ބްރޯޑްކޮމްގެ މެމްބަރު ކަމަށް ކުރިމަތިލާން ހުޅުވާލައިފި

ބްރޯޑްކާސްޓިން ކޮމިޝަންގެ މެމްބަރުކަމަށް ކުރިމަތިލާން މިއަދު ހުޅުވާލައިފި އެވެ.

ރައީސް އޮފީހުން ކުރި އިއުލާނުގައި ބުނީ ބްރޯޑްކޮމްގައި މި ވަގުތު ތިއްބެވި ހަތް މެމްބަރުންގެ ތެރެއިން ދެ މެމްބަރެއްގެ ދައުރު ހަމަވާން ކައިރިވެފައިވާތީ، އެ ކޮމިޝަނަށް އަންނަ ހަފުތާގެ އަންގާރަ ދުވަހުގެ ކުރިން ކުރިމަތިލެވޭނެ ކަމަށެވެ.

ޓީވީތަކާއި ރޭޑިއޯ ރެގިއުލޭޓްކުރާ ކޮމިޝަނުން އެންމެ އަވަހަށް ހަމަވަނީ ރައީސް މަރިޔަމް ވަހީދާ އާއި މެމްބަރު އަލީ ޔޫސުފްގެ ދައުރެވެ. އެ ދެ ބޭފުޅުންގެ ފަސް އަހަރުގެ ދައުރު އަންނަ މަހުގެ 5 ގައި ހަމަވާނެ އެވެ.

މިނިވަން މުއައްސަސާތަކުގެ މެމްބަރުންގެ ދައުރު ހަމަވުމުގެ މަހެއް ކުރިން، އެ މަގާމުތަކަށް މީހުން ހޯދަން އިއުލާންކުރި ނަމަވެސް، މި ފަހަރު އިއުލާންކުރީ ކުޑަ ދުވަސްކޮޅަކަށް ވެފައިވަނިކޮށެެވެ. ބްރޯޑްކޮމް އަދި އޮންލައިން މީޑިއާތައް ރެގިއުލޭޓްކުރާ އެމްއެމްސީ އުވާލުވުމަށްފަހު މީޑިއާ ކޮމިޝަނެއް އުފައްދަން ޖެހޭ ކަމަށް ވާހަކަ ދެކެވެނިކޮށް އަމިއްލަ ގޮތުން ތުޅާދޫ ދާއިރާ އަށް ހޮވިވަޑައިގަތް އަބްދުލް ހަންނާން ވަނީ މަޖިލީހަށް ބިލެއް ހުށަހަޅުއްވައިފަ އެވެ.

އެ ބިލާ މެދު ނޫސްވެރިން ކަންބޮޑުވުންފާޅުކުރަމުން ދަނިކޮށް، ރައީސް ޑރ. މުހައްމަދު މުއިއްޒު ރޭ ވަނީ އެ ބިލް މަޖިލީހުން ފާސްނުކުރާނެ ކަމަށް ވިދާޅުވެފަ އެވެ.

މި ސަރުކާރަށް އެއް އަހަރު ފުރުން ފާހަގަކުރަން ސޯޝަލް ސެންޓަރުގައި ބޭއްވި ރަސްމިއްޔާތުގައި ރައީސް ވިދާޅުވީ މީޑިއާތައް ކޮންޓްރޯލް ކުރަން ބޭނުންފުޅު ނުވާ ކަމަށާއި އެމަނިކުފާނުގެ ވިސްނުންފުޅަކީ މިހާރަށް ވުރެ ބޮޑަށް މީޑިއާތަކަށް މިނިވަންކަން ދިނުން ކަމަށެވެ.

ރޭގެ ރަސްމިއްޔާތަށް ފަހު ނޫސްވެރިން ވަނީ އަމިއްލަ މެމްބަރަކު ހުށަހެޅުއްވީ މީޑިއާ ކޮމިޝަންގެ ބިލާ ގުޅޭގޮތުން ރައީސްއާ ސުވާލު ކޮށްފަ އެވެ. އެ މަނިކުފާނު ވިދާޅުވީ ވެރިކަން ކުރާ ޕާޓީގެ މެޖޯރިޓީ އޮތް މަޖިލީހުން އެ ބިލް ބޭރުކުރާނެ ކަމަށެވެ. "އޭތި ބޭރުކުރާނެ،" ރައީސް ވިދާޅުވި އެވެ.

އެމްއެމްސީގެ ގިނަ މެމްބަރުންގެ ދައުރު ވެސް އަންނަ މަހުގެ 14 ގައި ހަމަވާނެ އެވެ. އެހެންވެ، އެ ކައުންސިލަށް މެމްބަރުން ހޮވުމުގެ މަސައްކަތް ޔޫތު، އެމްޕަވަމަންޓް މިނިސްޓްރީން ފެށުމަށް ފަހު ވަކި ހިސާބަކުން މަޑު ޖެހުނީ އެވެ.