފައި ވަނީ އެ މަޝްރޫއު ނިންމަން ކުރަންޖެހޭ ކަންކަން ކުރެވޭ ގޮތަކަށް ނޫނެވެ.

އެ މަސައްކަތް ނިންމަން އިތުރު 30 މިލިއަން ޑޮލަރު ބޭނުންވިޔަސް އެ ފައިސާ ހަމަޖެހޭނެ ގޮތެއް އަދި ނެތް ކަމަށް އޭނާ ވިދާޅުވި އެވެ.

"[އިމާރާތުގައި] ކަރަންޓު ލާކަށް ފައިސާއެއް ނެތް، ފެން ގުޅާކަށް ފައިސާ ނެތް، ސެކިއުރިޓީއެއް ހިމެނިފައި ނެތް. ސަރުކާރުން އެތަނަށް ވައްދާނެ މީހުން މިއަދު ވެސް ނިންމި ދާނެ. އެހެން ނަމަވެސް ވަދެވޭނެ ގޮތެއް އަދިވެސް ނެތް. އަދިވެސް އެ ފައިނޭންސް ހަމަޖެހޭނެ ގޮތް ނެތް،" ނާޒިމް ވިދާޅުވި އެވެ.

އޭނާ ވިދާޅުވީ، އޭގެ ތެރެއިން 2،000 ޔުނިޓު އަޅަން ހަމަޖައްސާފައި ވަނީ އިންޑިއާގެ އެގްޒިމް ބޭންކުން 85 ޕަސެންޓުގެ އިތުރުން ދިވެހި ސަރުކާރުން 15 ޕަސެންޓު ދައްކާ ގޮތަށް ކަމަށެވެ. އެކަމަކު އެ ފައިސާ އަދިވެސް ނުދެއްކޭ ކަމަށް ނާޒިމް ވިދާޅުވި އެވެ.

"ހައުސިން ކަންކަން އޮތީ އެހެން. އެއްވެސް ކަމެއް ފުރިހަމަ އަށް ދެކޮޅު ޖެހޭ ގޮތަށް ކުރީ ސަރުކާރު ކޮށްފައި ނެތް ކަން،" އޭނާ ވިދާޅުވި އެވެ.