މޯލްޑިވިއަނުން ޗައިނާގެ ޝެންހާއީއަށް ދަތުރުތައް ފަށައިފި

ގައުމީ އެއާލައިން، މޯލްޑިވިއަނުން ޗައިނާގެ ޝެންހާއީ އަށް ދަތުރުތައް ފަށައިފި އެވެ.

އެ އެއާލައިނުން ޝެންހާއީ އަށް ކުރާ ފުރަތަމަ ދަތުރު ރޭ ފެށިއިރު، އެއީ މޯލްޑިވިއަނުން ޗައިނާއަށް ފެށި ދަތުރުތަކުގެ ތިން ވަނަ މަންޒިލެވެ.

މޯލްޑިވިއަންގެ ފުރަތަމަ ވައިޑްބޮޑީ އެއާކްރާފްޓް އޭ330 ރާއްޖެ ގެނެސް ޗައިނާއަށް ދަތުރުތައް ފެށީ މި މަހުގެ 21 ގައި ޗައިނާގެ ޗެންގްޑޫއިންނެވެ. މި މަހުގެ 24 ގައި ބެއިޖިންއަށް ވެސް ވަނީ ދަތުރުތައް ފަށައިފަ އެވެ.

މޯލްޑިވިއަން އިން ޗައިނާގެ ޗެންގްޑޫ އަށް ދެކޮޅު ޓިކެޓެއްގެ އަގަކީ 688 ޑޮލަރު (10،610ރ.) އެވެ. ބެއިޖިންގެ ދެކޮޅު ޓިކެޓެއްގެ އަގު 788 ޑޮލަރު (12،151ރ.) އަށް އަރަ އެވެ. ޗައިނާގެ ޝެންހާއީގެ ދެކޮޅު ޓިކެޓުގެ އަގަކީ 777 ޑޮލަރު (11،981ރ.) އެވެ.

އެއާބަސް އޭ330 ބޯޓުން 260 މީހުން އުފުލޭނެ އެވެ. ބިޒްނަސް، ޕްރިމިއަމް އިކޮނޮމީ އަދި އިކޮނޮމީ ކްލާހަށް ވެސް ހާއްސަ ކޮށްފައިވާ އެ ބޯޓުން ދުރުރާސްތާގެ ދަތުރުތައް ކުރެވޭނެ އެވެ. ކާގޯ އުފުލޭ ކެޕޭސިޓީއަކީ 10 ޓަނެވެ.

ދަތުރުުކުރާ ކޮންމެ ފަސިންޖަރަކަށް ވެސް 40 ކިލޯގެ ބެގޭޖު އުފުލޭނެ އެވެ. އެއާބަސް އޭ330 ބޯޓާ އެކު، މޯލްޑިވިއަން އެއާލައިންގެ ފްލީޓުގެ އަދަދު 25 އަށް އިތުރުވާނެ އެވެ. މޯލްޑިވިއަން އިން އަންނަނީ އެއާބަސް އޭ330 ގެ ބޯޓެއް މިއަހަރުގެ ފަހުކޮޅުގައި ވެސް ގެންނަން މަސައްކަތް ކުރަމުންނެވެ. އެއާ އެކު އެއާލައިނުން ޔޫރަޕްގެ ސިޓީތަކަށް ވެސް ސީދާ ދަތުރުތައް ކުރާނެ އެވެ.