ކޮމިޝަންތަކަށް ބޭފުޅުން އައްޔަންކުރަން ދައުރުން ބޭރުން ޖަލްސާތަކެއް

ރައްޔިތުންގެ މަޖިލީހުގެ ދައުރުން ބޭރުން ދެ ޖަލްސާއެއް މި މަހު ބާއްވަން ނިންމައިފި އެވެ.

ޕީއެންސީ ޕާލިމެންޓަރީ ގްރޫޕްގެ ލީޑަރު އަދި އިނގުރައިދޫ ދާއިރާގެ މެންބަރު އިބްރާހިމް ފަލާހު "މިހާރު" އަށް ވިދާޅުވި ގޮތުގައި ދައުރުން ބޭރުން ޖަލްސާތަކެއް ބާއްވަނީ ބައެއް މިނިވަން މުއައްސަސާތަކަށް މެންބަރުން އައްޔަން ކުރުމަށް ގާނޫނުގައި ބުނާ 60 ދުވަހުގެ މުއްދަތު ހަމަވާނެތީ އެވެ.

އެހެންވެ، މި މަހު 16 ވަނަ ދުވަހާއި 20 ވަނަ ދުވަހު ޖަލްސާއެއް ބާއްވާނެ ކަމަށް ފަލާހު ވިދާޅުވި އެވެ.

އެ ޖަލްސާތަކުގައި އިލެކްޝަންސް ކޮމިޝަން (އީސީ) އާއި ބްރޯޑްކާސްޓިން ކޮމިޝަން (ބްރޯޑްކޮމް) އަށް މެންބަރުން އައްޔަން ކުރާނެ އެވެ.

މިނިވަން މުއައްސަސާތަކާ ބެހޭ ކޮމިޓީން މިހާރު ވަނީ އީސީ އާއި ބްރޯޑްކޮމްގެ މެންބަރު ކަމަށް ކުރިމަތިލާފައިވާ ފަރާތްތަކާ އިންޓަވިއު ކުރުމުގެ މަސައްކަތް ކުރިޔަށް ގެންގޮސްފަ އެވެ.