އުމްރާގެ އުސޫލާ ހިލާފްވި ކުންފުނިތަކުގެ ތެރެއިން މިހާތަނަށް ޖޫރިމަނާ ދެއްކީ 3 ކުންފުންޏަކުން: މިނިސްޓްރީ

ރާއްޖެއިން އުމްރާއަށް މީހުން ގެންދިއުމުގެ އުސޫލާ ހިލާފްވި މައްސަލާގައި ޖޫރިމަނާކުރި ކުންފުނިތަކުގެ ތެރެއިން މިހާތަނަށް ޖޫރިމަނާ ފައިސާ ދެއްކީ އެންމެ ތިން ކުންފުންޏަކުން ކަމަށް އިސްލާމިކް މިނިސްޓްރީން މިއަދު ބުނެފި އެވެ.

އުމްރާއަށް މީހުން ގެންދިޔަ ބައެއް ކުންފުނިތަކުން މި އަހަރު ވެސް އުސޫލާ ހިލާފުވި މައްސަލާގައި 19 ކުންފުންޏެއް 5،000ރ. އިން ޖޫރިމަނާކުރީ މި މަހުގެ 14 ވަނަ ދުވަހު އެވެ.

އޭގެ ތެރޭގައި އުމްރާއަށް މީހުން ނުގެން ގޮސް، އޮޅުވާލައިގެން ޑޮލަރު ގަތް ކުންފުންޏެއް ވެސް ހިމެނެ އެވެ.

އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވީ އެ ކުންފުނިން މިހާތަނަށް ފައިސާ ދެއްކީ ތިން ކުންފުނިން ކަމަށެވެ.

ފައިސާ ދެއްކުމަށް ކުންފުނިތަކަށް 30 ދުވަސް ދީފައި ވާއިރު، މިނިސްޓްރީން ބުނެފައިވަނީ އެ ކުންފުނިތަކުގެ ނަން އާއްމު ކުރާނީ އެ މުއްދަތުގައި ޖޫރިމަނާ ނުދައްކައިފިނަމަ ކަމަށެވެ.

އުމްރާ އުސޫލާ ހިލާފުވި ގިނަ ކުންފުނިތަކަކަށް ފިޔަވަޅު އަޅާފައިވަނީ މިދިޔަ ޑިސެމްބަރު މަހު އަލް-ހިޖްރަ ޓްރެވެލްސް އެންޑް ޓުއާސް އިން މީހުން އުމްރާއަށް ގެންގޮސް، ހާލުގައި ޖެއްސި މައްސަލައެއް ފެންމަތިވެފައި ވަނިކޮށެވެ. އެ ގްރޫޕުން އުމްރާ ވެރިންގެ ފައިސާއިން ދެކޮޅު ޓިކެޓް ހަމަނުޖައްސައި، އެހެން ކަމަކަށް އެ ފައިސާ ބޭނުން ކޮށްފައިވާ ކަމަށް އެ ގްރޫޕުން އިއުތިރާފުވެފައިވެ އެވެ.

އެ މައްސަލާގައި މިނިސްޓްރީން ވަނީ ހިޖްރަ ގްރޫޕް އެއްލައްކަ ރުފިޔާ އިން ޖޫރިމަނާކޮށް އަދި އެ ކުންފުނީގެ ހުއްދަ ބާތިލްކޮށްފަ އެވެ. އަދި އެ ކުންފުނީގެ އެއްވެސް ހިއްސާދާރެއް ހިމެނޭ އެހެން ކުންފުންޏަކަށް ވެސް އުމްރާ އަށް މީހުން ގެންދިއުމުގެ ހުއްދަ ނުދޭން ވެސް ވަނީ ނިންމައިފަ އެވެ.

ޅ. ނައިފަރުގެ ދެ މީހުން ކަމަށްވާ ފިރާގު މުހައްމަދުފުޅާއި މުސްތަފާ މުހައްމަދުފުޅު ޑިރެކްޓަރުންގެ ބޯޑުގައި ހިމެނޭ އެ ކުންފުންޏާ ގުޅޭ މައްސަލަ ފުލުހަށް ހުށަހަޅާނެ ކަމަށް ވެސް މިނިސްޓްރީން ބުނެފައިވެ އެވެ.

މިދިޔަ އަހަރުގެ ރޯދަ މަހު އުމްރާއަށް މީހުން ގެންގޮސް، ހާލުގައި ޖެއްސި އެހެން މައްސަލައެއް ފެންމަތިވެފައިވެ އެވެ. އޭރު އަލް-މަޝްއަރު ޓުއާސް ނަމަކަށް ކިޔާ ކުންފުންޏެއްގެ ހަވާލުގައި އުމްރާއަށް ދިޔަ މީހުން އަނބުރާ ގެންނަން ޖެހުނީ ސަރުކާރުގެ ހަރަދުގަ އެވެ.

އެ މައްސަލާގައި ފުލުހުން ވަނީ މަޝްއަރު ޕްރައިވެޓް ލިމިޓެޑްގެ ކުންފުނީގެ ވެރިޔާ އަލީ ފާރިޝް އާއި އެ ކުންފުނީގެ މައްޗަށް ދައުވާކުރަން ޕްރޮސެކިއުޓާ ޖެނެރަލްގެ އޮފީހަށް ފޮނުވައިފަ އެވެ.