ކަރަންޓު ބިލްތަކަށް ސަރުކާރުން ފެނަކަ އަށް 400 މިލިއަން ދައްކަންޖެހޭ

އަތޮޅުތެރޭގައި ހިންގާ ސަރުކާރުގެ އިދާރާތަކުން ކަރަންޓު ބިލްތަކަށް 400 މިލިއަން ރުފިޔާ ފެނަކަ އަށް ނުލިބި އެބަހުރި ކަމަށް އެ ކުންފުނިން ބުނެފި އެވެ.

ފެނަކަ އިން އާންމުކުރި މާލީ ހިސާބުތައް ދައްކާ ގޮތުން، ސަރުކާރު ހިއްސާވާ ކުންފުނިތަކުގެ ކަރަންޓު ބިލްތަކަށް 178 މިލިއަން ރުފިޔާ ނުލިބި އެބަހުއްޓެވެ. ސަރުކާރުގެ އިދާރާތަކުން ވެސް 222 މިލިއަން ރުފިޔާ ލިބެން ޖެހެ އެވެ. ސަރުކާރުގެ އިދާރާތަކުގެ ތެރޭގައި ކައުންސިލް އިދާރާތަކާއި ކޯޓުތަކާއި ހެލްތު ސެންޓަރުތައް ވެސް ހިމެނެ އެވެ.

މިދިޔަ އެއް މަހަށް އެކަނި ބަލާއިރު ވެސް ސަރުކާރުގެ އިދާރާތަކާއި ކުންފުނިތަކުން 47 މިލިއަން ރުފިޔާ ނުލިބި އެބަހުރި ކަން ރިޕޯޓުން ދައްކަ އެވެ. އަދި އެއް އަހަރަށް ވުރެ ގިނަ ދުވަސްވެފައިވާ ހުރި ކަރަންޓު ބިލްތަކަށް ނުލިބި 178 މިލިއަން ރުފިޔާ ނުލިބި އެބަހުއްޓެވެ.

ބިލްތަކަށް ފައިސާ ނުދައްކާ އިދާރާތަކުގެ ތެރެއިން ވޭތުވެދިޔަ އެއް އަހަރު ތެރޭގައި ނުލިބި 75 މިލިއަން ރުފިޔާ އެބަހުރި ކަމަށް ފެނެކަ އިން ބުންޏެވެ.

ސަރުކާރުގެ އިދާރާތަކުން ބޮޑެތި އަދަދުތަކުން ކަރަންޓު ބިލް ނުދައްކާ ހުރި އިރު ފެނަކަ އިން އަމިއްލަ ކުންފުނިތަކަށް 3.7 މިލިއަން ރުފިޔާ ދައްކަން ޖެހެ އެވެ. އޭގެ ތެރެއިން އެއް އަހަރަށް ވުރެ ގިނަ ދުވަސްވެފައިވާ ބިލްތަކުގެ އަދަދު 2.1 ބިލިއަން ރުފިޔާ އަށް އަރަ އެވެ.