އޭސީސީ އަށް އާ ދެ މެމްބަރަކު އައްޔަން ކޮށްފި

އެންޓި ކޮރަޕްޝަން ކޮމިޝަން (އޭސީސީ) އަށް އާ ދެ މެންބަރަކު، ރައީސް ޑރ. މުހައްމަދު މުއިއްޒު މިއަދު އައްޔަން ކުރައްވައިފި އެވެ.

އެ ކޮމިޝަނުން ހުސްވެފައިވާ މެމްބަރުކަމުގެ ދެ މަގާމަށް އައްޔަން ކުރެއްވީ މއ. ގޯލްޑެންމޫން އަހުމަދު ނާޝިދާއި ރ. އަލިފުށީ، ފަސާނާ އަބްދުﷲ ނާޝިދެވެ. އެ ދެ ބޭފުޅުންނަށް ރައްޔިތުންގެ މަޖިލިހުން ރުހުން ދިނީ މިދިޔަ ބުރާސްފަތި ދުވަހު ބޭއްވި ޖަލްސާގަ އެވެ.

އެހެންވެ، ރައީސް އޮފީހުގައި މިއަދު ބޭއްވި ރަސްމިއްޔާތެއްގައި ރައީސް މުއިއްޒު ވަނީ އެ ދެ ބޭފުޅުން އޭސީސީގެ މެންބަރުކަމަށް އައްޔަން ކުރެއްވި ކަމުގެ ލިޔުން ހަވާލުކޮށްދެއްވައިފަ އެވެ.

ޕޮލިސް ބޯޑުގެ މެންބަރު ކަން ކުރައްވާފައިވާ އަހުމަދު ނާޝިދަކީ ކުރީގައި އެސިސްޓަންޓް ކޮމިޝަނަރު އޮފް ޕޮލިސްގެ މަގާމު ފުރުއްވާފައިވާ ބޭފުޅެކެވެ.

އާސަންދަ ކުންފުނީގެ އެކި ޑިޕާޓްމަންޓުގެ މެނޭޖަރުކަން ކުރައްވާފައިވާ އަބްދުﷲ ނާޝިދު ވަނީ އިންޑިއާގެ ރީޖަނަލް އިންސްޓިޓިއުޓް އޮފް އެޑިއުކޭޝަނުން މާސްޓާސް އޮފް އެޑިއުކޭޝަން ހާސިލް ކުރައްވައިފަ އެވެ.

އޭސީސީ އަށް އަލަށް ދެ މެންބަރުން އައްޔަން ކުރެއްވީ، އެ ކޮމިޝަންގެ ނައިބު ރައީސްކަމުގައި ހުންނެވި އަބްދުއްސަލާމާއި އެ ކޮމިޝަންގެ މެންބަރު ތޯހާ މުހައްމަދު އިސްތިއުފާ ދެއްވުމާ ގުޅިގެންނެވެ. އެ ދެ މެންބަރުން އިސްތިއުފާ ދެއްވީ އެ މެންބަރުންނަށް ތުހުމަތު ކުރެވޭ މައްސަލަތަކެއް މަޖިލީހުން ބަލަން ފަށާފައި ވަނިކޮށެވެ.