މިދިޔަ އަހަރު 334 މިލިއަން ޑޮލަރުގެ ލޯނު ނެގި!

ސަރުކާރުން މިދިޔަ އަހަރުގެ ތެރޭގައި ނުވަ ލޯނަކަށް 334 މިލިއަން ޑޮލަރު (5.2 ބިލިއަން ރުފިޔާ) ނަގައިފި އެވެ.

ފިނޭންސް މިނިސްޓްރީގެ ތަފާސްހިސާބުތައް ދައްކާ ގޮތުން އެންމެ ބޮޑު ލޯނެއް ނެގީ ސައުދީ ފަންޑު ފޯ ޑިވެލޮޕްމަންޓުންނެވެ. އެ އިދާރާ މެދުވެރިކޮށް ވެލާނާ އިންޓަނޭޝަނަލް އެއާޕޯޓު ތަރައްގީ ކުރުމަށް 150 މިލިއަން ޑޮލަރު (2.3 ބިލިއަން ރުފިޔާ) ނެގި އެވެ. ދެ ވަނަ އަށް އެންމެ ބޮޑު އަދަދެއް ހޯދީ އެކްސްޕޯޓު އިމްޕޯޓު ބޭންކް އޮފް ޗައިނާ (ޗައިނާ އެގްޒިމް) ބޭންކުންނެވެ. އެ ބޭންކުން ނެގީ 75 މިލިއަން ޑޮލަރު (1.2 ބިލިއަން ރުފިޔާ) ގެ ލޯނެކެވެ. އެ ލޯނު ނެގީ، ވެލާނާ އިންޓަނޭޝަނަލް އެއާޕޯޓު ޕްރޮޖެކްޓުގެ ރީފައިނޭންސިން އާއި އަޕްގްރޭޑު ކުރުމަށެވެ.

ތިން ވަނަ އަށް އެންމެ ބޮޑު ލޯނެއް ނެގީ އިސްލާމިކް ޑިވެލޮޕްމެންޓް ބޭންކް (އައިޑީބީ) މެދުވެރިކޮށެވެ. އެ ބޭންކު މެދުވެރިކޮށް ނެގި ދެ ލޯނަށް 40 މިލިއަން ޑޮލަރު (617 މިލިއަން ރުފިޔާ) އަރަ އެވެ. އައިޑީބީން ލޯނު ނަގާފައިވަނީ ކުދި އަދި މެދުފަންތީގެ ވިޔަފާރިތަކަށް ބޭނުންވާ ފައިސާ ހަމަޖެއްސުމަށެވެ

ސަރުކާރުން ނެގި އެހެން ލޯނުތަކުގެ ތަފްސީލު

1. ސައުދީ ފަންޑު ފޯ ޑިވެލޮޕްމެންޓް: 50 މިލިއަން ޑޮލަރު (771 މިލިއަން ރުފިޔާ)

2. ސައުދީ ފަންޑު ފޯ ޑިވެލޮޕްމެންޓް: 100 މިލިއަން ޑޮލަރު (1.5 ބިލިއަން ރުފިޔާ)

3. ޗައިނާ އެގްޒިމް ބޭންކް: 75 މިލިއަން ޑޮލަރު (1.2 ބިލިއަން ރުފިޔާ)

4. އިސްލާމިކް ޑިވެލޮޕްމެންޓް ބޭންކް: 10 މިލިއަން ޑޮލަރު (154 މިލިއަން ރުފިޔާ)

5. އިސްލާމިކް ޑިވެލޮޕްމެންޓް ބޭންކް: 30 މިލިއަން ޑޮލަރު (463 މިލިއަން ރުފިޔާ)

6. ކުވައިތު ފަންޑު ފޯ އަރަބް އިކޮނޮމިކް ޑިވަލޮޕްމެންޓް: 10 މިލިއަން ޑޮލަރު (154 މިލިއަން ރުފިޔާ)

7. އޭޝިއަން އިންފްރާސްޓްރަކްޗާ ޑިވެލޮޕްމެންޓް ބޭންކު: 15 މިލިއަން ޑޮލަރު (231 މިލިއަން ރުފިޔާ)

8. އޭޝިއަން ޑިވެލޮޕްމެންޓް ބޭންކު (އޭޑީބީ): 4 މިލިއަން ޑޮލަރު (62 މިލިއަން ރުފިޔާ)

9. އަބޫދާބީ ފަންޑު ފޯ ޑިވެލޮޕްމެންޓް: 40 މިލިއަން ޑޮލަރު (617 މިލިއަން ރުފިޔާ)

މިދިޔަ އަހަރުގެ ލޯނުތަކުގެ ތެރެއިން 80 ޕަސެންޓު ލޯނު ނެގީ، ވެލާނާ އިންޓަނޭޝަނަލް އެއާޕޯޓުގެ މަޝްރޫއަށެވެ. އެ މަޝްރޫއު މިހާރު ނިމޭނެ ކަމަށް އެމްއޭސީއެލް އިން ލަފާކުރަނީ މި އަހަރުގެ މެދުތެރޭގަ އެވެ. ކުރިން އެ މަޝްރޫއު ނިމޭނެ ކަމަށް ސަރުކާރުން ލަފާކުރީ މިދިޔަ އަހަރުގެ ޕީކް ސީޒަނަށެވެ.

ފިނޭންސް މިނިސްޓްރީން އާންމުކުރި މައުލޫމާތުތަކުގައިވާ ގޮތުން މިދިޔަ އަހަރު ދައުލަތުގެ ޖުމްލަ ދަރަނި ހުރީ 139 ބިލިއަން ރުފިޔާގަ އެވެ. ދައުލަތުގެ ދަރަނި މި އަހަރު 150 ބިލިއަން ރުފިޔާ އަށް އަރާނެ ކަމަށް ބަޖެޓުގައި ލަފާކޮށްފައި ވެ އެވެ. އެއީ ޖީޑީޕީގެ ނިސްބަތުން 124 ޕަސެންޓެވެ.

ދަރަނި އަދާކުރުމަށް ދައުލަތުން މި އަހަރު 9.4 ބިލިއަން ރުފިޔާ ހޭދަކުރަން ޖެހެ އެވެ. އަންނަ އަހަރު ދަރަނި އަދާކުރަން 15 ބިލިއަން ރުފިޔާ ދައްކަން ޖެހެ އެވެ. އެހެންވެ، މިއީ ރާއްޖޭގެ ތާރީހުގައި ވެސް ދަރަނި އަދާކުރަން އެންމެ ބޮޑު އަދަދެއް ހޭދަކުރަން ޖެހޭ ދެ އަހަރެވެ.

ފިނޭންސް މިނިސްޓްރީން ބުނީ، 2026 ވަނަ އަހަރާއި 2027 ވަނަ އަހަރު ދައުލަތުގެ ސީދާ ދަރަނި، ޖީޑީޕީގެ ނިސްބަތުން 95 ޕަސެންޓަށް ވުރެ ދަށްވާނެ ކަމަށް ނުބެލެވޭ ކަމަށެވެ. އެ މިންވަރަށް ދަރަނި ދަށްކުރަން އިސްލާހީ ފިޔަވަޅުތަކާއި ހަރަދު ކުޑަކުރަން އިތުރު ފިޔަވަޅު އަޅަން ޖެހޭނެ ކަމަށް ބަޖެޓު ފޮތުގައި ފާހަގަކޮށްފައި ވެ އެވެ.