މަރުވެފައި އޮއްވައި ހުޅުމާލެ ފަޅުތެރެއިން ފެނުނީ މަސްވެރިއެއް

ހުޅުމާލެ ފަޅު ތެރޭގައި މަރުވެފައި އޮއްވައި އިއްޔެ ފެނުނީ މ. މަޑުއްވަރީ މީހެއް ކަމަށްވާ އިބްރާހިމް ޖިނާހު މުހައްމަދު ކަމަށް ފުލުހުން ބުނެފި އެވެ.

އެނގިފައިވާ ގޮތުގައި، އުމުރުން 36 އަހަރުގެ އިބްރާހިމަކީ ކަންނެލި މަސްވެރިކަމުގައި، ދޯންޏެއްގައި އުޅޭ މީހެކެވެ.

"ތަހުގީގުގެ ތެރެއިން ބަލަން ޖެހޭ ކަންކަން ބެލުމަށް ފަހު ރޭގެ ވަގުތެއްގައި ހަށިގަނޑު ވަނީ އާއިލާއާ ހަވާލުކޮށްފައި،" ފުލުހުން ބުންޏެވެ.

ހުޅުމާލެ ފަޔާ ސްޓޭޝަނާ ދިމާ ފަޅުތެރޭގައި، ފެން މަތީގައި އޮއްވައި އިބްރާހިމްގެ ހަށިގަނޑު ފެނުނީ އިއްޔެ ހަވީރު އެވެ.

ފުލުހުން އިބްރާހިމްގެ ހަށިގަނޑު އާއިލާއާ ހަވާލުކުރުމުން، ރޭ ޖަނާޒާ ބާއްވައި ހުޅުމާލޭ ސަހަރާގައި ވަނީ އޭނާގެ ހަށިގަނޑު ވަޅުލައިފަ އެވެ.

މިދިޔަ ހަފުތާގައި ވަނީ މާލޭ ދަރުމަވަންތަ ހޮސްޕިޓަލާ ދިމާ މޫދުން ވެސް އަނިޔާވެފައި އޮތް މީހަކު ފެނިގެން ހޮސްޕިޓަލަށް ގެންގޮސް ފަރުވާ ދެނިކޮށް މަރުވި އެވެ. އެ މީހާއަށް އަނިޔާވީ އެ ސަރަހައްދުން ދަތުރުކުރި އުޅަނދެއްގައި ޖެހިގެން ކަމަަށް ވަނީ ބެލެވިފަ އެވެ.