ދިރާގު ފިންޓެކާއި ސީބީއެމް، އެޗްބީއެލް ވެސް ފަވަރައިން ހިދުމަތް ދެނީ

ދިރާގު ޕޭގެ ހިދުމަތް ފޯރުކޮށްދޭ ދިރާގު ފިންޓެކާއި އިތުރު ދެ ބޭންކެއް، މޯލްޑިވްސް މަނިޓަރީ އޮތޯރިޓީ (އެމްއެމްއޭ)އިން ގާއިމުކޮށްފައިވާ އިންސްޓަންޓް ޕޭމަންޓް ސިސްޓަމް، "ފަވަރަ"އާ ގުޅިއްޖެ އެވެ.

ފަވަރަ މެދުވެރިކޮށް ހިދުމަތްތައް ދިނުމަށް އެ ސިސްޓަމާ ގުޅުނީ ހަބީބް ބޭންކް ލިމިޓެޑް (އެޗްބީއެލް)، ކޮމާޝަލް ބޭންކް އޮފް މޯލްޑިވްސް ޕްރައިވެޓް ލިމިޓެޑް (ސީބީއެމް) އަދި ދިރާގު ފިންޓެކް ޕްރައިވެޓް ލިމިޓެޑް (ދިރާގު ފިންޓެކް) އެވެ.

ދިރާގު ފިންޓެކް އަކީ ފަވަރައަށް ޕޭމަންޓުގެ ހިދުމަތްދޭ ބޭންކެއް ނޫން ކުންފުންޏެއްގެ ގޮތުގައި ބައިވެރިވާ ފުރަތަމަ ފަރާތެވެ.

އެމްއެމްއޭއިން ބުނި ގޮތުގައި އެ ތިން ފަރާތުން ފަވަރައާ ގުޅުމަށް ވާންޖެހޭ އެންމެފަހުގެ ތައްޔާރީތައް ފުރިހަމަކޮށް ޕައިލަޓް ޓެސްޓިންގެ މަރުހަލާ ވެސް މިހާރު ވަނީ ފުރިހަމަކޮށްފަ އެވެ. އެ ތިން ފަރާތުގެ ހިދުމަތްތައް ބޭނުންކުރާ ހުރިހާ ކަސްޓަމަރުންނަށް ވެސް ފަވަރަ ޓްރާންސްފާ، ފަވަރަ ރިކުއެސްޓް، ފަވަރަ އައިޑީ އަދި ފަވަރަ ރީކޯލް ހިމެނޭހެން، ހުރިހާ ހިދުމަތްތައް މިހާރު ލިބޭނެ އެވެ.

އަލަށް ގުޅުނު އެޗްބީއެލް އާއި ސީބީއެމްއާ އެކު ރާއްޖޭގައި ބޭންކިންގެ ހިދުމަތް ދޭ ހުރިހާ ބޭންކުތަކެއް މިހާރު އެ ސިސްޓަމުގައި ހިމެނޭނެ އެވެ. އެގޮތުން ބެންކް އޮފް މޯލްޑިވްސް (ބީއެމްއެލް)، މޯލްޑިވްސް އިސްލާމިކް ބޭންކް (އެމްއައިބީ)، ސްޓޭޓް ބޭންކް އޮފް އިންޑިއާ (އެސްބީއައި)، މޮރިޝަސް ކޮމާޝަލް ބޭންކް (އެމްސީބީ) އަދި ބޭންކް އޮފް ސިލޯން (ބީއޯސީ)ގެ ހިދުމަތްތައް ފަވަރައިން ލިބޭނެ އެވެ.

އެމްއެމްއޭއިން ބުނީ ޕޭމަންޓުގެ ހިދުމަތްތައް ދޭ އިތުރު ފަރާތްތައް ވެސް އެ ސިސްޓަމާ ގުޅުމުގެ މަސައްކަތްތައް ކުރިއަށް ދާ ކަމަށެވެ.

ފަވަރަ އަކީ ކޮންމެ ބޭންކެއްގެ ނުވަތަ ޕޭމަންޓު ހިދުމަތްތައް ދޭ ފަރާތެއްގެ އެކައުންޓު ނުވަތަ ވޮލެޓު އޮތްނަމަ ކޮންމެ ތަނެއްގައި ހުރެގެން ވެސް ވަގުތުން ވަގުތައް ފައިސާގެ މުއާމަލާތްތައް ހިންގޭނެ ސިސްޓަމެކެވެ. އެ ސިސްޓަމް އެމްއެމްއޭއިން ތައާރަފް ކުރީ 2023 ވަނަ އަހަރުގެ އޮގަސްޓު މަހު އެވެ.