ޗުއްޓީ އަށް އައިސް އުޅުނު ޖަޕާނުގެ މަޖިލިސް މެމްބަރަކު ރާއްޖޭގައި މަރުވެއްޖެ

ރާއްޖޭގެ ރިސޯޓެއްގައި ޗުއްޓީ ހޭދަ ކުރަމުން ދިޔަ ޖަޕާނުގެ މަޖިލިސް މެންބަރަކު މަރުވެއްޖެ އެވެ.

ފުލުހުން ބުނީ ޅ. އަތޮޅުގެ ރިސޯޓެއްގައި އުމުރުން 70 އަހަރުގެ ޖަޕާނުގެ ޓޫރިސްޓަކު ސްނޯކްލިން އަށް ގޮސް އުޅެނިކޮށް މޫދުގައި މަރުވެފައި އޮއްވާ ފެނުނު މައްސަލައެއް އިއްޔެ ހެނދުނު 8:33 ގައި ރިޕޯޓު ކޮށްފައިވާ ކަމަށެވެ.

އިތުރު ތަފްސީލް ފުލުހުން އަދި ހާމައެއް ނުކުރެ އެވެ.

ޖަޕާނުގެ ވެރިކަން ކުރާ ޕާޓީއާ ހަވާލާދީ ބައެއް މީޑިއާތަކުން އަންނަނީ އެ ގައުމުގެ މަޖިލިސް މެންބަރެއް ކަމަށްވާ ޓޮޝިޔުކި އަޑާޗި ރާއްޖޭގައި މަރުވެގެން އުޅޭ ކަމަށް ރިޕޯޓު ކުރަމުންނެވެ. ނަމަވެސް އެ ގައުމުގެ މަޖިލީހުން އަދި ރަސްމީކޮށް އިއުލާނެއް ނުކުރެ އެވެ.

ނަމަވެސް ރާއްޖޭގައި މަރުވެފައި ވަނީ އޭނާ ކަން "މިހާރު" އަށް ވަނީ ކަށަވަރު ކުރެވިފަ އެވެ.

އެކަމާ ގުޅޭ ގޮތުން ފޮރިން މިނިސްޓްރީގެ ބަހެއް އަދި ނުލިބެ އެވެ.