ފެނަކައިގެ ބިލްތައް އޮންލައިންކޮށް ދެއްކޭނެ ގޮތް ހަދައިފި

ފެނަކަ ކޯޕަރޭޝަންގެ ބިލްތައް އޮންލައިންކޮށް ދެއްކޭ ސޮފްޓްވެއާއެއް މިއަދު ތައާރަފު ކޮށްފި އެވެ.

ޝީ ބިލްޑިންގްގައި ބޭއްވި ހަފްލާއެއްގައި، އާ ބިލިން ސޮފްޓްވެއާ ތައާރަފް ކޮށްދެއްވީ، އެ ކޯޕަރޭޝަންގެ ކުރީގެ މެނޭޖިން ޑިރެކްޓަރު އަދި މިހާރު އިލެކްޝަން ކޮމިޝަންގެ ރައީސް އަހުމަދު ޝަރީފެވެ.

ފެނަކައިން ބުނީ، އެ ކުންފުނީގެ ހުރިހާ ބްރާންޗަކާއި ހެޑް އޮފީސް އެ ސޮފްޓްވެއާ އިން އެއް ވިއުގައަކުން މިހާރު ގުޅާފައިވާ ކަމަށެވެ. އަދި ފެނާއި ކަރަންޓު ފަދަ ހުރިހާ ޚިދުމަތެއް އެއް ނިޒާމެއްގެ ތެރެއިން ދެވޭނެ ކަމަށް އެ ކޯޕަރޭޝަނުން ބުނެ އެވެ.

އާ ބިލިން ސޮފްޓްވެއާގައި، ކަސްޓަމަރުންނަށް ހާއްސަ ޕޯޓަލް އަކާއި ބިލްގެ ތަފްސީލް އޮންލައިންކޮށް ބަލައިލުމުގެ ފުރުސަތާއި ހުރިހާ މައުލޫމާތާއި ފައިސާ ދެއްކޭނޭ ގޮތް ވަނީ ހަމަޖައްސައިފަ އެވެ. އަދި ކަސްޓަމަރުންނަށް ހާއްސަ މޯބައިލް އެޕެއް ވަނީ ތައާރަފު ކޮށްފަ އެވެ.

މިއަދުގެ ހަފުލާގައި ވާހަކަ ދައްކަވަމުން، ދާދި ފަހަކާ ޖެހެންދެން ފެނަކަ ކޯޕަރޭޝަންގެ މެނޭޖިން ޑިރެކްޓަރަކަށް ހުންނެވި ޝަރީފް ވިދާޅުވީ، އާ ސޮފްޓްވެއާ ތައާރަފު ކުރުމަކީ އެ ކުންފުނީގެ ހަޔާތުގައި ބޮޑު ކާމިޔާބެއް ހާސިލް ކުރެވުން ކަމަށެވެ. އެ ސޮފްޓުވެއާގެ ސަބަބުން އެތަށް ގޮތަކުން ހިދުމަތުގެ ފެންވަރު ރަނގަޅު ވާނެ ކަމަށް ވެސް ޝަރީފް ވިދާޅުވި އެވެ.

ފެނަކަ ހިންގުމާ ހަވާލުވެ ހުންނެވި ޑެޕިއުޓީ މެނޭޖިން ޑިރެކްޓަރު މުހައްމަދު ލަމްޢާން ވިދާޅުވީ، އާ ސޮފްޓްވެއާގެ ސަބަބުން ހިސާބުކިތާބު ބެލެހެއްޓުމަށް ބޮޑު ލުއިފަސޭހަ އަކާއި ޔަގީން ކަމެއް ލިބޭނެ ކަމަށެވެ.

ފެނަކަ އަކީ ފެނާއި ކަރަންޓާއި ނަރުދަމާގެ ޚިދުމަތް ދިނުމަށް އުފައްދާފައިވާ 100 ޕަސެންޓް ސަރުކާރު ހިއްސާވާ ކުންފުންޏެކެވެ. ރާއްޖޭގެ ގިނަ ރަށްތަކަކަށް ކަރަންޓުގެ ހިދުމަތް ދެމުން އަންނަނީ ފެނަކައިންނެވެ.