ވޭޕް ބޭނުންކޮށްގެން މިހާތަނަށް 29 މީހަކު ޖޫރިމަނާކޮށްފި

ވޭޕް ބޭނުންކޮށްގެން މިހާތަނަށް 29 މީހުން ޖޫރިމަނާ ކޮށްފައިވާ ކަމަށް ފުލުހުން މިއަދު ބުނެފި އެވެ.

ފުލުހުންގެ މީޑިއާ އޮފިޝަލު ވިދާޅުވީ ދުންފަތް ކޮންޓްރޯލް ކުރުމާބެހޭ ގާނޫނާ ހިލާފުވުމުން، ވޭޕް މަނާކުރި ފުރަތަަމަ ހަފުތާގައި ހަ މީހަކު ޖޫރިމަނާކޮށްފައިވާ ކަމަށެވެ. އެއީ ކޮންމެ މީހަކު 5،000ރ. ގެ ރޭޓުން ޖުމްލަ 30،000ރ. ގެ ޖޫރިމަނާ އެވެ.

އޭގެފަހުން، މިދިޔަ ޑިސެމްބަރު މަހުގެ ނިޔަލަށް 14 މައްސަލައެއްގައި އިތުރު 11 މީހަކު ޖުމްލަ 60،500ރ. އިން ޖޫރިމަނާކޮށް އަދި މިދިޔަ މަހުގެ ފުރަތަމަ ދުވަހުން ފެށިގެން މިދިޔަ މަހުގެ ނިޔަލަށް 14 މައްސަލައެއްގައި އިތުރު 12 މީހަކު ޖޫރިމަނާކޮށްފައިވާ ކަމަށް ފުލުހުން ބުންޏެވެ. އެއީ ޖުމްލަ 70،000ރ. ގެ ޖޫރިމަނާ އެވެ.

ރާއްޖެއަށް ވޭޕް އެތެރެ ކުރުމާއި ވޭޕް ބޭނުންކުރުން މިދިޔަ ޑިސެމްބަރު މަހުގެ 15 ވަނަ ދުވަހު މަނާކުރި ފަހުން، ވޭޕް މައްސަލަތަކުގައި ކުރި ޖޫރިމަނާގެ އަދަދު 160،500ރ. ވަނީ އަރައިފަ އެވެ.

ގާނޫނުގައިވާ ގޮތުން ވޭޕްކޮށްފިނަމަ 5،000ރ. އިން ޖޫރިމަނާ ކުރާނެ އެވެ. އަދި ހިލޭ ވޭޕެއް ދީފިނަމަ 10،000ރ އަދި ވޭޕް ވިއްކައިފިނަމަ 20،000ރ. އިން ޖޫރިމަނާ ކުރާނެ އެވެ.

މީގެ އިތުރުން 21 އަހަރުނުވާ މީހަކަށް ވޭޕް ވިއްކައިފިނަމަ 50،000ރ. އިން ޖޫރިމަނާ ކުރާނެ އެވެ.

ފުލުހުން ބުނީ ގާނޫނާ ހިލާފުވެގެން ޖޫރިމަނާ ކުރާ މީހުންނަށް އެކަމުގެ މައުލޫމާތު އަންގާނީ މޯބައިލް ފޯނަށް ފޮނުވާ މެސެޖަކުން ކަމަށެވެ. މި މެސެޖުގައި ޖޫރިމަނާ ދެއްކުމަށް ވާރު ޕޭގެ ޕޭމެންޓް ލިންކެއް ހިމަނާފައިވާނެ ކަމަށާއި ފައިސާ ދައްކަން ޖެހޭނީ އެ ލިންކުން ކަމަށް ފުލުހުން ބުންޏެވެ.