ވައި ނުސާފުވުމުން ރައްކާތެރިކަމަށް ސަމާލުކަން ދޭން އެޗްޕީއޭ އިން އިލްތިމާސްކޮށްފި

ރާއްޖޭގެ ޖައްވު މި ދުވަސްވަރު ވަރަށް ބޮޑަށް ތަޣައްޔަރުވެފައި ވާތީ، ރައްކާތެރިކަމަށް ހާއްސަ ސަމާލުކަން ދިނުމަށް އާންމުންނަށް އެޗްޕީއޭ އިން މިއަދު އިލްތިމާސްކޮށްފި އެވެ.

އެޗްޕީއޭ އިން ވަނީ މި ހާލަތުގައި ރައްކާތެރިކަން ކަށަވަރުކުރަން ކުރަންވީ ބައެއް ކަންކަން ކިޔައިދީފަ އެވެ. އޭގެ ތެރޭގައި ހިމެނެނީ؛

• ފުއްޕާމޭގެ ބަލިތަކާއި ހިތުގެ ބަލި އަދި އެލާޖީގެ މައްސަލަތައް ހުންނަ މީހުން ގެއިން ބޭރުގައި ގިނަ ވަގުތު ހޭދަނުކުރުން.

• ބޭރަށް ނުކުންނަން ޖެހޭ ހާލަތްތަކުގައި ރައްކާތެރި މާސްކެއް އެޅުން.

• ކުޑަކުދިންނާއި ދޮށީ އުމުރުގެ މީހުންނާއި މާބަނޑު މީހުން ބޭރުގައި ގިނަ ވަގުތު ހޭދަނުކުރުން.

• ތުއްތު ކުދިން ބޭރަށް ނުނެރުން.

• ގޭގެ ދޮރުތައް ލައްޕާފައި ބެހެއްޓުން.

• ބޭރުގައި ކުޅިވަރު ކުޅުމާއި ކަސްރަތުކުރުން ކަހަލަ ކަންތައްތައް މަޑުޖައްސާލުން.

މާލެ ސަރަހައްދުގެ ވައިގެ ކޮލިޓީ ނުރައްކާތެރި މިންވަރަކަށް މަތިވެފައިވާ ކަމަށް ވިލިމާލޭގައި ހުންނަ އެއާ ކޮލިޓީ މޮނީޓަރިން ސިސްޓަމުން ދައްކަ އެވެ. ވިލިމާލޭގައި ހުންނަ ގައުމީ ޔުނިވާސިޓީގެ ސެންޓަ ފޯ މެރިޓައިމް ސްޓަޑީސްގެ ކެމްޕަސް އިމާރާތުގައި ބަހައްޓާފައިވާ އެއާ ކޮލިޓީ މޮނީޓަރިން ސިސްޓަމުން ދައްކާ ގޮތުން، މި ސަރަހައްދުގެ ވައިގެ ކޮލިޓީ މި ވަގުތު ހުރީ 156 ގަ އެވެ. އެއީ ސިއްހަތަށް ވަރަށް ނުރައްކާތެރި މިންވަރެކެވެ.

މި މަހުގެ ކުރީކޮޅުން ފެށިގެން ރާއްޖޭގެ ޖައްވު ވަނީ ވަރަށް ބޮޑަށް ތަޣައްޔަރުވެފަ އެވެ.

މިހާރު އާންމުކޮށް ކޮންމެ އަހަރަކު ވެސް، އިރުވައި މޫސުމުގައި ރާއްޖެ އަށް، ޖައްވު ތަޣައްޔަރުވުމުގެ ސަބަބުން ހޭޒް ނުވަތަ ފުސްކަމުގެ އަސަރު ކުރެ އެވެ. ރާއްޖޭގެ ޖައްވު ތަޣައްޔަރު ވަނީ އުތުރު އިންޑިއާގެ ސަރަހައްދުތަކުގައި އަންނަ ނުސާފު ވައިގެ ސަބަބުންނެވެ.