އެންސްޕާއަށް އާ އިމާރާތެއް ހޯދަން ހެދި އެއްބަސްވުން ބާތިލްކުރަން ނިންމައިފި

އެމްއެމް ޓީވީގެ ނަމުގައި މިދިޔަ ހަފުތާގައި ފެށި ޓީވީ ޗެނަލްގެ ކުންފުނި މޯލްޑިވްސް މީޑިއާ ހައުސް އިން ކުއްޔަށް ދޫކުރާ ފްލޯތަކެއްގައި ނޭޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ) ހިންގަން އެވޯޑް ކުރުމުގެ ފަހަތުގައި ކޮރަޕްޝަން އަދި ދޮގު ވާހަކަތަކެއް ފަތުރަމުންދާ ކަމަށް ބުނެ، އެ އެއްބަސްވުން ނިމުމަކަށް ގެންނަން އެންސްޕާ އިން ނިންމައިފި އެވެ.

އެންސްޕާ އަށް ކޮރަޕްޝަންގެ ތުހުމަތުތަކެއް ކުރެވުނީ އެމްއެމްޓީވީގެ ނަމުގައި މިދިޔަ ބުރާސްފަތި ދުވަހު ފެށި ޓީވީ ޗެނަލްގެ ކުންފުނިން ދިގު މުއްދަތަކަށް ކުއްޔަށް ހިފާފައިވާ އިމާރާތެއްގެ ފްލޯތަކެއްގައި އެންސްޕާ ހިންގަން ކުއްޔަށް ހިފުމުންނެވެ. އެތަން އެންސްޕާ އިން ފަސް އަހަރު ދުވަހުގެ މުއްދަތަކަށް ކުއްޔަށް ހިފީ ނެޝަނަލް ޓެންޑާ ބޯޑުން ހުއްދަ ދީ، އަދި އޯޕަން ޓެންޑަގެ އުސޫލުންނެވެ.

"މި މުއާމަލާތާ ގުޅިގެން އެ ކުންފުނީގެ އަގު ވައްޓާލައި ބަދުނާމު ކުރުމަށް ހަގީގަތާ ހިލާފު އެތައް ވާހަކަތަކެއް ދައްކައި، މީޑިއާގެ އެކި ވަސީލަތްތައް ބޭނުންކޮށްގެން އެއްވެސް އަސްލެއް ނެތް ދޮގު ވާހަކަތައް ފަތުރަމުން ދިއުމުގެ ސަބަބުން އެ ކުންފުންޏަަށް މާއްދީ ގޮތުންނާއި މައުނަވީ ގޮތުން ފޫނުބެއްދޭ ވަރުގެ ބޮޑު ގެއްލުމާ ކުރިމަތިވެފައި ވާތީ، މި އެއްބަސްވުން ނިމުމަކަށް ގެނައުމަށް އެ ކުންފުނިން ވަނީ ހުށަހަޅައިފަ އެވެ،" އެންސްޕާގެ ބަޔާނުގައި ވެ އެވެ.

އެންސްޕާ އިން ބުނީ، އެކަމާ ގުޅިގެން ފިނޭންސް މިނިސްޓްރީއާ މަޝްވަރާ ކުރުމަށް ފަހު، މޯލްޑިވްސް މީޑިއާ ހައުސްއާ އެކު ހެދި އެއްބަސްވުން ނިމުމަކަށް ގެނައުމަށް އެންސްޕާ އިން މިހާރު ނިންމާފައިވާ ކަމަށެވެ.

"އަދި މިކަމާ ގުޅިގެން އިތުރަށް ކުރަން ޖެހޭ މުއާމަލާތްތައް ކުރުމާއި މި އެއްބަސްވުން ނިމުމަކަށް ގެނައުމަށް ފަހު، ފުރިހަމަ ކުރަންޖެހޭ އިޖުރާއަތްތައް ފުރިހަމަ ކުރުމުގެ މަސައްކަތްތައް މާލީ ވުޒާރާގެ އިރުޝާދުގެ ދަށުން ކުރިއަށް ގެންދާ ވާހަކަ ދަންނަވަމެވެ،" އެންސްޕާގެ ބަޔާނުގައި ވެ އެވެ.

އެންސްޕާއިން ކުރިން ބުނެފައިވަނީ އެ އެޖެންސީ މިހާރު ހިންގަމުން އަންނަ އިމާރާތުގެ މުއްދަތު ހަމަވާތީ އެތަން ކުއްޔަށް ހިފީ ފިނޭންސް މިނިސްޓްރީ އާއި ނޭޝަނަލް ޓެންޑާ ބޯޑު މެދުވެރިކޮށް އޮންނަ އުސޫލުތަކުގެ ތެރެއިން ކަމަށެވެ. އެކަމަށް ދެ ފަހަރަށް އިއުލާން ކުރިއިރު، ދެވަނަ ފަހަރު ކުރިމަތިލާފައިވަނީ މޯލްޑިވްސް މީޑިއާ ހައުސްއިން އެކަނި ކަމަށާއި އަދި ޓެންޑާ ބޯޑު ފިޔަވައި އެހެން ފަރާތަކާ އެކު އެ ކުންފުނިން މުއާމަލާތް ކޮށްފައި ނުވާނެ ކަމަށް އެންސްޕާ އިން އޭރު ބުނެފައިވެ އެވެ.

އެންސްޕާއިން އެތަން ފަސް އަހަރަށް ކުއްޔަށް ހިފާފައިވަނީ 34 މިލިއަން ރުފިޔާއަށެވެ.

އެ މައްސަލަ ފެންމަތިވުމުން އެކަން ބަލައިދޭން އެދި އެންސްޕާއިން ވަނީ އެންޓި ކޮރަޕްޝަން ކޮމިޝަން (އޭސީސީ) ގައި މިދިޔަ ހުކުރު ދުވަހުގެ ރޭ އެދިފަ އެވެ.

އެންސްޕާ ހިންގުމަށްޓަކައި ތިން ފްލޯ ކުއްޔަށް ހިފީ ކުރީގެ މިނިސްޓަރު އަހުމަދު ތަސްމީން އަލީގެ އާއިލީ ގެ މއ. ސީރާޒީގެއިންނެވެ. އެއީ މޯލްޑިވްސް މީޑިއާ ހައުސް އިން ދިގު މުއްދަތަކަށް ކުއްޔަށް ނަގާފައިވާ ފްލޯތަކެކެވެ.

އެންސްޕާ މިހާރު ހިންގަމުން އަންނަނީ "މޫކައި ސުއިޓްސް" ގަ އެވެ. އެކަމަކު، އެ އިމާރާތް ވަރަށް ބޮޑަށް ބާވެ، މަރާމާތު ކުރަން ޖެހޭތީ މިދިޔަ އަހަރުގެ ޑިސެމްބަރު މަހު އެ ތަނުން ނުކުންނަން ޖެހޭ އެންސްޕާ އިން ކުރިން ބުނެފައި ވެ އެވެ. އެހެންވެ، ސަރުކާރުގެ އިމާރާތެއް ނުލިބުމުން ޓެންޑަ ބޯޑު މެދުވެރިކޮށް ތަނެއް ހޯދަން ޖެހުނީ ކަމަށް އެންސްޕާ އިން ބުންޏެވެ.