މަގުމަތީ ހުރި މީހެއްގެ ބޮލުގައި މަރުތޭލަކުން ޖަހައި ޒަހަމްކޮށްލައިފި

މަގުމަތީ ހުރި މީހެއްގެ ބޮލުގައި މަރުތޭލަކުން ޖަހައި މިރޭ ޒަހަމްކޮށްލައިފި އެވެ.

ފުލުހުން ބުނި ގޮތުގައި އައިޖީއެމްއެޗް ކައިރީގައި ހުރި މީހަކަށް ހަމަލާދިނީ ސައިކަލެއްގައި އައި ދެ މީހެކެވެ.

ނަމަވެސް އެނގިފައިވާ ގޮތުގައި، ހަމަލާ ދިނީ ސައިކަލެއްގައި އިށީނދެގެން އިންދަ އެވެ. އައިޖީއެމްއެޗް ކައިރީގައި ހުރި ފުލުހަކު އެ ވަގުތު އެ ސަރަހައްދަށް ދިޔަ ނަމަވެސް ހަމަލާ ދިން މީހުން ވަނީ މާކުރިން ދުވެ ފިލައިފަ އެވެ. އެ މީހުން ސައިކަލްގައި ފިލައިގެން ދާން އުޅެނިކޮށް ސައިކަލް ސްޓާޓް ނުވުމުން ފިލައިގެން ދިޔައީ ދުވެފައި ކަމަށް ވެސް އެނގިފައިވެ އެވެ.

ފުލުހުން ބުނީ ހަމަލާގައި ޒަހަމްވީ ދިވެހި ފިރިހެނެއް ކަމަށާއި އޭނާއަށް ފަރުވާ ދޭން އައިޖީއެމްއެޗަށް ގެންގޮސްފައިވާ ކަމަށެވެ.

އެ މީހާގެ ހާލަތާ ގުޅޭ ތަފްސީލެއް ފުލުހުން ނުދެ އެވެ.

މާލޭގައި މިއަދު ވަނީ ކެފޭއެއްގެ ބަދިގެ ތެރޭގައި ވެސް އެތަނުގެ ބިދޭސީ ދެ މުވައްޒަފަކު އެކަކު އަނެކަކަށް ހަމަލާދީ ވަރަށް ބޮޑަށް ޒަހަމްކޮށްލައިފަ އެވެ.